මහින්ද රාජපක්ෂ පාලන සමයේදී මිග් යානා මිලදී ගැනීමේ ගනුදෙනුවට අයුතු ලෙස මැදිහත්වී ශ්‍රී ලංකා රජයට අලාභයක් සිදු කළ බවට චෝදනා ලබා සිටින රුසියාවේ හිටපු තානාපති උදයංග වීරතුංග පස් වසරකට පසුත් අධිකරණයට හරියාකාරව ඉදිරිපත් කර නැති වීම නිසා පොලිසිය අධිකරණයේ දෝෂ දර්ශනයට ලක්වී තිබේ.
එම මුල්‍ය ගනුදෙනුවේදී අමෙරිකානු ඩොලර් බිලියන 07 ක අලාභයක් ශ්‍රී ලංකා රජයට සිදු ව ඇති බව පැමිණිල්ලෙන් පෙන්වා දී ඇතත් අද දිනයේදී එම ගනුදෙනුවෙන් පොදු දේපළ පනත යටතේ ගැනෙන වැරදි කර ඇති බව පෙන්වා දීමට අත්‍යවශ්‍ය ලේඛනයක් වන සහකාර පොලිස් අධිකාරිවරයකු විසින් ඉදිරිපත් කළ යුතු සහතිකය අධිකරණයට ඉදිරිපත් කිරීමට අපරාධ පරීක්ෂණ දෙපාර්තමේන්තුව අපොහොසත්වීම ගැටලුවක් බව කොළඹ කොටුව මහේස්ත්‍රාත් රංග දිසානායක පවසා ඇත.
සැකකරු විසින් කර ඇති අලාභය රුපියල් 25,000 කට අධික බව සනාථ කළ හැකි සහතිකය හෝ අපරාධ පරීක්ෂණ දෙපාර්තමේන්තුව අධිකරණය වෙත ඉදිරිපත් කර නොමැති බැවින් සැකකරුට එරෙහිව පොදු දේපල පනත යටතේ ගැනෙන වැරදි සම්බන්ධයෙන් විමර්ශන කළ නොහැකි බැවින් සැකකරු ඇප මත මුදා හරින්නැයි ජනධිපති නීතිඥ අනිල් සිල්වා අධිකරණයෙන් කරන ලද ඉල්ලීම මහේස්ත්‍රාත්වරයා බැහැර කළේය.
වසර 05 කට ආසන්න කාලයක් එම විමර්ශන කරනු ලැබුවේ සහ සැකකරුට වරෙන්තු නිකුත් කරනු ලැබුවේ පොදු දේපල පනත යටතේ ගැනෙන වැරදි සිදු කර ඇති බව අනාවරණය වීම නිසා බව පැවසු මහේස්ත්‍රාත්වරයා සැකකරු අත්අඩංගුවට ගෙන අධිකරණයට ඉදිරිපත් කරන විට පොදු දේපල පනත යටතේ ගැනෙන වැරදි නොමැතිවීම බලවත් ගැටලුවක් බව අධිකරණයට පෙන්වා දුන්නේය.
අපරාධ පරීක්ෂණ දෙපාර්තමේන්තුව විසින් පොදු දේපල සහතිකය ඉදිරිපත් නොකිරීම අසමාන්‍ය තත්ත්වයක් බව මෙන්ම පැමිණිල්ල විසින් හිතාමතාම එම සහතිකය අධිකරණයට ඉදිරිපත් නොකිරීමට උත්සහ දරන බව පෙනී යන බවද මහේස්ත්‍රාත් රංග දිසානායක කියා සිටියේය.
විමර්ශන නිලධාරීන් කටයුතු කරනුයේ සැකකරුට ඇප ලබාදීමට අවශ්‍ය සුදුසුකම් සපුරාලීමට හැකි ආකාරයෙන් බව අධිකරණයට නිරීක්ෂණයවී ඇති බවටද මහේස්ත්‍රාත්වරයා චෝදනා කළේය.
වසර 05 කට අධික කාලයක් පුරා එම සිද්ධිය සම්බන්ධයෙන් විමර්ශන කර අධිකරණයට කරුණු වාර්තා කළ ප්‍රධාන පොලිස් පරීක්ෂක නිහාල් ෆ්‍රැන්සිස් හා ජ්‍යෙෂ්ඨ පොලිස් අධිකාරි ටී. දයාරත්න යන නිලධාරීන් ඉදිරි විමර්ශන සඳහා යෙදවීමට පියවර ගන්නා ලෙසත් එලෙස නොකරන්නේ නම් ඒ කුමන හේතුවක් මත ද යන කරුණ සම්බන්ධයෙන් වහාම අධිකරණයට දැනුම් දෙන්නැයි මහේස්ත්‍රාත්වරයා වැඩබලන පොලිස්පතිවරයාට නියෝග කර ඇත.
තිපතිවරයා දුන් උපදෙස් පිළිපැදීමක් නොකරන්නේ නම් මින් මතු කිසිම නඩුවක් සම්බන්ධවෙන් නීතිපති උපදෙස් ලබා ගැනීමට අවශ්‍ය බවට තම අධිකරණයෙන් ඉල්ලීමක් නොකරන ලෙසට අවවාද කළ කොළඹ කොටුව මහේස්ත්‍රාත් රංග දිසානායක නීතිපතිවරයා ලබා දෙන උපදෙස් පිළිනොපැදීම පොලීසියේ අලුත්ම ප්‍රවණතාවය වී ඇති බවද කියා සිටියේය.
රුසියාවේ හිටපු තානාපති උදයංග වීරතුංගගේ ඇප ඉල්ලීම ප්‍රතික්ෂේප කළ මහේස්ත්‍රාත්වරයා ඔහුව ලබන 26 වැනි දා දක්වා තවදුරටත් රක්ෂිත බන්ධනාගාරගත කිරීමට නියෝග කළේය.
පස් අවුරුද්දක් අධිකරණය මඟ හැර මෙරටින් පිටව සිටි රුසියාවේ හිටපු තානාපති උදයංග වීරතුංග පෙබරවාරි 14 මෙරටට පැමිණි අවස්ථාවේදී කටුනායක ගුවන් තොටුපළේ දී අපරාධ පරීක්ෂණ දෙපාර්තමේන්තු නිලධාරීන් විසින් අත්අඩංගුවට ගනු ලැබීය.
Facebook Comments
