ජවිපෙ යුද්දේ දිනපු හැටි හඳුන් ගෝටාට කියා දෙයි (VIDEO)

0

මහා පරිමාණ යුද අපරාධ සිදුවු බවට චෝදනා එල්ලවී ඇති යුද්ධයේ ජයග්‍රහණය බාර ගැනීමට අනුර කුමාර දිසානායකගේ නායකත්වයෙන් යුත් ජනතා විමුක්ති පෙරමුණ ද ඉදිරිපත් වී සිටී.

යුද්ධය දියත් කිරීමට අවශ්‍ය දේශපාලන කාර්යභාරය ඉටු කරමින් රටේ ස්වෛරී භාවය ආරක්ෂා කරන ලද්දේ තම පක්ෂය බව ජවිපෙ දේශපාලන මණ්ඩල සභික සුනිල් හඳුන්නෙත්ති ප්‍රකාශ කර තිබේ.

“උතුරු නැගෙනහිර වෙන්කිරීම කරලා, සුනාමි සහන මණ්ඩලය අහෝසි කරලා, සුනාමි සහන මණ්ඩලයට විරුද්ධව උසාවියට ගිහිල්ලා, උතුරු නැගෙනහිර පළාත් වෙන් කරලා, අපේ රටේ ස්වෛරී භාවය ආරක්ෂා කරලා, රට බෙදෙන තැනින් නතර කරලා, යුද්ධය අවසන් කරන දේශපාලන කාර්ය භාරය කළේ වෙන කවුරුත් නෙමෙයි. ජනතා විමුක්ති පෙරමුණේ අපි,” යැයි ඔහු කන්තලේ පැවති ජන හමුවක දී ආවේගශීලීව කියා සිටියේය.

දෙමළ විමුක්ති කොටි සංවිධානයට විරුද්ධ අවසන් යුද්ධය දියත් කිරීමට දේශපාලන තීන්දු ගත් ප්‍රධාන පාර්ශවය වූයේ තම පක්ෂය වූ ජවිපෙ බව කී මන්ත්‍රීවරයා මහින්ද රාජපක්ෂ කළ කාර්ය කුමක් දැයි ප්‍රශ්න කළේය.

“දේශප්‍රේමී අරගලයක්”

අඩුම වශයෙන් හතලිස් දහසක් සාමාන්‍ය වැසියන් මරාදමා, අඩුම වශයෙන් විසිදහසක් අතුරුදහන් කළ බවට ගණන් බලා ඇති යුද්ධය ඔහු විසින් හඳුන්වන ලද්දේ “දේශප්‍රේමී අරගලයක්” ලෙසිනි.

ජාතික සමගිය ඇති කිරීම එකී දේශප්‍රේමී අරගලයේ ඉතුරු කොටස බව ද ජවිපෙ දේශපාලන මණ්ඩල සභික සුනිල් හඳුන්නෙත්ති වැඩි දුරටත් පැවසීය.

කෙසේ වෙතත් ජාතික සමගිය ඇති කරන ආකාරය හෝ දේශිය හා ජාත්‍යන්තරව නැගෙන යුද අපරාධ චෝදනා සම්බන්ධ ගන්නා ක්‍රියා මාර්ගයක් පිළිබඳව ජවිපෙ දේශපාලන මණ්ඩල සභිකයා පැහැදිලි කළ වගක් දැන ගන්නට නැත.

Facebook Comments