අධිකරණය ඉදිරියේ චුදිත සමාගමක් හා එක්වී බන්ධනාගාර රැඳවියන් හට වෘත්තීය පුහුණුව ලබා දී සමාජ ගත කිරීමේ වැඩපිළිවෙලකට ආණ්ඩුව අත ගසා තිබේ.
අධිකරණ අමාත්‍යාංශය හා ඇවන්ට්ගාඩ් එක්ව ආරම්භ කර ඇති ව්‍යාපෘතිය යටතේ බන්ධනාගාර රැඳවියන් 5000 කට වෘත්තීය පුහුණුව ලබා දෙනු ලබන බවයි එම අමාත්‍යංශය නිවේදනය කරන්නේ.
ඇවන්ට්ගාඩ් සමාගමට මෙන්ම එහි හිමිකාර නිශ්ශංක සේනාධිපති හට නීති විරෝධි ලෙස අවි ගබඩාවක් පවත්වාගෙන යාමට එරෙහිව සහ තවත් චෝදනා රැසක් යටතේ අධිකරණය හමුවේ චෝදනා ගොනු කර ඇත.
බන්ධනාගාර මුලස්ථානයේදී 18 අඟහරුවාදා ආරම්භ කරන ලද ව්‍යාපෘතිය යටෙත් රැඳවියන්ට ඉංග්‍රීසි, ජර්මන්, ප්‍රංශ ඇතුළු ලෝකයේ විවිධ භාෂාවන් ප්‍රගුණ කර ඔවුන්ව විදේශ රැකියා අවස්ථා සඳහා යොමු කරවීම, කාර්මික පාඨමාලා සඳහා යොමු කරවීම සහ ස්‌වයං ව්‍යාපාර සඳහා මග පෙන්වීම වැනි කාර්යන් සිදු කිරීමට නියමිත බවයි අධිකරණ අමාත්‍යාංශය නිවේදනය කරන්නේ.
පසුගිය කාලයේ රිමාන්ඩ් බන්ධනාගාර ගතව සිටියදී රැඳවියන් ආශ්‍රිතව සිදුකළ ගවේෂණාත්මක තොරතුරු මත මෙසේ ඔවුන්ගේ සුභ සිද්ධිය උදෙසා මෙම ව්‍යාපෘතිය ආරම්භ කිරීමට තමා අදහස් කළ බව ඇවන්ට්ගාඩ් සමාගමේ සභාපති නිශ්ශංක සේනාධිපති ආරම්භක අවස්ථාවට එක්වෙමින් කියා තිබේ.
කාන්තා හා ළමා කටයුතු සහ සමාජ ආරක්ෂණ සෞඛ්‍ය දේශීය වෛද්‍ය ඇමතිනි පවිත්‍රා වන්නි ආරච්චි, සංචාරක රාජ්‍ය අමාත්‍ය අරුන්දික ප්‍රනාන්දු, බස්නාහිර පළාත් ආණ්ඩුකාර වෛද්‍ය සීතා අරඹේපොළ ,ආරක්ෂක ලේකම් විශ්‍රාමික මේජර් ජනරාල් කමල් ගුණරත්න, මාර්ෂල් ඔෆ් ද එයාර් පෝස් රොෂාන් ගුණතිලක, අද්මිරාල් ජයනාත් කොළඹගේ ඇතුළු බන්ධනාගාර රැඳවියන් ඇතුළු පිරිසක් ද එක් ව සිටියහ.
Facebook Comments
