ජනාධිපතිවරයාගේ ඉල්ලීම පරිදි මහින්ද රාජපක්ෂට එරෙහිව ඉදිරිපත් කළ අලුත් විශ්වාස භංග යෝජනාව සම්මත වු බව කතානායකවරයා පාර්ලිමේන්තුවට දැනුම් දුන්නේය.
නව සංශෝධිත යෝජනාව 16 සිකුරාදා පාර්ලිමේන්තුවට ඉදිරිපත් වීමට පෙර කතානායක අසුනේ හිඳ ගත් අරුන්දික ප්‍රනාන්දු මන්ත්‍රීවරයා තවත් මහින්ද රාජපක්ෂගේ නායත්වයෙන් යුතු මන්ත්‍රී කණ්ඩායමක් සමඟ එක්ව විරෝධතාවයක නිරත වනු දක්නට ලැබුණි.
කෙසේ වෙතත් පොලිස් නිලධාරීන්ගේ ආරක්ෂාව මැද සභාවට පැමිණි කතානායක කරූ ජයසුරිය පහර දීම් මැද මහින්ද රාජපක්ෂට එරෙහි විශ්වාස භංග යෝජනාවට ජන්දය විමසීය.
සභාවට පැමිණි කතානායකවරයාට පොත් පත් සහ විවිධ ද්‍රව්‍ය වලින් ඒකාබද්ධ විපක්ෂ මන්ත්‍රීවරුන් පහර දෙනු දක්නට ලැබුණ බවයි අප වාර්තාකරු පවසන්නේ.
දැඩි පොලිස් රැකවල් මැද සභාවේ කටයුතු මෙහෙයවු කතානායකවරයා මහින්ද රාජපක්ෂ ප්‍රමුඛ කැබිනෙට්ටුවට විරුද්ධව යෝජනාව සම්මත වු බවත් පාර්ලිමේන්තුව නැවත 19 සඳුදා කැඳවන බව පවසමින් සභාවෙන් පිටව ගියේය.
සභාවෙන් පිටතට පැමිණි ජනතා විමුක්ති පෙරමුණේ විජිත හේරත් මන්ත්‍රීවරයා තමන්ට ප්‍රහාරයක් එල්ලවු බව සහ එක්සත් ජාතික පක්ෂයේ ගාමිණි ජයවික්‍රම මිරිස් කුඩු ප්‍රහාරයකට ලක්වු බව කියා සිටියේය.
“මට ගැහුවේ ආණ්ඩුක්‍රම ව්‍යවස්ථාවෙන් මගෙ තොල පැලුනා, ගාමිණි ජයවික්‍රම මන්ත්‍රීවරයට මිරිස් කුඩු දිය කරපු වතුර වලින් ගැහුවා.” යි මන්ත්‍රීවරයා පැවසීය.
කතානායකවරයා සභාවට පැමිණීමට පෙර ගුවන් හමුදාවට අයත් හෙලිකොප්ටර් යානයක් පාර්ලිමේන්තු භූමියට පැමිණි අතර සභාවේ කටයුතු අවසන් වීමෙන් පසුව එය පිටත්ව යනු දක්නට ලැබුණි.
සභා වාරයෙන් පසුව පහර කෑම් වලට සහ මිරිස් කුඩු ප්‍රහාරයන්ට ලක්වු පොලිස් නිලධාරින් සහ මන්ත්‍රීවරුන් පාර්ලිමේන්තු ආරෝග්‍ය ශාලාවේ ප්‍රතිකාර ලබා ගත් බවයි අප වාර්තාකරු පවසන්නේ.
මේ අතර කිසිඳු හේතුවක් නිසාවෙන් පාර්ලිමේන්තු සැසි වාර අවසන් නොකරන බව ජනපති මෛත්‍රීපාල සිරිසේන පැවසු බවට ජනාධිපති මාධ්‍ය ඒකකය නිවේදනය කළේය.
Facebook Comments
