ලෝකයේ අඩුම කාලයක් පාසල් තුල ගත කරන දරුවන් සිටින්නේ ශ්‍රී ලංකාවේ බව අධ්‍යාපන අමාත්‍යවරයා ප්‍රකාශ කර තිබේ.
මෙරට දරුවන් පාසල් යනු ලබන්නේ දින 50ක් පමණ බවයි අමාත්‍ය ඩලස් අලහප්පෙරුම පෙන්වා දෙන්නේ.
වසරේ දින 365 ඇතුළත සති අන්තයන් හැරුණු විට පාසල් පැවැත්වෙන දින ගණන 200ක් බවත්, එම දිනයන්හි ද පාසල් පැවැත්වෙන්නේ දිනකට පැය හය බැගින් වන නිසා සම්පූර්ණ වසර පුරා දරුවන් පාසල තුළ ගත කරන නිල කාලය පැය 1200ක් පමණක් බවත් ඒ අනුව සලකා බලනවිට එය දින පනහක් පමණයි.
ලෝකයේ වෙනත් රටවලට සාපේක්ෂ ව එය ඉතා අඩු කාලයක් බව ද සඳහන් කරන අමාත්‍යවරයා, එසේ තිබිය දීත් ප්‍රාථමික ශ්‍රේණිවල සිට ම දරුවන්ගේ දැනුම විභාග මතින් පරීක්ෂා කිරීමට තවමත් අප යොමුව සිටීම වෙනස් විය යුතු තත්ත්වයක් බව මාතර දිස්ත්‍රික්කයේ අඩු ආදායම්ලාභී ජනතාව වෙත නිවාස ලබාදීම සඳහා මුල්ගල තැබීමේ උත්සව අවස්ථාවකට එක්වෙමින් කියා සිටියේය.
පින්ලන්තය වැනි ලෝකයේ අධ්‍යාපනය අතින් දියුණු රටවල ප්‍රාථමික පන්තිවල දී දරුවන්ගේ දැනුම මැන බලන්නේ ක්‍රියාකාරකම් හරහා බවද අමාත්‍ය ඩලස් අලහප්පෙරුම වැඩි දුරටත් සඳහන් කළේය.
කෙසේවෙතත්, වැඩි කාලයක් පාසලේ කල් ගත කරන දරුවන් සිටින්නේ කොයි රටවලදැයි අධ්‍යාපන අමාත්‍යවරයා පැහැදිලි කළේ නැත.
Facebook Comments
