වෛද්‍ය සිසුන්ට ඇප : ප්‍රහාරයට එරෙහිව වර්ජන සහ විරෝධතා

0
ඡායා - සස්සඳ ලියනාරච්චි

අධිකරණ නියෝග උල්ලංඝණය කිරීමේ චෝදනාව මත අත්අඩංගුවට ගැණුනු වෛද්‍ය පීඨ ශිෂ්‍ය ක්‍රියාකාරී කමිටුවේ සිසුන් විසි එක්දෙනා ඊයේ (02) රාත්‍රියේ කොළඹ කොටුව මහේස්ත්‍රාත්වරයා හමුවට ඉදිරිපත් කිරීමෙන් අනතුරුව ඇපමත මුදාහැර ඇත.

මාලඹේ සයිටම් පෞද්ගලික වෛද්‍ය විද්‍යාලයට එරෙහිව වෛද්‍ය පීඨ ශිෂ්‍ය ක්‍රියාකාරී කමිටුව ඊයේ කොළඹදී විරෝධතා පා ගමනක නිරත වුයේ, එම විරෝධතා පා ගමන සම්බන්ධයෙන් කොටුව පොලිසිය අධිකරණ නියෝගයක් නිකුත් කර තිබියදීය.

විරෝධතා පා ගමනේ නිරත වූ සිසුන් පොලිස් මාර්ග බාධක බිඳ ජනාධිපති ලේකම් කාර්යාලය දෙසට ගමන් කිරීමට උත්සහ කිරීමේ දී පොලිසිය කඳුළු ගෑස් සහ ජල ප්‍රහාරයක්ද එල්ල කළ විරෝධතාවයේ නිරත වු සිසුන් 21 දෙනෙක් පොලිසි අත්අඩංගුවට පත්විය.

ඡායා – ළහිරු හර්ෂණ

රජයේ වෛද්‍ය වර්ජනයක්

වෛද්‍ය සිසුන්ට කරන ලද පහරදීමට සහ අත්අඩංගුවට ගැනීමට විරෝධය පළ කිරීම සඳහා අද උදෑසන වෘත්තීය සමිති ක්‍රියාමාර්ගයකට එළැඹෙන බව රජයේ වෛද්‍ය නිලධාරීන්ගේ සංගමය ප්‍රකාශ කළේය.

උදෑසන 8.00 සිට මධ්‍යහ්න 12 දක්වා පැය හතරක් සේවයෙන් ඉවත්ව වෘත්තීය ක්‍රියාමාර්ගයක නිරත වන බව රජයේ වෛද්‍ය නිලධාරීන්ගේ සංගමය නිවේදනයක් නිකුත් කරමින් කියා සිටී.

විරුද්ධ මත ප්‍රකාශ කිරීම සහ උද්ඝෝෂණ පැවැත්වීම ප්‍රජාතන්ත්‍රවාදයේ මුලික ලක්ෂණයක් බව පෙන්වාදෙන රජයේ වෛද්‍ය නිලධාරීන්ගේ සංගමය අහිංසක නිරායුධ ශිෂ්‍ය ශිෂ්‍යාවන් පිරිසකගේ උද්ඝෝෂණයට පහරදෙනවා වෙනුවට කළයුතුව තිබුණේ ඔවුන්ගේ ගැටලුව විමසා එයට පිළිතුරු සැපයීම බවද එම නිවේදනය මඟින් වැඩිදුරටත් පෙන්වා දෙයි.

අධ්‍යාපනය විකිණීමේ සැලසුමක්

සයිටම් ආයතනය නීතිගත කිරීමට විරෝධය පළ කරමින් අන්තර් විශ්වවිද්‍යාල ශිෂ්‍ය බලමණ්ඩලය සහ වෛද්‍ය ශිෂ්‍ය සංගමය ඒකාබද්ධව ඊයේ(02) දිනයේ පැවැත්වූ විරෝධතාවට පොලීසිය විසින් සිදු කළ පහරදීම දැඩි පිළිකුලෙන් යුතුව හෙළා දකින බව ලංකා ගුරු සංගමය පවසයි.

ආණ්ඩුව සහ විපක්ෂය එකතු වී සැලසුම් සහගතව මාලඹේ සයිටම් ආයතනය නීත්‍යානුකූල කිරීමට කටයුතු කරමින් සිටින අතර සයිටම් ආයතනයේ වෛද්‍ය උපාධිය පිළිගැනීමට අධිකරණය වෛද්‍ය සභාවට නියෝග කළේ අදාළ පෙත්සම් විභාගයේදී වගඋත්තරකරුවන් වූ රජයේ පාර්ශවය ජනතා මතය නියෝජනය නොකර සයිටම් ආයතනය නීත්‍යානුකූල කෙරන ආකාරයෙන් කරුණු දැක්වීම නිසා බවටයි නිවේදනයක් නිකුත් කරමින් ගුරු සංගමය චෝදනා කරන්නේ.

ජනතා අභිලාෂයන් ඉටු කිරීමට පොරොන්දු දෙමින් බලයට පැමිණි වර්තමාන රජය විපක්ෂය සමග කරට අත දා ගනිමින් අධ්‍යාපනය විකිණීමේ සැලසුම් ක්‍රීයාත්මක කරමින් සිටින බවට චෝදනා කරන ලංකා ගුරු සංගමය අධ්‍යාපනය පිළිබඳ පාර්ලිමේන්තු ආංශික කමිටු මඟින් මාලඹේ සයිටම් ආයතනය පිළිගැනීමටත්, සෞඛ්‍ය ඇමති රාජිත සේනාරත්න විසින් මාළඹේ සයිටම් පෞද්ගලික වෛද්‍ය උපාධි ආයතනය සාධාරණීකරණය කිරීමත් මඟින් යහපාලන රජය නිදහස් අධ්‍යාපන විකුණා දැමීමට කටයුතු කර ඇති බව මනාව පැහැදිලි වන බවයි පෙන්වා දෙන්නේ.

අධ්‍යාපනය විකිණීමට එරෙහිව කටයුතු කරන ශිෂ්‍ය ව්‍යාපාරය ඇතුළු සියලූ බලවේගවලට කොන්දේසි විරහිතව සහාය පළ කර බව සහ මාලඹේ සයිටම් ආයතනය නීත්‍යානුකූල කිරීම, එම ආයතනයේ වෛද්‍ය උපාධිය පිළිගැනීම ඇතුළු අධ්‍යාපනය විකුණා දමා නිදහස් අධ්‍යාපනය වලපල්ලට ඇද දැමීමේ සියලූ උත්සාහයන්ට එරෙහි වන බව අවධාරණය කරන ලංකා ගුරු සංගමය සයිටම් ආයතනය නීත්‍යානුකූල කිරීමට එරෙහි විරෝධතාවලට එක්වන ලෙස සමස්ත ගුරු ප‍්‍රජාවෙන්ම ඉල්ලීමක්ද කර සිටී.

Facebook Comments

wedding people