පස් වසරකට ඉහතදී රජයේ ආරක්ෂ අංශ විසින් වැලිකඩ බන්ධනාගාරයේ සිදු කරන ලද මෙහෙයුමකදී සිරකරුවන් 27 දෙනෙකු ඝාතනය කිරීම සම්බන්ධව විධිමත් පරීක්ෂණයක් පවත්වන ලෙස ඉල්ලා අභියාචනාධිකරණයට ගොනු කළ පෙත්සම ලබන ජූලි 07 වැනිදා කැඳවීමට තීරණය කර තිබේ.
මෙම ඝාතන සම්බන්ධයෙන් පරීක්ෂණ පවත්වන ලෙසට බලධාරීන්ගෙන් කළ ඉල්ලීම් මෙතෙක් ඉටු නොවූ බැවින් මෙම සිද්ධිය සම්බන්ධයෙන් පරීක්ෂණයක් පවත්වන ලෙස නියෝග කරන රිට් ආඥාවක් නිකුත් කරන ලෙසට පෙත්සම්කරු වන සුදේශ් නන්දිමාල් සිය පෙත්සම මඟින් ඉල්ලා තිබුණි.
අභියාචනාධිකරණ සභාපතිනි රෝහිණී වල්ගම සහ විනිසුරු එස්.තුරෙයිරාජා යන විනිසුරු මඩුල්ල හමුවේ පෙත්සම කැඳවු අවස්ථාවේදී පෙත්සම විභාගයට ගැනීමට තීන්දු කෙරුණි.
මෙම පෙත්සමේ වගඋත්තරකරුවන් වශයෙන් බන්ධනාගාර කොමසාරිස් ජනරාල් , රහස් පොලීසි අධ්‍යක්ෂක , පොලිස්පති ,බන්ධනාගාර ප්‍රතිසංස්කරණ ,පුනුරුත්ථාපන ,නැවත පදිංචි කිරීමේ හා හින්දු ආගමික කටයුතු පිලිබඳ අමාත්‍ය ඩී.එම්.ස්වාමිනාදන් සහ නීතිපතිවරයා නම් කරනු ලැබ සිටිති.
මෙම මෙහෙයුමට පැමිණි ආරක්ෂක අංශ බන්ධනාගාරයට ඇතුල්වීම වැළැක්වීම බන්ධනාගාර නිලධාරින් විසින් වැළක්වූ අවස්ථාවේ තමන් ආරක්ෂක ලේකම්ගේ නියෝගයක් මත පැමිණි හෙයින් බන්ධනාගාරයෙන් විශේෂ අවසරයක් ලබාගැනීමට අවශ්‍ය නැතැයි එම හමුදා නිලධාරින් කී බව පෙත්සම්කරු වන සුදේශ් නන්දිමාල් සිය පෙත්සම මඟින් පෙන්වා දී තිබේ.
සිද්ධිය සම්බන්ධව සොයා බැලීම සඳහා යහපාලන රජය විසින් පත් කරන ලද විමර්ශන කමිටු වාර්තාව විශ්‍රාම ලත් විනිසුරු නිමල් නම්බුවසම් අගමැති රනිල් වික්‍රමසිංහ හමුවේ අධිකරණ අමාත්‍ය විජයදාස රාජපක්ෂ වෙත භාර දෙන ලද්දේ 2015 ජුනි මාසයේදී වන අතර එය මෙතෙක් ප්‍රසිද්ධියට පත් කර නොමැත.
Facebook Comments
