ජාත්‍යන්තර හා දේශියව නැගෙන විරෝධතා නොතකා හැර ඇති ජනාධිපතිවරයා හතලිස් වසරක් තිස්සේ නවතා දමා තිබු මරණීය දණ්ඩනය ක්‍රියාත්මක කිරීමට සිය අනුමැතිය ලබා දී තිබේ.
මරණ දඬුවම ක්‍රියාත්මක කිරිමේ පළමු පියවර ලෙස මත්ද්‍රව්‍ය ජාවාරමට වැරදිකරුවන් වු සිව් දෙනකු එල්ලා මැරීමට සිය අනුමැතිය ලබා දුන් බව ජනපති මෛත්‍රීපාල සිරිසේන 26 බදාදා මාධ්‍ය ආයතන ප්‍රධානින් හමුවේ පැවසීය.
කෙසේ වෙතත් මරණ දඬුවම ක්‍රියාත්මක කරන දිනය ජනාධිපතිවරයා ප්‍රකාශයට පත් කර නැත.
ශ්‍රී ලංකා මානව හිමිකම් කොමිසම, ශ්‍රී ලංකාවේ යුරෝපා සංගමය සහ ප්‍රබල තානාපති කාර්යාල කිහිපයක්ම මරණ දණ්ඩනය ක්‍රියාත්මක කිරීමට ගත් තීරණය ආපසු හරවන ලෙසට පසුගිය වසරේ ජුලි මාසයේදී ජනාධිපතිවරයාගේ ලිඛිතව ඉල්ලා තිබුනි.
දේශපාලන මකබාස්ලාගේ 19
මේ අතර තම සිතැඟි පිරිදි ව්‍යවස්ථා විරෝධි ලෙස ආණ්ඩු වෙනස් කිරීමට ජනාධිපතිවරයා දරන ලද උත්සාහයට හරස් වු 19 වැනි ව්‍යවස්ථා සංශෝධනය හෙතෙම විසින් දැඩි දෝෂ දර්ශනයට ලක් කර ඇත.
19 වැනි ව්‍යවස්ථා සංශෝධනය කෙටුම්පත් කරන ලද පිරිස් ජනාධිපතිවරයා හඳුන්වා දෙනු ලැබුවේ “දේශපාලන මකබාස්ලා” ලෙසයි.
“එක්සත් ජාතික පෙරමුණ විසින් ඉදිරිපත් කළ සංශෝධනයේ බොහෝ කරුණු ශ්‍රේෂ්ඨාධිකරණය ප්‍රතික්ෂේප කළා. ජනපතිවරයාගේ බලතල පිළිබඳව පාර්ලිමේන්තුවේ තුනෙන් දෙකක බලයෙන් කළ හැකි දේ ශ්‍රේෂ්ඨාධිකරණය පෙන්වා දුන්නා. ඒ තුළ 19 කෙටුම්පත් කළ අය බලාපොරොත්තු වුණ දේ සම්පූර්ණයෙන්ම අසාර්ථක වුණා. 19 කෙටුම්පත් කරපු අය නීතිවිශාරදයෝද එහෙම නැන්තම් දේශපාලන මකබාස්ලද කියන එකයි මට තිබෙන ප්‍රශ්නය. ඒ තරම්ම 19 අසාර්ථකයි.”
“ජනපතිවරයාට බලතල කොටසක් ඉතිරිවුණා ශ්‍රේෂ්ඨාධිකරණයෙන්. අගමැති හා පාර්ලිමේන්තුවට තවත් කොටසක් ගියා ස්වාධීන කොමිෂන් සභාත් එක්ක. කොමිෂන් සභාත් අදවන විට බලාපොරොත්තු වුන දේ සිදුවෙලා නෑ. ස්වාධීන කොමිෂන් සභා ගැන රෙගුලාසි සම්මත වී නෑ.ඒක නිසා තමයි මානව හිමිකම් කොමිෂන් සභාව අපිට වාර්තා කරන්නේ නැතිව ජිනීවා වලට වාර්තා කළේ.”
“මුළු මහත් ප්‍රජාතන්ත්‍රවාදී සමාජයක් ගොඩ නඟන්න, සාධාරණ සමාජ ක්‍රමයක් ඇති කිරීම සඳහා විධායක ජනාධිපති ක්‍රමය අහෝසි කිරීම සඳහා මා විසින් කළ හැකි කළ යුතු සියලු කැප කිරීම් මම කරනවා,” යැයි ජනාධිපතිවරයා 2015 දී අපවත් වු මාඳුළුවාවේ සෝභිත හිමියන්ගේ ආදාහන උත්සවයේදී කියා තිබුනි.
වත්මන් දේශපාලන අස්ථාවරත්වයට හේතුව 19 වැනි ව්‍යවස්ථාව සංශෝධනය බවට චෝදනා කළ ජනපති මෛත්‍රීපාල සිරිසේන ඉදිරි ජනාධිපතිවරයට පෙර හෝ පසුව බලයට පත්වන පිරිස විසින් එම සංශෝධනය අහෝසි කළ යුතු බව ද කිය සිටියේය.
“19 රටට සාපයක්. ආණ්ඩුක්‍රම ව්‍යවස්ථා හදලා නැති බකපණ්ඩිතයෝ මේක හැදුවා. 19 සම්පූර්ණයෙන්ම NGO අවශ්‍යතාවක්,” යැයි විධායක ජනාධිපති ධුරය අහෝසි කරන බවට සපත කරමින් බලයට පත්වු ජනපති වැඩි දුරටත් පැවසීය.
දේශපාලන නාට්‍යයක්
පාස්කු ඉරිදා ප්‍රහාර පිළිබඳව සොයා බැලීමට පත් කරන ලද පාර්ලිමේන්තු තේරීම් කාරක සභාව තනිකරම දේශපාලන නාට්‍යයක් බවට චෝදනා කරන ලද ජනපති ජනාධිපතිවරයා ලෙස තමා ගෙන්වීමේ හැකියාවක් තෝරිම් කාරක සභාවට නැති බව කියා සිටියේය.
“මා පත්කළ පරීක්ෂණ මණ්ඩලයේ වාර්තාව ඕන කෙනෙක් පිළිගන්නවා. අපරාධ පරීක්ෂණ දෙපාර්තමේන්තුවේ පරීක්ෂණ ලෝකයේ ඕන කෙනෙක් පිළිගන්නවා. මේ තේරීම් කාරක සභාව මොකක්ද. අරලිය ගහ මන්දිරයේ නිශ්පාදනය කරලා අධ්‍යක්ෂණය කරලා පාර්ලිමේන්තුවේදී පෙන්වනවා.” යි ජනාධිපතිවරයා චෝදනා කළේය.
Facebook Comments
