කොරෝනා වසංගතය මැඩලීමට රජය ගෙන ඇති පියවර ජාතීන් අතර අසමානතා තියුණු කිරීමට හේතුවී ඇති බවට චෝදනා කරන දහස් සංඛ්‍යාත ජනකායක් කොරෝනාබාධිතව මිය යන මුස්ලිම් ජාතිකයන්ගේ සිරුරු අනිවාර්යෙන් ආදාහනය කිරීමේ රජයේ ප්‍රතිපත්තිය වෙනස් කිරීමට මැදිහත් වන ලෙස ජනතා නියෝජිතවරියන්ගෙන් ඉල්ලා තිබේ.
සිංහල, දෙමල හා මුස්ලිම් කාන්තා බහුතරයක අත්සන් දෙදහසකට වැඩි ප්‍රමාණයකින් යුතුව සෞඛ්‍ය අමාත්‍යවරිය ඇතුළු අනෙකුත් පාර්ලිමේන්තු නියෝජිතවරියන් වෙත නොවැම්බර් 10 අඟහරුවාදා පෙත්සමක් යොමු කරමින් විමුක්ති ව්‍යාපාරය අවධාරණය කර ඇත්තේ අවිනිශ්චිතභාවයෙන් හා ජීවිත හානිවලින් පිරි ඇති මේ මොහොතේ, මුස්ලිම්වරුන් ප්‍රජාවක් ලෙසින් අමතර පීඩාවකට පත්ව ඇති ආකාරයයි.
“වසංගතය අප සියලුම දෙනාට එක ලෙස බලපාන්නේ නැත. ඒ නිසාම වසංගතය මැඩලීමට අදාළව රජය ගෙන ඇති පියවර විසින් දැනටමත් පවතින අසමානතා තවත් තීව්ර කර තිබේ. විශේෂයෙන් මෙම පියවර අසමානව බලපා ඇති එක් කණ්ඩායමක් වන්නේ අපගේ මුස්ලිම් සහෝදර සහෝදරියන්ය. ඔවුන් වෛරසයට ගොදුරු වේයැයි පමණක් නොව, ඒ හරහා ඔවුනගේ ජාතිය මත කොන් කරනු ඇතැයි බියෙන්ද පසුවෙන අතර එසේ වුවහොත් ඔවුනගේ වාර්ගික අයිතිවාසිකම් පවා අහිමි වේ යැයි බියට පත්ව සිටියි.” එම පෙත්සමේ ඉහලින්ම සදහන් කර තිබේ.
සිරුරු ආදාහනය කිරීම ඉස්ලාම් ආගමෙහි මුලික ඉගැන්වීමට පටහැනි භාවිතයක් බව සෞඛ්‍ය අමාත්‍ය පවිත්‍රා වන්නිආරච්චි ඇතුලු පාර්ලිමේන්තුවේ කාන්තා නියෝජනයට සිහි ගන්වන විමුක්ති ව්‍යාපාරය අවධාරණය කරන්නේ මළසිරුරු ආදාහනය කිරීම යනු ඉස්ලාම් දහමට අනුව වියෝ වූ තැනැත්තා හෝ තැනැත්තිය නිගාවට පත් කිරීමක් බවයි.
“එනම් ඔවුනගේ විශ්වාසයට අනුව ආත්මය හා ශරීරය මරණින් පසු සම්බන්ධ වී තිබෙයි.”
කොරෝනාබාධිතව මියයන්නන්ගේ අවසන් කටයුතු පිළිබදව රජයේ ප්‍රතිපත්තිය නිසා මුස්ලිම් ජනතාව පත්ව ඇති මානසික පීඩාව එම පෙත්සම මගින් පෙන්වා දී ඇත්තේ මෙලෙසිනි.
“අපගේ මුස්ලිම් සහෝදර සහෝදරියන්ගෙන් දැනගන්නට ලැබුනේ සිය රෝගී වී ඇති පිරිස් හා වැඩිහිටි පිරිස් බියට පත්ව ඇති බවයි. තමන් වෙනත් රෝගයකින් මිය ගියේ වුවද ඔවුනගේ අවසන් ආගමික හා සංස්කෘතික චාරිත්‍ර සිදු කරගැනීමට නොහැකි වේ යැයි ඔවුන් බියට පත්ව සිටිති.”
ආර්ථික පීඩා
මුස්ලිම් ප්‍රජාව සිය මළ සිරුරු රෙදිවලින් ඔතා වළලනු ලබන සම්ප්‍රදායක් ක්‍රියාත්මක කරන බැවින් මිනී පෙට්ටි මිලදී ගැනීමේ භාවිතයක් ඔවුනට නොමැති බව පෙන්වා දෙන පෙත්සම් කරුවන් තව දුරටත් අවධාරණය කර ඇත්තේ වසංගත තත්වය හමුවේ ජනතාව මූල්‍ය පීඩනයට මුහුණ දී සිටන මොහොතක කොවිඞ්-19 ට ගොදුරු ව මිය යන මුස්ලිම් පවුල්වලට දැන් රුපියල් දහස් ගණනක් වැය වන මිනී පෙට්ටි මිලදී ගැනීමේ අමතර දුෂ්කරතාද දරා ගැනීමට සිදු වී ඇති බවයි.
අවම වශයෙන් සෞඛ්‍ය උපදේශන පිළිපදිමින් පවා සිය ආදරණීයයන්ට ගෞරව දැක්වීමට නොහැකි අවස්ථාවක මුස්ලිම් ආගමික විශ්වාසයන්ට පටහැනිව, ක්‍රියාත්මක කරන භාවිතයක් නිසා ඔවුනට අත් වන අතිරේක මානසික වේදනාව ගැනත් පෙත්සම්කරුවන් ජනතා නියෝජිතයන්ගේ අවධානය යොමු කර තිබේ.
කොරෝනාබාධිතව මිය යන ඉස්ලාම් බැතිමතුන්ගේ අවසන් කටයුතු සිදු කරන ආකාරය පිළිබදව තීරණය කිරීමට පත් කර තිබෙන භූමිදානය පිළිබඳ කමිටු තීරණය කඩිනම් කරන ලෙසත්, දේශපාලන පක්ෂ පාතීකම් නොසලකා “අනිවාර්ය ආදාහනය” කිරීමේ අවශ්‍යතාවය ප්‍රශ්න කරන ලෙසත් පාර්ලිමේන්තුවේ සිටින සියලුම ජනතා නියෝජිතවරියන්ගෙන් පෙත්සම්කාර 2078 දෙනා ඉල්ලා සිටී.
“අප ඔබට ලියන්නේ අපගේ මුස්ලිම් සහෝදරියන් සහ සහෝදරයන් මත පැටවෙන අනවශ්‍ය දුක් වේදනා සහ බිය ඔබ විසින් අවසන් කරනු ඇතැයි යන අපේක්ෂාවෙනි.” එම පෙත්සමේ වැඩි දුරටත් සදහන්ව තිබේ.
Facebook Comments
