කළු සල්ලි සුදු කිරිමේ ජාවාරමක් ලෙස ආරම්භ වු ක්ෂුද්‍ර මූල්‍ය ණය ජාවාරම තුළ ඇත්තේ රාජපක්ෂ පාලනයේ කළු සල්ලි බව මුදල් අමාත්‍යවරයා පාර්ලිමේන්තුවේදී ප්‍රකාශ කර ඇත.
“ක්ෂුද්‍ර මූල්‍ය ණය දෙන ජාවාරම තුළ දුගී කාන්තාවන් නැති කරන ජාවාරම පිටුපස තිබෙන්නේ තිබෙන්නේ පසුගිය රජයේ කළු සල්ලි. මේ ව්‍යාපාරය කළු සල්ලි සුදු කිරීමේ ජාවාරමක් ලෙසයි ආරම්භ වුණේ.” යැයි මුදල් අමාත්‍යවරයා 05 සිකුරාදා පාර්ලිමේන්තුවේ දී පැවසීය.
සුනාමි ව්‍යසනය අවස්ථාවේ මෙරටට ලැබුණ පශ්චාත් සුනාමි ආධාර ක්ෂුද්‍ර මූල්‍ය අර්බුදයේ ආරම්භය බව ද මංගල සමරවීර ඇමැතිවරයා සඳහන් කළේය.
“පවුල් පාලනය කළ අය ක්ෂුද්‍ර මූල්‍ය ගැන කතා කිරීම දෛවයේ සරදමක්.සුනාමි ව්‍යසනයෙන් පසු රටට ගලාගෙන ආ අතිවිශාල ආධාරවලින් යම් කොටසක් විවිධ අය තම ගෙවල් වලට හරවා ගත්තා. මේ පශ්චාත් සුනමි ආධාර තමයි ක්ෂුද්‍ර මූල්‍ය අර්බුදයේ මුල.”
ක්ෂුද්‍ර මූල්‍ය ණය කපා හරින ණය නියාමන අධිකාරි පනතක් පාර්ලිමේන්තුවට ඉදිරිපත් කිරීමට බලාපොරොත්තු වන බව කී මුදල් අමාත්‍යවරයා ඒ හරහා පාරිභෝහිකයා ආරක්ෂා වන නියාමන රාමුව තුළ විධිමත් නීතිමය බලයක් ආරෝපණය කිරීමට බලාපොරොත්තු වන බව ද කියා සිටියේය.
අය වැයෙන් ක්ෂුද්‍ර මූල්‍ය ණය කපා හරිමින් ආර්ථික සංවර්ධනය තුළින් සංහිදියාව ඇති කිරීමට බලාපොරොත්තු වන බවද මුදල් අමාත්‍ය මංගල සමරවීර වැඩි දුරටත් ප්‍රකාශ කළේය.
Facebook Comments
