යාපනයේ අතුරුදහන් වීම් ගැන හමුදාවට පොලිසියට මැතිසබේ චෝදනා

යාපනයේ වයස්ගත, ප්‍රසිද්ධ ව්‍යාපාරිකයන් හදිසියේ අතුරුදහන් වීම පිටුපස යුද හමුදාවේ සැඟවුනු හස්තයන් ක්‍රියාත්මක වන බවට පාර්ලිමේන්තුවේදී චෝදනා නැගී තිබේ.

උතුරේ දෙමළ ජනතා නායකයකු ජුනි 18 වැනිදා එම චෝදනාව එල්ල කළේ යාපනයේ අතුරුදහන් වු ව්‍යාපාරිකයන් දෙදෙනකු ඇතුළු තිදෙනකුගේ තොරතුරුද පාර්ලිමේන්තුව හමුවේ ගෙන හැර දක්වමිනි.

ඉලංගෙයි තමිල් අරසු කච්චි (ITAK) නායක සිවඥානම් ශ්‍රීධරන් මන්ත්‍රීවරයා පවසන පරිදි මෑතදීම අතුරුදහන් වී ඇති යාපනයේ වයස්ගත කෝටිපති ව්‍යාපාරිකයා රජයේ දේශමාන්‍ය සම්මානයකින්ද පිදුම් ලද්දෙකි.

“සිය ව්‍යාපාරය වෙනුවෙන් ශ්‍රී ලංකා රජය විසින් දේශමාන්‍ය සම්මානයෙන් පිදුම් ලැබූ යාපනය, පුංගුඩුතිව්, මඩත්තුවේලි ප්‍රදේශයේ ප්‍රසිද්ධ කෝටිපති ව්‍යාපාරිකයකු වන වෛත්‍යලිංගම් කනකලිංගම් වසය අවුරුදු 82 යි. 2024 මැයි මාසේ 12 වැනිදා දහවල් මඩත්තුවේලි හි පිහිටි ඔහුගේ නිවස ඉදිරිපිටදී හදිසියේම අතුරුදහන් වෙලා. අන් අයගේ උදව් නොමැතිව ඇවිදීමට හෝ වාහනයකට නැගීමට නොහැකි පුද්ගලයෙකු අතුරුදහන්ව ගොසින්. ”

සිවඥානම් ශ්‍රී ධරන් මන්ත්‍රීවරයා සදහන් කරන්නේ මීට මාස හයකට පෙර එම ප්‍රදේශයෙන්ම අතුරුදහන් වු කාන්තාවක් සම්බන්ධයෙන්ද මේතාක් කිසිදු තොරතුරක් දැන ගන්නට ලැබී නොමැති බවයි.

“යාපනයේ පුංගුඩුතිව් 9 ප්‍රදේශයේ පදිංචිව සිටි යෝගම්මා සෝබිනාදන් මීට මාස හයකට පෙර අභිරහස් ලෙස අතුරුදන් වෙලා. ඇය සිටින ස්ථානය තවමත් දන්නේ නෑ.”

මීට හත් වසරකට ඉහත දී අතුරුදහන් වු යාපනයේ ව්‍යාපාරිකයෙක් සම්බන්ධයෙන්ද පාර්ලිමේන්තුව දැනුවත් කළ දෙමළ ජනතා නියෝජිතයා අවධාරණය කර ඇත්තේ විවිධ ක්‍රම ඔස්සේ සොයා බැලුවද ඔහුට අත් වු ඉරණම ද සොයා ගැනීමට නොහැකි වු බවයි.

”2017 ජූලි 21 වැනි සිකුරාදා පස්වරු 2 ට මාසික වෛද්‍ය පරීක්‍ෂණයක් සඳහා යාපනය ශික්ෂණ රෝහලට ගිය අවස්ථාවේදී 63 හැවිරිදි සඩයාලි, කාරෙයිනගර්, ශිවන් කොයිලඩි ප්‍රදේශයේ උපන් ප්‍රසිද්ධ ව්‍යාපාරික වේළුපිල්ලේ නටරාසා අතුරුදන් වෙලා. පොලිස් පැමිණිලි, පුවත්පත් දැන්වීම්, සමාජ මාධ්‍ය ඇතුළු විවිධ මාර්ග ඔස්සේ වසර හතක් සෙව්වත් ප්‍රතිඵලයක් ලැබී නැහැ. ”

යාපනයේ නිරන්තරයෙන් සිදු වන පැහැර ගැනීම් සහ අත්අඩංගුවට ගැනීම් පසුපස හමුදාවේ සැඟවුණු අත් ක්‍රියාත්මක වන බව පවසන ශිවඥානම් ශ්‍රී ධරන් මන්ත්‍රීවරයා ඊට පොලීසියේ සහාය හිමිවන බවටත් පාර්ලිමේන්තුවේ දී චෝදනා කළේය.

“මේ තුන්දෙනා යාපන භූමියේ අතුරුදන් වෙලා තියෙනවා වගේම තවත් බොහෝ දෙනෙක් අතුරුදහන් වෙලා ඇති. ඔවුන් පිළිබඳ තොරතුරු දන්නේ නැ. තොරතුරු එළියට ආවේ නැහැ. නිරන්තරයෙන් පැහැර ගැනීම්, අත්අඩංගුවට ගැනීම් හෝ කඩු වලින් කැපීමේ සිද්ධි වලින් සමන්විත භුමියක් විදිහට යාපනය පත්වෙලා. මේ පිටුපස ඇත්තේ හමුදාවේ සැඟවුණු අත්. පොලිසියේ සහයෝගයත් තියනවා. මේවා පාලනය කිරීමට එයාලත් සුදාානම් නැ කියන එක තමයි මේවායින් කියවෙන්නේ.”