ශ්‍රී ලංකා පොදුජන පෙරමුණේ ජනපති අපේක්ෂකයා ලෙස නම් කර ඇති ගෝඨාභය රාජපක්ෂ ශ්‍රී ලාංකික පුරවැසියෙක් නොවන බැවින්, ඔහුගේ ද්විත්ව පුරවැසි සහතිකය තහනම් කරන ලෙස ඉල්ලා අභියාචනාධිකරණයට පෙත්සමක් ගොනු කර තිබේ.
සිවිල් සමාජ ක්‍රියාකාරීන් දෙදෙනෙකු වන මහාචාර්ය චන්ද්‍රගුප්ත තේනුවර සහ සාහිත්‍යවේදී ගාමිණී වියන්ගොඩ විසින් 27 සිකුරාදා මෙම පෙත්සම ගොනු කර ඇත.
මෙම පෙත්සමට අදාළව නොතීසි නිකුත් කිරීම සදහා 30 සදුදා විවෘත අධිකරණයේ කැදවන ලෙස පෙත්සම්කරුවන්ගේ නීතිඥවරුන් අභියාචනාධිකරණයෙන් ඉල්ලීමක්ද කර තිබේ.
මෙම පෙත්සම්කරුවන් විසින්ම කළ පැමිණිල්ලකට අදාලව කොළඹ මහේත්‍රාත් අධිකරණයේ ගෝඨාභය රාජපක්ෂගේ ද්විත්ව පුරවැසිභාවය සම්බන්ධයෙන් ගොනු කර ඇති නඩුවකට අදාලව අපරාධ පරීක්ෂණ දෙපාර්තමේන්තුව විසින් ගොනු කරන ලද ‘බී’ වාර්තා අභියාචනාධිකරණයේ මෙම පෙත්සම ගොනු කිරීමේදී අමුණා ඇති අතර, එකී ‘බී’ වාර්තා මගින් හෙළිවන කරුණු අනුව ගෝඨාභය රාජපක්ෂට ද්විත්ව පුරවැසිභාවය ලබා දීමට අදාළව ලිපිගොනුවක් ආරක්ෂක අමාත්‍යාංශයේ හෝ ආගමන විගමන දෙපාර්තමේන්තුවේ නැති බවත්, එසේම ඔහුගේ පුරවැසිභාවය සම්බන්ධ වාර්තා සොරකම් කර ඇති බවත් තමන් විශ්වාස කරන බවද පෙත්සමෙන් පෙන්වා දී ඇත.
පුරවැසි පණතේ 19 වන වගන්තිය ප්‍රකාරව ගෝඨාභය රාජපක්ෂ ද්විත්ව පුරවැසිභාවය සදහා නිසි අයදුම්පතක් ඉදිරිපත් කර නොමැති බවට චෝදනා කරන පෙත්සම්කරුවන් එබැවින් ඔහුට ඇතැයි කියන ඊනියා ද්විත්ව පුරවැසි සහතිකය වංචනික හෝ අවලංගු සහ බලශුන්‍ය වන බැවින් එම සහතිකයේ නීත්‍යානුකූල වලංගුභාවයක් හෝ බලපෑමක් නොමැති බව ද කියා සිටී.
ගෝඨාභය රාජපක්ෂ ඉදිරි ජනපතිවරණයට ඉදිරිපත් වීමට ඇප මුදල් තැන්පත් කර ඇති බවට දැනගන්නට ලැබී ඇති බවත් ඔහු නිත්‍යානුකූල ශ්‍රී ලාංකික පුරවැසියෙකු නොවන්නේ නම්, හෙතෙම ජනාධිපතිවරණයට ඉදිරිපත් වීමෙන් රටේ පුරවසියන්ට, ජාතික ආරක්ෂාවට, භෞමික අඛණ්ඩතාවයට, ස්වෛරීභාවයට ආපසු හැරවිය නොහැකි බරපතල හානියක් සිදුවිය හැකි බව ද අවධාරණය කර ඇත.
එබැවින්, අභියාචනාධිකරණයෙන් අතුරු සහනයක් ඉල්ලා සිටින පෙත්සම්කරුවන් ගෝඨාබය රාජපක්ෂ හට ඇතැයි කියන ඊනියා ද්විත්ව පුරවැසි සහතිකය, ජාතික හැදුනුම් පත සහ විදේශ ගමන් බලපත්‍රය අත් හිටුවන ලෙසත්, ඔහු ශ්‍රී ලාංකික පුරවැසියෙකු යන පදනම මත පිහිටා ක්‍රියා කිරීමට ඔහුට හෝ ඔහුගේ නියෝජිතයන්ට, සේවකයන්ට ක්‍රියා කිරීම වළක්වන අතුරු නියෝගයක් නඩුවේ අවසාන තීන්දුව ලබා දෙන තෙක් නිකුත් කරන ලෙසත් ඉල්ලා තිබේ.
Facebook Comments
