දුම්කොළ පාලනය සම්බන්ධයෙන් ගෙන යන ප‍්‍රතිපත්ති සහ නීතිරීතිවලට බලපෑම් කිරීමට දරන සියලූම ප‍්‍රයත්නයන්ට එරෙහිව එක්ව නැගී සිටිය යුතු බව ශ්‍රී ලංකා ජනාධිපති මෛත්‍රිපාල සිරිසේන අවධාරණය කරයි.
ඉන්දියාවේ නොයිඩා හි ජාත්‍යන්තර සම්මන්ත‍්‍රණ ශාලාවේදී සඳුදා (07) ආරම්භ කෙරුණු
දුම්කොළ භාවිතය පාලනය සම්බන්ධයෙන් ලෝක සෞඛ්‍ය සංවිධානය විසින් සංවිධානය කළ විශේෂ සමුළුවේ ප‍්‍රධාන දේශනය සිදු කරමින් ජනාධිපතිවරයා මේ බව ප්‍රකාශ කළේය.
සිය දේශනය පවත්වමින් ජනාධිපතිවරයා වැඩිදුරටත් අවධාරණය කළේ දුම්කොළ කර්මාන්තයේ කිසිදු බලපෑමකට අවනත නොවිය යුතු බවයි.
ශ්‍රී ලංකාවේ මෙහෙයුම
එසේම දුම්කොළ කර්මාන්තය නිතරම ප‍්‍රතිපත්ති සම්පාදකයින්ට බලපෑම් කිරීමටත්, රජයේ නීති අභියෝගයට ලක් කිරීමටත් උත්සාහ දරන බව පෙන්වා දුන් ජනදිපතිවරයා තමා සෞඛ්‍ය අමාත්‍යවරයා ලෙස දුම්කොළ පාලනය පිළිබඳ නව නීති රීති ගෙන ඒමට සුදානම් වෙද්දී තමාට මුහුණදීමට සිදුවූ අමිහිරි අත් දැකීම් ද සිහිපත් කළේය.
2015 දී ජනාධිපති ධූරයට පත්වූ දා සිට දුම්කොළ සහ මධ්‍යසාර පාලනය තම න්‍යාය පත‍්‍රයේ ඉහළින්ම තිබෙන බව පැවසූ ජනාධිපතිතුමා මත්ද්‍රව්‍ය හා හානිකර ඖෂධ පාලනය කිරීමට විශේෂ ජනාධිපති කාර්ය සාධන බලකායක් ද පත් කිරීමට තමා කටයුතු කළ බවත් එහි ප‍්‍රගතිය පෞද්ගලිකවම අධීක්ෂණය කරමින් සිටින බවත් ශ්‍රී ලංකා ජනාධිපතිවරයා ප්‍රකාශ කළේය.
දුම්කොළ පාලනයට ශ්‍රී ලංකා ජනාධිපතිවරයා ගෙන යන සුවිශේෂි වැඩපිළිවෙළ අගය කරමින් එම ප‍්‍රධාන දේශනය සඳහා ලෝක සෞඛ්‍ය සංවිධානයෙන් ජනාධිපතිවරයා ට ඇරයුම් ලැබී තිබේ.
ලෝක සෞඛ්‍ය සංවිධානයේ දුම්කොළ සහ දුම්වැටි පාලනය පිළිබඳ ප‍්‍රඥප්තියට අත්සන් තැබු ලෝකයේ රටවල් 186 ක් නියෝජනය කරමින් නියෝජිතයින් 1800 ක වැඩි පිරිසක් මෙම සමුළුවට එක්ව සිටියහ.
ඉන්දීය ජනපති හමුව
මෙම දෙදින ඉන්දීය නිල සංචාරයේ දී ජනාධිපති මෛත්‍රීපාල සිරිසේන සහ ඉන්දීය ජනාධිපති ප්‍රනාබ් මුඛර්ජි අතර නිල හමුවක් ද පැවැත්විණි
(Radio gagana)
Facebook Comments
