යුද්ධයෙන් පීඩාවට පත්වුවන්ට වන්දි ගෙවීමට පිහිටවු හානි පුර්ණ කාර්යාලයේ කොමසාරිස් ධුරයකට විශ්‍රාමික හමුදා නිලධාරියකු පත් කර තිබේ.
ශ්‍රී ලංකාව විසින් දේශීය වශයෙන් නිර්මාණය කර ක්‍රියාත්මක කරන සංහිදියා යාන්ත්‍රණයේ දෙවැනි පියවර වන මෙම කාර්යාලය කොමසාරිස්වරුන් පත් කිරීමත් සමඟ බලාත්මක වු බව 04 බ්‍රහස්පතින්දා සංහිදියා යාන්ත්‍රණ පිළිබද සම්බන්ධීකරණ ලේකම් කාර්යාලයේ මහ ලේකම් මනෝ තිත්තවැල්ල නිවේදනයක් නිකුත් කරමින් කියා සිටියේය.
ආණ්ඩුක්‍රම ව්‍යවස්ථා සභාවේ නිර්දේශ මත ජනාධිපති මෛත්‍රීපාල සිරිසේන විසින් අප්‍රේල් පළමුවන දින සිට ක්‍රියාත්මක වන පරිදි එම කාර්යාලය සඳහා වන සාමාජිකයින් පත් කරනු ලැබ ඇත.
හානිපූර්ණය සදහා වන කාර්යාලයේ සභාපතිනිය ලෙස ධාරා විජයතිලක පත් කර තිබෙන අතර සෙසු සාමාජිකයින් ලෙස විශ්‍රාමික ලුතිනන් කර්නල් ඩබ්ලිව්.ඩබ්ලිව්. රත්නප්‍රියබන්දු, ජයන්ත මුතතම්බි ස්වාමිනාදන්, සෙල්ලතම්බි සුමිත්‍රා සහ ඒ.ඒ.එම් ෆදීහු කටයුතු කරනු ලබයි.
අතුරුදහන් වුවන්ගේ කාර්යාලය සඳහා හමුදා නිලධාරිනියක් පත් කරනු ලැබු අවස්ථාවේදී අතුරුදහන් වුවන්ගේ ඥාතීන්ගෙන් විරෝධය එල්ල වු අතර එසේ තිබිය දී යුද පීඩිතයන්ට වන්දි ලබා දෙන කාර්යාලයට ද හමුදා නිලධාරියකු පත් කිරිම පීඩිතයන්ගේ විරෝධය නොසලකා හැරිමකි.
සංහිඳියා යාන්ත්‍රණය සඳහා වන දෙවැනි කාර්යාලය ජනාධිපතිවරයා විසින් පිහිටුවා ඇත්තේ එවැනි ආයතන ප්‍රසිද්ධිය හෙලා දැක දින කිහිපයකට පසුවය.
තමන් විසින්ම ගැසට් නිවේදනයක් මඟින් ස්ථාපනය කරන ලද අතුරුදහන් වූ තැනැත්තන් පිළිබඳ කාර්යාලය (OMP) “ජාත්‍යන්තර එල්ටීටීඊ ජාලයට” සේවය කරන බවට ජනාධිපතිවරයා විසින් හෙලා දැක තිබුණි.
“සත්‍ය ගවේෂණ කොමිෂන්, අතුරුදහන් වූවන්ගේ කොමිෂන්, මේ සියල්ල ජාත්‍යන්තරය හරහා පැමිණ තිබෙන්නේ අපිට සේවය කරන්නට නෙවෙයි මුහුදෙන් එගොඩ සිටින එල්ටීටීඊ සංවිධානවල තවමත් ක්‍රියාත්මක වන ජාත්‍යන්තර එල්ටීටීඊ ජාලයට සේවය කරන්නයි,” යනුවෙන් ජනාධිපති මෛත්‍රිපාල සිරිසේන ප්‍රකාශ කර සිටියේය.
Facebook Comments
