එක්සත් ජාතික පක්ෂය ප්‍රමුඛ යෝජිත නව සන්ධානයේ අවබෝධතා ගිවිසුමට අත්සන් තැබීම දිනය නියමයක් නොමැතිව කල් දමා තිබේ.
ඉදිරි ජනාධිපතිවරණය ඉලක්ක කර ගනිමින් එක්සත් ජාතික පක්ෂය තවත් පක්ෂ කිහිපයක් සමඟ සන්ධාන ගත වීමට තීරණය කර ඇති අතර අදාළ පක්ෂවල නායකයින්, ආසන සංවිධායකවරුන් සිවිල් සංවිධාන නියෝජිතයින් ඇතුළු පිරිසකගේ සහභාගීත්වයෙන් ඊට අදාළ අවබෝධතා ගිවිසුම අගෝස්තු 05 සඳුදා අත්සන් තැබීමට නියමිතව තිබිණි.
කෙසේ වෙතත් නව සන්ධානයේ ව්‍යවස්ථාවට එජාපයේ බහුතර පාර්ලිමේන්තු මන්ත්‍රීවරුන් හා එජාපයේ කෘත්‍යාධිකාරී මණ්ඩලයේ පිරිසක් සිය නොකැමැත්ත පළ කිරීම මත සන්ධානය පිහිටුවීම මෙසේ කල් දමා ඇති බවයි දේශපාලන ආරංචි මාර්ග පවසන්නේ.
ඒ අනුව 04 ඉරිදා එජාපයේ නියෝජ්‍ය නායක සජිත් ප්‍රේමදාස හා සභාපති කබීර් හෂීම් ඇමතිවරුන් සමඟ සාකච්ඡාවකින් පසුව අගමැති රනිල් වික්‍රමසිංහ ගිවිසුම් අත්සන් කිරීම කල් දමා ඇත.
මෙම සන්ධානය සමඟ එක්වීමට නියමිත සිටි බොහෝ පක්ෂ එජාපයේ ජනපති අපේක්ෂකත්වය මත ඇති තිබෙන ගැටුම නිරාකරණය කර ගන්නා තුරු ගිවිසුම් අත්සන් කිරීමට නොහැකි බව 03 සෙනසුරාදා අගමැතිවරයාට දන්වා තිබේ.
නව සන්ධානය රාජිත සේනාරත්න ඇමතිවරයාගේ පුත්‍ර චතුර සේනාරත්න මන්ත්‍රීවරයාට අයත් ‘ප්‍රජාතන්ත්‍රවාදී ජාතික පෙරමුණ’ යටතේ පිහිටුවීමට තීරණය කර තිබුනි.
Facebook Comments
