‘සාමකාමී’ මැතිවරණයක අගමැතිටත් ඡන්ද නීති කැඩීමේ චෝදනා

මැතිවරණ දිනය තුළ වාර්තා වු ප්‍රචණ්ඩ ක්‍රියා වලින් භාගයකටත් වැඩි ප්‍රමාණයක් සිදු කළ බවට වාර්තා වී ඇති ශ්‍රී ලංකා පොදු ජන පෙරමුණේ නායකත්වය දරන අගමැති මහින්ද රාජපක්ෂටද ඡන්ද නීති කැඩීමේ චෝදනා එල්ල වී තිබේ.

සජිත් ප්‍රේමදාසගේ නායකත්වයෙන් යුත් සමගි ජන බලවේගය විසින් නිකුත් කර තිබෙන නිවේදනයක දැක්වෙන පරිදි කුරුණෑගල දිස්ත්‍රික් අපේක්ෂක මහින්ද රාජපක්ෂ නිකවැරටිය ප්‍රදේශයේ ඡන්ද මධ්‍යස්ථාන දෙකකට 200 ට වැඩි පිරිසක් සමග ඇතුලු වී තිබේ.

පසුව එම පිරිස කොබෙයිගනේ ප්‍රදේශයට පැමින තිබෙන අතර ඒ හේතුවෙන් මාර්ග පවා අවහිර වී ඇති බවට සමගි ජන බලවේගයේ නිත්‍ය නියෝජිත හිටපු ආණ්ඩුකාර රජිත් කීර්ති තෙන්නකෝන් චෝදනා කරයි.

මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානය (CMEV) පවසන්නේ ඡන්දය පැවැති අගෝස්තු මස 5 බදාදා දිනයේ ඡන්දය ආරම්භ වු පෙරවරු හතේ සිට පස්වරු පහ දක්වා පැය 10 ක කාලය තුළ මැතිවරණ ප්‍රචණ්ඩ ක්‍රියා 301 ක් තම සංවිධානය වෙත වාර්තා වී ඇති බවයි.

එම ප්‍රචණ්ඩ ක්‍රියා අතුරින් හරි අඩකටත් වඩා සිදු කර ඇත්තේ ශ්‍රී ලංකා පොදු ජන පෙරමුණයි. එය සංඛ්‍යාත්මකව 150 කි.

මැතිවරණ දිනයේ මැතිවරණ ප්‍රචණ්ඩ ක්‍රියා 34 ක් සිදු කරමින් සමගි ජන බලවේගය දෙවැනි තැනත් මැතිවරණ ප්‍රචණ්ඩ ක්‍රියා 17 ක් සිදු කරමින් එක්සත් ජාතික පක්ෂය මැතිවරණ ප්‍රචණ්ඩ ක්‍රියා අතර තෙවැනි තැනන් හිමිකරගෙන තිබේ.

වැඩිම මැතිවරණ ප්‍රචණ්ඩ ක්‍රියා ප්‍රමාණයක් වාර්තා වී ඇති දිස්ත්‍රික්කය මහනුවරයි. එම සංඛ්‍යාව 34 කි. කුරුණෑගල දිස්ත්‍රික්කයෙන් වාර්තා වී ඇති මැතිවරණ ප්‍රචණ්ඩ ක්‍රියා ප්‍රමාණය 23 කි.

දිනය තුළ වාර්තා වු මැතිවරණ ප්‍රචණ්ඩ ක්‍රියා 301 අතර පහර දීම් 3ක් තැතිගැන්වීම්/ බලපෑම් කිරීම් 57 ක් තිබෙන බව මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානය (CMEV) වැඩි දුරටත් පවසයි.

ශ්‍රී ලංකා මැතිවරණ කොමිසම පවසන්නේ අගෝස්තු 5 බදාදා දිනයේ උදෑසන 6 සිට උදෑසන 11 දක්වා කාලය තුළ මැතිවරණ නීති උල්ලඝනය කිරීම් 421 ක් ජාතික මැතිවරණ පැමිනිලි කළමනාකරණ මධ්‍යස්ථානය හා දිස්ත්‍රික් මැතිවරණ පැමිනිලි කළමණාකරණ මධ්‍යස්ථාන වෙත ලැබී ඇති බවයි.

 

එමෙන්ම උදෑසන 11.00 සිට පස්වරු 02.00 දක්වා කාලය තුළ මැතිවරණ නීති උල්ලඝනය කිරීම් 337 ක් ලැබී ඇති බව ශ්‍රී ලංකා මැතිවරණ කොමිසම වැඩි දුරටත් නිවේදනය කර තිබේ.

කෙසේ වෙතත්, මැතිවරණ කොමිසමේ ප්‍රධානියා පවසන පරිදි මැතිවරණය අවලංගු කිරීමට තරම් ඡන්ද නීති උල්ලංඝන සිදුවී නැත.

2020 පාර්ලිමේන්තු මහා මැතිවරණයේ ඡන්දය ප්‍රකාශ කිරීම දිවයින පුරා ඡන්ද මධ්‍යස්ථාන 12,885 ක සිදු කෙරුනි.

ඒ සදහා ලියාපදිංචි ඡන්ද දායකයන් 16,263,885 පිරිසක් මෙවර ඡන්දය ප්‍රකාශ කිරීම සඳහා සුදුසුකම් ලබා තිබු බව ශ්‍රී ලංකා මැතිවරණ කොමිසම පවසයි.

එම කොමිසමේ සභාපති මහින්ද දේශප්‍රිය පවසන්නේ සමස්ත දිවයිනේ ම ඡන්දදායකයන්ගෙන් සියයට 71 ක ප්‍රතිශතයක් අද දිනයේ ඡන්දය ප්‍රකාශ කර ඇති බවයි.

සභාපතිවරයා ඒ බව සඳහන් කළේ ඡන්ද වීමසීම නිමාවීමෙන් පසු මැතිවරණ කොමිෂන් සභාවේ අගෝස්තු 5 බදාදා පස්වරුවේ පැවැති විශේෂ මාධ්‍ය හමුවේදීය.

වැඩිම ඡන්ද දායක සහභාගිත්වය හම්බන්තොට සහ මඩකලපුව දිස්ත්‍රික්කයන්ගෙන් 76% වාර්තා විය. අඩුම පිරිසක් ඡන්දය භාවිත කර ඇත්තේ පුත්තලම 64% දිස්ත්‍රික්කයෙනි.

ශ්‍රී ලංකාවේ 09 වැනි පාර්ලිමේන්තුවට මන්ත්‍රීවරුන් 225 දෙනෙකු තෝරා පත්කර ගැනීම සඳහා දිස්ත්‍රික්ක 22 සඳහා පිළිගත් දේශපාලන පක්ෂ 20 කින් සහ ස්වාධීන කණ්ඩායම් 34 කින් අපේක්ෂකයන් 7452 දෙනෙකු මෙවර මැතිවරණයට ඉදිරිපත් වී තිබුනි.

මහ මැතිවරණයේ පළමු ඡන්ද ප්‍රතිඵලය අගෝස්තු 6 බ්‍රහස්පතින්දා පස්වරු 2.30 පමණ වනවිට නිකුත් කිරීමට හැකි වෙතැයි මැතිවරණ කොමිෂන් සභාවේ සභාපති මහින්ද දේශප්‍රිය බලාපොරොත්තු පළ කර තිබේ.

මැතිවරණ නිරීක්ෂණ සංවිධාන පවසන්නේ මෙවර මැතිවරණයෙහි බරපතල ගණයේ සිදුවීම් අවම අතර සමස්තයක් ලෙස ගත් කළ මැතිවරණය සාමකාමී බවයි.

අලුත් පාර්ලිමේන්තුව අගෝස්තු 20 රැස්වීමට ජනාධිපති ගෝඨාභය රාජපක්ෂ දින නියම කර තිබේ.