තහවුරු නොකළ දුරකතන සාකච්ඡාවක් පදනම් කොට ගෙන බීබීසි සිංහල සේවය විසින් හත් අවුරුද්දක් එහි රාජකාරි කළ සිංහල නොවන එකම මාධ්‍යවේදියා ඊයේ රාත්‍රියේ කිසිඳු පරීක්ෂණයකින් තොරව වහාම සේවයෙන් පහ කොට තිබේ.
ගුවන් විදුලි ශිල්පයේ ප්‍රමුඛතම ජාත්‍යන්තර ආයතනයක් ලෙස සැලකෙන අති නවීන තාක්ෂණික මෙවලම් සහිත බ්‍රිතාන්‍ය ගුවන් විදුලි සේවය හෝ සංගීත් කළුබෝවිල ප්‍රධානත්වය දරන එහි සිංහල අංශය හෝ අසාම් අමීන් සේවයෙන් පහ කිරීමට හේතු වු බව පැවසෙන රන්ජන් රාමනායකගේ හඬ පටයේ සත්‍ය අසත්‍ය භාවය පරීක්ෂාවට ලක් කළේ දැයි පැහැදිලි නැත.
ලන්ඩනය මුලස්ථාන කොටගත් බීබීසී ආයතනය සිය ශ්‍රී ලාංකික වාර්තාකරු සේවයෙන් පහ කිරීම ගැන මේ තාක් නිල දැනුම් දීමක් කර නැත.
මේ පිළිබඳව කරුණු විමසීමට ලන්ඩන් නුවර සිටින බීබීසි සිංහල සේවයේ ප්‍රධානී සංගීත් කළුබෝවිල සිලෝන් නිවුස් විසින් දුරකතනයෙන් සම්බන්ධ කර ගත් අවස්ථාවේ පිළිතුරු දීම ප්‍රතික්ෂේප කළ ඔහු කියා සිටියේ ඒ පිළිබඳව බීබීසී පුවත් සේවයේ මාධ්‍ය අංශයෙන් විමසන ලෙසයි.
අසාම් අමීන් බීබීසිය විසින් අත්තෝනෝමතිකව සේවයෙන් පහ කිරීමට පෙර විනය පරීක්ෂණ පැවැත්වීම ඇතුලු කිසිදු නිසි ක්‍රමවේදයක් අනුගමනය නොකිරීම මාධ්‍ය නිරීක්ෂකයන්ගේ දැඩි අවධානයට යොමුව ඇත.
ශ්‍රී ලංකාවෙන් වාර්තා කිරීම සම්බන්ධ බීබීසී සිංහල සේවයට තිබු විශිෂ්ටතම මානව සම්පත ලෙස අසාම් අමීන් හඳුන්වා දෙන ප්‍රවීණ මාධ්‍ය විචාරක නාලක ගුණවර්ධන ඔහු ඉවත් කිරීමේදී අපක්ෂපාතී සහ සාධාරණ ලෙස කටයුතු කළේද යන්න විමසා තිබේ.
ඔහු ඒක පාර්ශවීය හා ඒකමතිකව ඉවත් කිරිම පිළිබඳ වාර්තා නිරවද්‍ය නම්, “නිසි ක්‍රමවේදය, සිද්ධියක සියලුම කෝණ විමසා බැලීම, සාධරණ සහ සමතුලිත වීම කොහිද?” යනුවෙන් නාලක ගුණවර්ධන ප්‍රශ්න කරයි.
“ඔහු හා රන්ජන් රාමනායක අතර සිදුවු සිංහලෙන් සිදුවන්නට ඇති කතා බහ පරිවර්තනය කරන ලද්දේ කවුද? ක්ෂණිකව ගන්න ලද එම තීන්දුවට අසාම් අමීන් විරෝධී පාර්ශවීය භාවයක් තිබුනේද? යන්න ඔහු ට්විටර් ඔස්සේ වැඩි දුරටත් විමසා ඇත.
අසාම් අමීන් මාධ්‍යවේදියා වහාම සේවයෙන් පහ කරන ලෙස බීබීසී අධ්‍යක්ෂ මණ්ඩලයට පැමිණිලි කොට ඇති බව ගෝඨාභය රාජපක්ෂ ජනාධිපතිවරයාගේ අනුග්‍රාහකත්වය සහිත වියත් මඟ සංවිධානයේ ජ්‍යෙෂ්ඨ කථිකාචාර්ය නීතිඥ රාජා ගුණරත්න ප්‍රවෘත්ති සාකච්ඡාවකදී සඳහන් කර තිබුනි.
පාර්ලිමේන්තු මන්ත්‍රී රංජන් රාමනායක සහ අසාම් අමීන් අතර සිදුවූ බව සඳහන් කරමින් ආණ්ඩු හිතෛෂී සහ සිංහල ජාතිකවාදී මාධ්‍ය ජාලවල තහවුරු නොකළ හඬ පටයක් පළ කිරීමෙන් අනතුරුව මාධ්‍යවේදියාට විරුද්ධ ද්වේශ සහගත ව්‍යාපාරයක් සමාජ මාධ්‍ය ඔස්සේ බහුලව ප්‍රචාරය විය.
අධිකරණයට බලපෑම් කිරීමේ චෝදනා නගා සිරගත කොට සිටින රිමාන්ඩ් භාරයේ සිට පාර්ලිමේන්තුවට පැමිණ සිටි රාමනායක මන්ත්‍රීවරයා එහිදී ප්‍රකාශ කර සිටියේ ප්‍රසිද්ධියට පත්ව ඇති හඬපට අතර විකෘති කරන ලද ඒවාද තිබෙන බවයි.
අසාම් අමීන් සම්බන්ධ කරගැනීමට අප ගත් උත්සාහය සාර්ථක වූයේ නැත.
Facebook Comments
