යුද්ධයෙන් පසුව ශ්‍රී ලංකාව තුළ සංහිඳියාව ඇති කිරීම සඳහා යහපාලන රජය එක්සත් ජාතීන් සමග හවුලේ ගිවිස ගත් එකඟතා වලින් ඉවත් වීමට ආණ්ඩුව තීරණය කර තිබේ.
යුද හමුදාපති ලුතිතන් ජෙනරල් ශවේන්ද්‍ර සිල්වා අමෙරිකාවට ඇතුළුවීම වැලැක්වීමට එරට රාජ්‍ය දෙපාර්තමේන්තුව ගත් තීරණය විවේචනයට ලක්කරමින් අග්‍රාමාත්‍යවරයා නිකුත් කළ නිවේදනයක මේ බව සඳහන් කර ඇත.
ඇමෙරිකාව විසින් පනවා ඇති තහංචි වල සාධාරණය කුමක් දැයි ජනතාව තීන්දු කළ යුතු බවද අගමැති මහින්ද රාජපක්ෂ නිකුත් කරන ලද නිවේදනයේ දැක්වේ.
එක්සත් ජාතීන්ගේ මානව හිමිකම් කවුන්සිලය තුළ ලංකාව සම්බන්ධ ගෙන එන ලද 30/1 යෝජනාවට යහපාලන රජය සම අනුග්‍රාහකත්වය දැක්වීම ඓතිහාසික පාවාදීම බව පවසන අගමැතිවරයා එක්සත් ජාතික පක්ෂය, දෙමළ ජාතික සන්ධානය හා ජනතා විමුක්ති පෙරමුණ ඊට වගකිව යුතු බව හා එම හේතුව නිසාවෙන් වෙනත් රටවලට මෙරට ආරක්‍ෂක හමුදා සාමාජිකයන් මානව හිමිකම් උල්ලංඝනය කළ පුද්ගලයන් හැටියට නම් කිරීමට අවකාශය ලැබුණ බවටද චෝදනා කර තිබේ.
“මේ යෝජනාවේ පළමු ක්‍රියාකාරී වගන්තියේම, 2015 සැප්තැම්බර් මස එක්සත් ජාතීන්ගේ මානව හිමිකම් කොමාසාරිස් කාර්යාලය විසින් ලංකාවේ සන්නද්ධ හමුදා මානව හිමිකම් උල්ලංඝනය කළ බවට චෝදනා කරමින් සම්පාදනය කර තිබූ වාර්තාව අගය කර තිබුණි. මෙකී වාර්තාව ඊට කළින්, 2011 දී එක්සත් ජාතීන්ගේ සංවිධානයේ මහලේකම්වරයා, එම ආයතනයේ සාමාන්‍ය ක්‍රියා පටිපාටියට පිටින් පත් කොට තිබු නිල නොවන ත්‍රි පුද්ගල කමිටුවක වාර්තාව මත පදනම්ව තිබුණි. ඒ ආකාරයට, යුද්ධය අවසන් වූ කාලයේ සිට අපේ ආරක්‍ෂක හමුදාවන්ට එරෙහිව නොයෙක් පාර්ශව විසින් එල්ල කළ සියලුම පදනම් විරහිත චෝදනා, එක්සත් ජාතික පක්ෂය-දෙමළ ජාතික සන්ධාන-ජනතා විමුක්ති පෙරමුණ යහපාලන හවුල පිළිගෙන ඇත.”
යුද හමුදාපතිවරයා සහ ඔහුගේ පවුල මත මධ්‍යතන යුරෝපයේ සාමූහික දඩුවම් සිහිගන්වන ආකාරයේ සාමූහික ගමන් තහංචියක් පනවා තිබුනද එය එවක යහපාලන රජයේ බලධාරින් හෙලා දැක නොමැති බවත් එක්සත් ජාතික පක්ෂයේ ලක්‍ෂමන් කිරිඇල්ල මන්ත්‍රීවරයා මෙම තහංචිය .ම රජයේ වගකීමක් යැයි කියා එයින් ගැලවීමට උත්සාහ දරන බවටයි අගමැතිවරයා චෝදනා කරන්නේ.
යුද හමුදාපතිවරයා සහ ඔහුගේ පවුලට එරෙහිව පනවා ඇති සාමුහික දඩුවම ගැන ඇතිවී තිබෙන කථිකාවෙන් මෙරටේ බෙදී පෙනෙන්නට ඇති බව පෙන්වා දෙන අගමැති මහින්ද රාජපක්ෂ රටේ දේශපාලන බෙදීම පවතින්නේ එක් පැත්තකින් රට ජාතිය ගැන හිතන දේශ මාමක බලවේගයත්, අනෙක් පැත්තෙන් රට පාවාදීමට අවස්ථාවක් එනතුරු බලා සිටින උපන් ගෙයි දේශද්‍රෝහීනුත් අතරත් බවයි වැඩි දුරටත් නිවේදනය කරන්නේ.
Facebook Comments
