මහජන ආරක්ෂාව බාර ඇමැති සරත් වීරසේකර විසින් ගුරු වර්ජනය ත්‍රස්තවාදී ක්‍රියාවකට සමාන කිරීමෙන් අනතුරුව ගුරු වෘත්තීය සමිති නියමුවෙකුට මරණීය තර්ජන එල්ල වී තිබේ.
සමාජ මාධ්‍ය මගින් තමන්ට එල්ල කර ඇති මරණ තර්ජන ගැන මඩකලපුව පොලිසියට පැමිණිලි කළ බව ලංකා ගුරු සංගමයේ නැගෙනහිර පළාත් සම්බන්ධිකාරක හා මඩකලපුව දිස්ත්‍රික් ලේකම් පොන්නතුරෛ විජයරූපන් පවසයි.
“ඉන්දීය සාම සාධක හමුදාව මඩකලපුව දිස්ත්‍රිකයේ හමුදා මෙහෙයුම් කළ 1989 වකවානුවේ දී මරා දැමුණු වෘත්තීය සමිති නායකයකු වූ වන්නියසිංහම් ගැන මතක් කරලා “ෆේස් බුක් ෆ්‍රෙන්ඩ්ස්” කියලා එකකින් තමයි මේ තර්ජන එන්නේ” යැයි ලංකා ගුරු සංගමයේ නැගෙනහිර පළාත් වෘත්තීය සමිති නායකයා සැප්තැම්බර් 22 දා මාධ්‍ය හමුවක් පවත්වමින් සදහන් කළේය.
මෙම “ෆේස් බුක් ෆ්‍රෙන්ඩ්ස්” නම් සමාජ මාධ්‍ය සමුහය තුල ආණ්ඩුවේ හවුල්කාර පාර්ශවයක් වූ “තමිල් මක්කල් විඩුදලෛ පුලිහල්” පක්ෂයේ නායක සිවනේෂන් චන්ද්‍රකාන්තන් හෙවත් පිල්ලෙයාන් ගේ සේයා රුවක් ප්‍රදර්ශනය කෙරෙන බව විජයරූපන් පවසයි.
අධ්‍යාපන අමාත්‍යංශය යටතේ ඇති තමාගේ පෞද්ගලික ලිපි ගොනුවේ තිබෙන ඇතැම් ලියකියවිලි වල ඡායා පිටපත්ද සමාජ මාධ්‍ය ඔස්සේ හුවමාරු වන බවද පොන්නතුරෛ විජයරූපන් මාධ්‍ය හමුවේ සදහන් කළේය.
Facebook Comments
