ජනාධිපතිවරයා සහ පාර්ලිමේන්තුව අතර ඇතිව තිබෙන බල ගැටුම අවසන් කළ හැක්කේ 19 වැනි ව්‍යවස්ථා සංශෝධනය අහෝසි කිරිමෙන් නොව විධායක ජනාධිපති ධුරය නැති කර දැමීමෙන් පමණක් බවට ව්‍යවස්ථා විශාරදයකු අවධාරණය කර තිබේ.
ජනාධිපති බලතල සීමා කෙරෙන19 වැනි ව්‍යවස්ථාවේ ගැටලු ඇති බව පිළිගන්නා බව කී එක්සත් ජාතික පක්ෂයේ පාර්ලිමේන්තු මන්ත්‍රී නිතිඥ ජයම්පති වික්‍රමරත්න එසේ ගැටලු ඇති වුයේ එම පනත් කෙටුම් පත පාර්ලිමේන්තුවට ගෙන ආ පසුව කරන ලද වෙනස් කම් නිසා බවයි හෙතෙම පෙන්වා දෙන්නේ.
“මගෙන් අහලා තියෙනවා මෙහි අර්බුදයක් තියෙනවද කියලා. මම කියනවා ඔව් අර්බුදයක් තියෙනවා එයට හේතු වුනේ ඇති කරන ලද වෙනස් කම්. ආණ්ඩුවට සරල බහුතරයක්වත් තිබුනෙ නැති නිසා ඒ වෙනස් කම් වලට එකඟ වුණා,” යැයි කඩිමුඩියේ සම්මත කරගත් 19 වැනි ව්‍යවස්ථාව කෙටුම්පත් කිරීමට දායක වු නීතිවේදියා කියා සිටියේය.
ජනාධිපති මෛත්‍රීපාල සිරිසේන විසින් ජුනි 26 මාධ්‍ය ප්‍රධානීන් සමඟ පැවති හමුවේදී 19 වන ව්‍යවස්ථා සංශෝධනය දැඩි දෝශ දර්ශනයට ලක් කර තිබු අතර එය කෙටුම්පත් කරන ලද පිරිස් හඳුන්වා දෙනු ලැබුවේ “දේශපාලන මකබාස්ලා” ලෙසයි.
වත්මන් දේශපාලන අස්ථාවරත්වයට හේතුව 19 වැනි ව්‍යවස්ථාව සංශෝධනය බවට චෝදනා කළ ජනපති මෛත්‍රීපාල සිරිසේන ඉදිරි ජනාධිපතිවරයට පෙර හෝ පසුව බලයට පත්වන පිරිස විසින් එම සංශෝධනය අහෝසි කළ යුතු බව ද කිය සිටියේය.
එහෙත් දහනම වැනි ව්‍යවස්ථා සංශෝධනය අහෝසි කිරීම හරහා සිදු වන්නේ රට ආපස්සට යාම බවයි පාර්ලිමේන්තු මන්ත්‍රී නිතිඥ ජයම්පති වික්‍රමරත්න වැඩි දුරටත් පෙන්වා දෙන්නේ.
Facebook Comments
