උතුරු නැගෙනහිර ජන පීඩක ක්‍රියා සම්බන්ධයෙන් දෙමළ ලන්ඩන් වාසියකු නැගූ ප්‍රශ්නය මග හරිමින් ඔහු සමච්චලයට ලක් කිරීමට ශ්‍රී ලංකාවේ ජනාධිපතිවරයා කටයුතු කිරීම සමාජ මාධ්‍ය තුළ දැඩි විවේචනයට ලක්ව තිබේ.
“වර්ග සංහාරය, හමුදාකරණය, ඉඩම් කොල්ලය, බෞද්ධකරණය ආදී උතුරේ සිද්ධ වන දේ නවත්වන්න කරන්නේ කුමක්ද?” යි ආචාර්ය සොක්කලිංගම් යෝගලිංගම් නැගූ ප්‍රශ්නයට පිළිතුරු ලබා දීම ශ්‍රී ලංකාවේ ජනාධිපති රනිල් වික්‍රමසිංහ මග හැර තිබුනේ “ඉංග්‍රීසියෙන් කතා කරන්න බැරි නම් දෙමළෙන් කතා කරන්න, මට දෙමළ තේරෙනවා” යනුවෙන් පවසමිනි.
ආචාර්ය සොක්කලිංගම් යෝගලිංගම් ජනාධිපතිට ප්‍රති පිළිතුරු ලබා දී තිබුනේ “මගේ ඉංග්‍රීසි තේරෙන වෙනින් අය ඉන්නවා ඇති කියලා මම හිතනවා” යැයි කියමිනි.
පාර ජාතික දෙමළ ඊළම් ආණ්ඩුව (TGTE) නියෝජනය කරන යෝගී නමින් ප්‍රකට ආචාර්ය යෝගලිංගම් ජනපති රනිල් වික්‍රමසිංහගෙන් ප්‍රශ්න කර සිටියේ කොන්සර්වේටිව් පරිසර ජාලය විසින් ලන්ඩනයේ සංවිධානය කරන ලද රැස්වීමක දීය.
ලන්ඩනයේ සිදු වූ මෙම සිදුවීම ඩේලි මිරර් (Daily Mirror) ඉංග්‍රීසි පුවත්පත විසින් වාර්තා කර තිබුනේ ප්‍රංශයේ සිදු වුවක් ලෙසිනි.
මීට වසර කිහිපයකට පෙර රනිල් වික්‍රමසිංහට එරෙහිව විරෝධතාවක් පැවැත්වීම නිසා යෝගී අත්අඩංගුවට ද ගන්නා ලද්දෙකි.
“එය හඳුන්වන්නේ ප්‍රජාතන්ත්‍රවාදී ශ්‍රී ලංකා රජයක් ලෙසයි, එය මම විශ්වාස කරන්‍ නේ නෑ” යැයි ඔහු පැවසූ අවස්ථාවේදී ප්‍රශ්නයට පිළිතුරු දීම වෙනුවට ජනපති රනිල් ඔහු සමච්චලයට ලක් කළේය.
ඒ සමගම ජනාධිපති වික්‍රමසිංහ තමාට “දෙමළ භාෂාව තේරුම් ගත හැකි” බව ද වහාම පැවසීය.
රැස්වීමේ මුලසුන හ‍ෙබවූ ජර්මන් පාර්ලිමේන්තු මන්ත්‍රී තෝමස් හයිල්මාන් ආචාර්ය යෝගලිංගම් ග‍ේ කථාව අතරමගදී නැවැත්වීමට කටයුතු කළේය.
මෙම රැස්වීමට මොංගෝලියාවේ හිටපු ජනාධිපති එල්බ‍ජෝජ් සාකියා (Elbegdorj Tsakia) සහ හිටපු එක්සත් රාජධානියේ සංවර්ධන අමාත්‍ය විකී ෆ‍ෝඩ් (Vicky Ford) ද සහභාගී විය.
රනිල්ගේ ප්‍රතිචාරය ‘උඩඟු’ සහ ‘ජනාධිපතිවරයෙකුට නොගැලපෙන’ බව සමාජ මාධ්‍ය ක්‍රියාධාරීන් විසින් හෙළා දැක තිබේ. ‘රනිල්ට දෙමළ තේරෙනවා නම් දෙමළාගේ ප්‍රශ්නය නොතේරෙන්නේ ඇයි’ යනුවෙන්ද ඔවුන් ප්‍රශ්න කර ඇත.
මීට සති කිහිපයකට පෙරද රැස්වීමක් අතරතුරදී ශ්‍රී ලංකාවේ ජනාධිපතිවරයා පුරාවිද්‍යා අධ්‍යක්ෂ ජනරාල් මහාචාර්ය අනුර මනතුංග ගර්හාවට ලක් කර තිබුනේ ඉතිහාසය ඉගැන්නීමට ඉදිරිපත් වෙමිනි.
Facebook Comments
