සාමය සහ සංහිඳියාවට එරෙහිව ඇති අභියෝග ජයගැනීමට සියලුදෙනා එක්විය යුතු බව ජනාධිපතිවරයා පවසයි.
සංහිඳියාව යනු ආධ්‍යාත්මික දර්ශනයක් බව පෙන්වා දෙන ජනාධිපති මෛත්‍රීපාල සිරිසේන අධ්‍යාත්මය සුවපත් නොවූ සමාජයක් තුළ එය ජයග‍්‍රහණය කරවීම අභියෝගකාරී වුව ද විවිධ ක්ෂේත‍්‍රයන් ඔස්සේ ඒ සඳහා උරදීම සියලුදෙනාගේ වගකීමක් බවට 27 අඟහරුවාදා ‘සංහිඳියාව හා සහජීවනය පිළිබඳ ජාතික ප‍්‍රතිපත්තිය’හා “තුන්දෙනෙක්” චිත්රපටය එළිදැක්වීමේ අවස්ථාවට එක් වෙමින් කියා සිටියේය.
සංහිඳියාව පිළිබඳ අවධාරණය කෙරෙන විස්තීර්ණ වූ ජාතික ප‍්‍රතිපත්තියක අවශ්‍යතාවය ඉටු කරමින් ජාතික සමගිය හා සංහිඳියා කාර්යාංශය විසින් මෙම ප‍්‍රතිපත්තිය සකස් කර තිබෙන අතර, මෙවැනි ප‍්‍රතිපත්තියක් එළිදැක්වෙන පළමු අවස්ථාව මෙය වේ.
දශක තුනක් තිස්සේ පැවති අවිගත් ගැටුම ද ඇතුළුව දිගුකාලීනව පැවති සමාජ හා දේශපාලන අසහනයෙන් ශ‍්‍රී ලංකාවේ සියලුම පුරවැසියන්ගේ ජීවිතවලට, ගරුත්වයට හා ආරක්ෂාවට සිදුවූ පීඩාව, හානිය හා විනාශය සැලකිල්ලට ගනිමින්, රජයේ පූර්ණ උත්සාහයෙන් හා පසුගිය සිද්ධීන් නැවත සිදු නොවන බවට සහතික කිරීම හා සංහිඳියාව සඳහා අනාගතවාදී මූලාරම්භයන් තුළින් යන දෙආකාර වූ එළඹුමක් සහිත බහු පාර්ශ්වකාරී කි‍්‍රයාවලියක් සඳහා කැඳවුම් කරමින්, ප‍්‍රජාතන්ත‍්‍රවාදය, යහපාලනය, භාෂාව හා සංස්කෘතික උරුමයට ඇති අයිතිය ද ඇතුළත්ව මානව හිමිකම්, නීතියේ ආධිපත්‍ය, ජාතික එක්සත් බව හා විවිධත්වය පිළිගන්නා ප‍්‍රජා සහජීවනය යන කරුණු මත මෙම සංහිඳියාව හා සහජීවනය පිළිබඳ ජාතික ප‍්‍රතිපත්තිය සකස් කර තිබේ.
“තුන්දෙනෙක්”
ප‍්‍රවීණ සිනමා අධ්‍යක්ෂවරුන් වන අශෝක හඳගම, ප‍්‍රසන්න විතානගේ සහ විමුක්ති ජයසුන්දර අධ්‍යක්ෂණය කරන ලද “තුන්දෙනෙක්” චිත‍්‍රපටයෙන් පිළිබිඹු කරනුයේ 30 වසරක් පැවති ජනවාර්ගික අරගලයෙන් පීඩාවට පත් මනුෂ්‍ය ජීවිතයේ ඛේදවාචකයයි.
චිත්රපටය කොටස් තුනකින් එකිනෙකට සම්බන්ධ කෙටිකථා තුනකින් සමන්විත වන අතර යුද්ධය නිසා ඇතිවූ බිහිසුණු අත්දැකීම් හේතුවෙන් අහිමිවූ දරුවන් සහ තම පවුල්වල සාමාජිකයින් සිහිකරමින් වර්තමානයේ ජීවත්ව සිටින්නවුන් තුළ ඇති වී ඇති බිය සහ වේදනාකාරී තත්ත්වය මෙම චිත‍්‍රපටයෙන් පිළිබිඹු වේ.
යුද්ධය පැවති කාලයේදී සහ ඉන්පසුව ඇතිවූ කම්පනයන්, තම පවුල්වල සාමාජිකයින් අහිමිවීමත්, ඒ හේතුවෙන් තම හදවත් තුළ දැවෙන වේදනාකාරී හැඟීම් හදකම්පාවන ආකාරයෙන් ඉදිරිපත් කර සමාජයට පණිවුඩයක් ලබාදීම සිදුකෙරෙන අතර, ශ‍්‍රී ලාංකික ජනතාව නිදහස සහ සාමානාත්මතාවයෙන් යුතුව ජීවත්වන රටක් ගොඩනැගීම මෙමගින් අපේක්ෂා කරන බවයි චිත්රපටය නිෂ්පාදනය කිරීමට දායක වු ජාතික සමගිය හා සංහිඳියා කාර්යාංශය පවසන්නේ.
අග‍්‍රාමාත්‍ය රනිල් වික‍්‍රමසිංහ, ජාතික සමගිය හා සංහිඳියා කාර්යාංශයේ සභාපතිනි හිටපු ජනාධිපතිනි චන්ද්‍රිකා බණ්ඩාරනායක කුමාරතුංග සහ රාජ්‍ය නිලධාරින්, විද්වතුන්, කලාකරුවන් ඇතුළු සම්භාවනීය ආරාධිත පිරිසක් මෙම අවස්ථාවට එක්ව සිටියහ.
Facebook Comments
