මෛත්‍රී රනිල් යහපාලන සමය තුලදී රජයේ ආරක්ෂක අංශ විසින් වධහිංසා කරන බවට පැමිණිලි ලැබී නැතැයි ශ්‍රී ලංකා මානව හිමිකම් කොමිසම ජිනීවා මානව හිමිකම් සමුළුවට දැනුම් දුන්නත් 2017 මුල් මාස 10 තුලදී පමණක් පැහැරගැනීම් 8 ක් සිදුවූ බව ඔවුන්ගේම වාර්තා වලින් හෙළිවී තිබේ.
යාපනයේ මාධ්‍යවේදිනී ශෝභිකා ස්මයිලිනී විසින් තොරතුරු දැනගැනීමේ පනත යටතේ කරන ලද විමසීමකින් එම තොරතුරු හෙළිදරව් කරගැනීමට හැකිවී ඇත.
මෙම තොරතුරු අප වෙත ලැබී ඇත්තේ වධබන්ධන නැවැත්වීමේ යාන්ත්‍රණයක් ස්ථාපනය කිරීමේ සැලසුම් සහිතව එක්සත් ජාතීන්ගේ ආයතනයක ඉහල පෙලේ නියෝජිත කණ්ඩායමක් පළමු වතාවට ශ්‍රී ලංකාවේ නිරීක්ෂණ කටයුතු ආරම්භ කරද්දී ය.
අප්‍රේල් දෙවැනිදා දිවයිනට ළඟාවූ ආචාර්ය වික්ටර් සහරියා ගේ නායකත්වයෙන් යුත් වධහිංසාව වැලැක්වීම සඳහා වන එජා අනුකමිටුවේ සිව් පුද්ගල නියෝජිත පිරිස ශ්‍රී ලංකාවේ දස දිනක් රැඳී සිටින බව මානව හිමිකම් පිලිබඳ එක්සත් ජාතීන්ගේ මහ කොමසාරිස් කාර්යාලය ජිනීවා නුවර සිට නිකුත් කළ නිවේදනයක දැක්වේ.
වධහිංසාවට එරෙහි එක්සත් ජාතීන්ගේ විකල්ප සම්මුතියට අනුකූලව දී ඇති පොරොන්දු ඉටු කිරීම සඳහා අනුගමනය කළ යුතු පියවර සම්බන්ධයෙන් ශ්‍රී ලංකාවට ආධාර හා උපදෙස් ලබාදීම සඳහා රජයේ නියෝජිතයන්, ශ්‍රී ලංකා මානව හිමිකම් කොමිසම සහ සිවිල් සමාජ නියෝජිතයන් සමග ඔවුන් සාකච්ඡා පැවැත්වීමට නියමිතය.
ඊට අමතරව පුද්ගලයන් රඳවා තබා ගෙන සිටින ස්ථාන බැලීමටද ඔවුන් යනු ඇත.
රට තුල වධහිංසාවට ගොදුරු වීම වලක්වා ලීම සඳහා පිහිටුවීමට නියමිත දේශීය යාන්ත්‍රණයේ වගකීම බාර දෙනු ඇත්තේ ශ්‍රී ලංකා මානව හිමිකම් කොමිසමට බව දැනගන්නට ලැබී ඇත.
ජනාධිපතිවරයා එම වැඩපිළිවෙලට අනුමැතිය ලබා දුන්නොත්, රැඳවුම් ස්ථාන වලට නොදන්වා ඇතුල්වී විමර්ශනය කිරීමේ නිල බලය හිමිවනු ඇත්තේ රටේ වධහිංසා සිදුවන බවට වාර්තා වී නැති බව පවසන ශ්‍රී ලංකා මානව හිමිකම් කොමිසමටයි.
Facebook Comments
