කොරෝනා වසංගත සමයේ රැකියාව නිම වී නිවසට පැමිණි විගස කළ යුතු දෑ සම්බන්ධයෙන් ලෝක සෞඛ්‍ය සංවිධානය උපදෙස් ලබා දී තිබේ.
ඒ අතර, රෝගාබාධ වලින් පෙලෙන්නන් වසංගතයෙන් බේරා ගැනීම සම්බන්ධයෙන් ජනාධිපති වරයා මුල්වී පැවති රැස්වීමකදී සාකච්ඡා වී තිබේ.
ලෝක සෞඛ්‍ය සංවිධානය විසින් නිදර්ශන ප්‍රසිද්ධ කර තිබෙන වීඩියෝවක දැක්වෙන වැඩපලේ සිට නිවසට ආ සැනින් අනුගමනය කළ යුතු උපදෙස් පහත පරිදිය.
01. ඔබේ අත් හොදින් සබන් සහ ජලයෙන් සෝදන්න,
02. ඇදුම් සහ සපත්තු/ සෙරෙප්පු ඉවත් කර හැකි නම් ඒවා පිටත තබන්න.නැවත ඒවා පැළදීමට පෙර සෝදන්න,
03. හැකි නම් බඩු බාහිරාදිය පිටතින් තබන්න.භාණ්ඩ නිවස තුළට ගෙන යන්නේ නම් සබන් හා වතුරෙන් සෝදා හරින්න. නැතහොත් ඇල්කොහොල් අඩංගු පිරිසිදුකාරකයකින් විෂබීජහරණය කරන්න.මෙය ඔබගේ ජංගම දුරකතනය, ඇස් කණ්නාඩි, අත් ඔරලෝසු සදහාද අදාළ වේ,
04. හැකි ඉක්මනින් ස්නානය කරන්න.
ජනපති උපදෙස්
මේ අතර බෝ නොවන රෝගවලින් පෙළෙන්නන් කෝවිඩ් ආසාදනයෙන් බේරා ගැනීම සඳහා ජනාධිපතිවරයාගේ විශේෂ අවධානය යොමු වු බව ජනාධිපති මාධ්‍ය ඒකකය පවසයි.
ඒ, නොවැම්බර් 11 බදාදා පෙරවරුවේ ජනාධිපති කාර්යාලයේදී කෝවිඩ් මර්දනයට අදාළ බලධාරීන් රැස් වූ අවස්ථාවේදීය.
කෝවිඩ් කාර්ය සාධක බලකාය නම් කණ්ඩායමක්ද එම සාකච්ඡාවට එක්වූ බව ජනාධිපති මාධ්‍ය ඒකකය නිවේදනය කළත් එහි සාමාජිකයන් කවුරුන්දැයි පැහැදිලි නැත.
හෘද, දියවැඩියා, වකුගඩු සහ පිළිකා ආශ්‍රිත රෝගීන් ඉතා වේගයෙන් කෝවිඩ් ආසාදනයට ලක්වෙමින් බොහෝ දෙනෙකු රෝග ලක්ෂණ නොපෙන්වා මරණයට පත් වීම සම්බන්ධයෙන්ද එම සාකච්ඡාවේදී අවධානයට ලක්ව තිබේ.
එහිදී අනාවරණය වී ඇත්තේ , එවැනි මරණ පිළිබඳව පසුව සිදු කරන PCR පරීක්ෂණවලදී ඔවුන් කෝවිඩ් අසාදිතයන් බවට තහවුරුවන බවයි.
එම තත්වය පිළිබඳව විශේෂ අවධානය යොමු කරමින් බෝ නොවන රෝගවලින් පෙළෙන්නන් ආරක්ෂා කර ගැනීමට සහ කෝවිඩ් ආසාදනයෙන් වැළකී සිටීමට අදාළ උපදෙස් දීම හා දැනුවත් කිරීම් වහා සිදු කරන ලෙස ජනාධිපතිවරයා කාර්ය සාධක බලකායට උපදෙස් දුන් බව ජනාධිපති මාධ්‍ය ඒකකය වැඩි දුරටත් සඳහන් කරයි.
Facebook Comments
