ආරක්ෂක මාණ්ඩලික ප්‍රධානි අත්අඩංගුවට ගෙන අධිකරණයට ඉදිරිපත් කිරීමට දුන් නියෝගය ක්‍රියාත්මක නොකිරිම සම්බන්ධයෙන් කොළඹ කොටුව මහේස්ත්‍රාත් අපරාධ පරීක්ෂණ දෙපාර්තමේන්තුවට දොස් නඟා තිබේ.
සාක්ෂි තිබියදීත් ඔහු අත්අඩංගුවට නොගන්නේ ඇයි දැයි නඩුව කැඳවු අවස්ථාවේදී විනිසුරුවරයා අපරාධ පරීක්ෂණ දෙපාර්තමේන්තුවෙන් ප්‍රශ්න කර ඇති අතර ඔහු අත්අඩංගුවට නොගන්නා ලෙසට දේශපාලන බලපෑම් ඇති බව රහස් පොලිසියට අධිකරයණයට දන්වා ඇත.
කෙසේ වෙතත් මීළඟ නඩු දිනයට පෙර ආරක්ෂක මාණ්ඩලික ප්‍රධානී රියර් අද්මිරාල් රවීන්ද්‍ර විජේගුණරත්න අත්අඩංගුවට ගෙන අධිකරණයට ඉදිරිපත් කරන ලෙසට කොළඹ කොටුව මහේස්ත්‍රාත් රංග දිසානායක 2 සිකුරාදා නැවත වරක් රහස් පොලිසියට නියෝග කළේය.
ආරක්ෂක මාණ්ඩලික ප්‍රධානි අද්මිරාල් රවි විජේගුණරත්න අත්අඩංගුවට ගෙන අධිකරණය හමුවට පැමිණ වීමට කොළඹ කොටුව හිටපු මහේස්ත්‍රාත් ලංකා ජයරත්න රහස් පොලිසියට ලබා දී තිබු අවසරය මත ඔහු අපරාධ දෙපාර්තුමේන්තුවට කැඳවීමක් කළද ආරක්ෂක මාණ්ඩලික ප්‍රධානි රහස් පොලිසියට ප්‍රකාශයක් ලබා නොදී රටින් පිට විය.
එම අවස්ථාවේදී ආරක්ෂක මාණ්ඩලික ප්‍රධානියා අත්අඩංගුවට ගැනිමේ සුදානමක් හෝ අවශ්‍යතාවයක් නැතැයි රජයේ ප්‍රවෘත්ති අධ්‍යක්ෂවරයා අධිකරණ නියෝගයට හරස් වෙමින් නිවේදනයක්ද නිකුත් කළේය.
මෙම නඩුව ඔක්තෝම්බර් මස 19 වනදා කැඳවු අවස්ථාවේදී ආරක්ෂක මාණ්ඩලික ප්‍රධානි අත්අඩංගුවට ගැනීමට ප්‍රමාණවත් කරුණු ඇති බවත් ඔහුව ඉදිරි සතිය තුළදී අපරාධ පරීක්ෂණ දෙපාර්තමේන්තුවට කැඳවීමට අවශ්‍ය ලිපි සකස් කර ඇති බවත් රහස් පොලිසිය අධිකරණයට දැනුම් දුනි.
පුද්ගලයන් 11 දෙනකු පැහැර ගෙන ගොස් අතුරුදහන් කරවීමේ නඩුවට අදාළ වරෙන්තු ලබා සිටි සැකකාර ලුතිනන් කොමදෝරු චන්දන ප්‍රසාද් හෙට්ටිආරච්චිට දෑවුරුද්දකට වැඩි කාලයක් යුක්තිය මගහැර අධිකරණයෙන් වසං වී සිටීමට ආරක්ෂක මාණ්ඩලික ප්‍රධානී අද්මිරාල් රවින්ද්‍ර විජේගුණරත්න අනුබල දුන් බවට රහස් පොලිසියට වාර්තා කර ඇත.
ජනපති සිරිසේනගේ මැදිහත්වීම
ආරක්ෂ මාණ්ඩලික ප්‍රධානී අද්මිරාල් රවින්ද්‍ර විජේගුණරත්න හට එල්ල වී ඇති චෝදනා වලින් ඔහුව ආරක්ෂා කරමින් සිටිනුයේ ජනාධිපති මෛත්‍රීපාල සිරිසේන බවට යහපාලන රජය බිහි කිරිමට උර දුන් සිවිල් සංවිධාන කිහිපයක්ම චෝදනා කරයි.
ජනාධිපතිවරයා විසින් ආරක්ෂක මාණ්ඩලික ප්‍රධානියා අත්අඩංගුවට නොගන්නැයි පොලිසියේ ඉහළ නිලධාරින්ට නියෝග කරන ලද බව නම හෙළි නොකල අපරාධ පරීක්ෂණ දෙපාර්තමේන්තුවේ උසස් නිලධාරියකු උපුටා දක්වමින් ප්‍රජාතන්ත්‍රවාදය සඳහා මාධ්‍යවේදියෝ (JDS) වාර්තා කර තිබුණි.
“මාණ්ඩලික ප්‍රධානියාව අත්අඩංගුවට නොගෙන ඉන්නේ අපේ නොහැකියාවකට නෙමෙයි. ජනාධිපතිතුමා සැර පරුෂ විදිහට කතා කරලා අපේ ඉහළ නිලධාරින්ට කියලා තියනවා අද්මිරාල් විජේගුණරත්නව මොනම හේතුවකටවත් අත්අඩංගුවට ගන්නත් එපා, සීඅයිඩියට කැඳවලා ප්‍රකාශ ගන්නත් එපාය කියලා,”යි සිය අනන්‍යතාවය හෙළිදරව් නොකරන්නැයි ඉල්ලා සිටිමින් එම නිලධාරියා පැවසු බව JDS වාර්තා කර ඇත.
Facebook Comments
