දේශපාලන සිරකරුවන් නිදහස් කිරීම ගැන අගමැති දෙමළ නායකයන් සමග සාකච්ඡා (VIDEO)

0

දශක ගණනාවක් තිස්සේ සිරගත කර සිටින දෙමළ දේශපාලන සිරකරුවන් නිදහස් කිරිම සඳහා අගමැතිවරයා දෙමළ දේශපාලන නායකත්වය කැඳවා විස්තර ලබාගෙන තිබේ.

දෙමළ දේශපාලන සිරකරුවන්ට නිදහස ලබා දීම සම්බන්ධයෙන් ජනාධිපතිවරයා සමග සාකච්ඡා කිරීමට අගමැති මහින්ද රාජපක්ෂ සහතික වු බවයි දෙමළ ජාතික සන්ධානයේ හිටපු පාර්ලිමේන්තු මන්ත්‍රී, ජනාධිපති නීතිඥ එම්.ඒ සුමන්තිරන් පවසන්නේ.

දේශපාලන සිරකරුවන් නිදහස් කිරීම සඳහා වන ඉල්ලීමට අගමැති මහින්ද රාජපක්ෂගෙන් සාධනීය ප්‍රතිචාරයක් ලැබුණු බව ඔහු හමුවීමෙන් අනතුරුව දෙමළ ජාතික සන්ධානයේ එම්.ඒ සුමන්තිරන් කියා සිටියේය.

“එතුමාගේ මතයත් අවුරුදු දහයක් පහලොවක් වැඩි කාලයක් ඉන්නවා නම් ඒක ගැන හොයලා බලන්න ඕන කියන මතයේ තමයි එතුමා ඉන්නේ. ඒ නිසා තමයි මට ආරාධනා කළේ විස්තර ලබා දෙන්න කියලා.”

ජනාධිපති නීතිඥ එම්.ඒ සුමන්තිරන් ඒ බව කියා සිටියේ දෙමළ දේශපාලන සිරකරුවන් නිදහස් කිරිම වෙනුවෙන් ඔවුන්ගේ සියලු විස්තර අගමැතිවරයා විසින් ලබා ගැනීමෙන් අනතුරුව ඒ සම්බන්ධයෙන් මාධ්‍ය වෙත අදහස් දක්වමිනි.

අගමැතිවරයා හා හිටපු මන්ත්‍රීවරයා මැයි 12 අගහරුවාදා හවස් කාලයේදී ඒ සම්බන්ධයෙන් සාකච්ඡා කර තිබුනි.

රාජපක්ෂ පාලනයේ කොටස් කරුවන් වන ඊලාම් ජනතා ප්‍රජාතාන්ත්‍රවාදි පක්ෂයේ (EPDP) නායක ඩග්ලස් දේවානන්දත් එදිනම අගමැතිවරයා හමුවී ඉල්ලා තිබුනේ උතුරේ දෙමළ සිරකරුවන් සම්බන්ධයෙන් රජයක් ලෙස සානුකම්පිත ක්‍රියාපිළිවෙතක් අනුගමනය කරන ලෙසයි.

දෙමළ දේශපාලන සිරකරුවන්ට නිදහස ලබා දීම සම්බන්ධයෙන් තමන්ටත් ජනපතිවරයා සමග සාකච්ජා කරන ලෙස අගමැතිවරයා විසින් සිදු කළ ඉල්ලීම මාධ්‍යවේදීන් හමුවේ අනාවරණය කළ සුමන්දිරන් මන්ත්‍රීවරයා එහිදී අවධාරණය කළේ අගමැතිවරයාට ලබාදුන් ලේඛනයේ වසර 30 ට අධික කාලයක් තිස්සේ සිරගතව සිටින පිරිස්ද සිටින බවයි.

“නම් දුන් ඒ ඉන්න අය අවුරුදු 10ට වැඩි කාලයක් සිරගත කරලා ඉන්න අය. සමහර අය අවුරුදු 30කට වැඩි කාලයක් ඉන්නවා. ඉතින් ඒක ගැන සලකා බලා කටයුතු කරන්න කියලා අපි ඉල්ලා සිටියා” හිටපු මන්ත්‍රීවරයා වැඩි දුරටත් සදහන් කළේය.

ජනාධිපති නීතිඥ එම්.ඒ සුමන්තිරන්ට අනුව මේ වන විට සිරගත කර සිටින දෙමළ දේශපාලන සිරකරුවන් ගණන 90 කි.

දෙමළ දේශපාලන සිරකරුවන් නිදහස් කර ගැනීම සඳහා සමග දෙමළ ජාතික සන්ධානය තමන්ගේ සහාය ලද රනිල් වික්‍රමසිංහ අගමැතිධුරය දැරු ආණ්ඩුව සමග අවස්ථා කිහිපයකදීම සාකච්ඡා කළත් එය පළ රහිත ක්‍රියාවක් විය.

ඉදිරියේදී නව පාර්ලිමේන්තුව තුළ කටයුතු කරන ආකාරය සහ ජනාධිපතිවරයාගේ ද අදහසක් වන නව ආණ්ඩුක්‍රම ව්‍යවස්ථාවක් සකස් කිරීම තුළ දෙමළ දේශපාලන ගැටලුවට විසඳුම් ලබා දෙන ආකාරය සම්බන්ධයෙන්ද අගමැතිවරයා සමග කතා කළ බව එම්.ඒ සුමන්තිරන් හිටපු මන්ත්‍රීවරයා සදහන් කළේය.

ආණ්ඩුවට හවුල් වීමට යෝජනා

වත්මන් ආණ්ඩුවට හවුල් වී දෙමළ ජනයාට සේවයක් කරන ලෙසට සිංහල මාධ්‍යවේදියකු කරන ලද යෝජනාවට දෙමළ ජාතික සන්ධාන මන්ත්‍රීවරයා විසින් පැහැදිලි කරන ලද්දේ ජනතාවට සේවය කිරීමට පෙර ජාතික ගැටලුවට විසඳුම් සෙවීම මුලික අරමුණ බවයි.

“අපි එස්ඩබ්ආර්ඩී බණ්ඩාරනායක මහත්තයා එක්ක අපේ නායකතුමා චෙල්වනායගම් ගිවිසුමක් අත්සන් කළා ඒක ඉරලා දැම්මා බණ්ඩාරනායක මහත්තයා. ඉන්පසු ඩඩ්ලි සේනානායක මහත්තයා එක්ක අත්සන් කළා ඒක නිසා තමයි අවුරුදු 3ක් ඒ ආණ්ඩුවේ හිටියේ ඒකත් මට ඉටු කරන්න බැහැ කියලා ඉරලා දැම්මා. ඒ නිසා අපි සහාය දෙන්නේ මේ රට විදියට යන්න හැම එක්කනාටම එකතුව ජිවත් වන්නට නව ආණ්ඩුක්‍රම ව්‍යවස්ථාවක් හදන්න ඕනේ බලය හරි ආකාරයට බෙදන්න ඕන කියන මතියේ අපි ඉන්නේ ඒක ඉටු කරාම අපි පසුව ආණ්ඩුවත් එක්ක එකතු වෙලා කටයුතු කරන්න සුදානම්. හැබැයි පලමුව ඒ ලොකු ප්‍රශ්නයට විසඳුමක් හොයන්න ඕනේ,” හිටපු මන්ත්‍රීවරයා වැඩි දුරටත් සදහන් කළේය.

Facebook Comments

wedding people