ශ්රී ලංකා නිදහස් පක්ෂයේ ඉලක්කය වන්නේ වත්මන් ආණ්ඩුක‍්‍රම ව්‍යවස්ථාව තුළ ඉදිරියේ දී බලතල නැති ජනාධිපතිවරයෙක් පත් කර ගැනීමට වඩා බලතල ඇති ආණ්ඩුවක් පත් කර ගැනීම සඳහා පාර්ලිමේන්තු බලය ඇල්ලීම බව ජනාධිපතිවරයා ප්‍රකාශ කර තිබේ.
නව පෙරමුණු ආණ්ඩුවක් තුළ එම ඉලක්කය ජය ගැනීමට සැලසුම්සහගතව කටයුතු කරන බව අවධාරණය කළ ජනාධිපති මෛත්‍රීපාල සිරිසේන දූෂිත ප‍්‍රභූ පංතියේ එකතුව විසින් විනාශ කර දමා තිබෙන රට නව මගකට යොමු කරමින් දූෂණයෙන් වංචාවෙන් තොර ප‍්‍රජාතන්ත‍්‍රවාදී නිදහස් සමාජයක් සහ කිසිදු විදේශ බලවේගයකට ගැති නොවන රටක් ගොඩනැඟීමට නව ආණ්ඩුවෙන් කටයුතු කරන බව ද කියා සිටියේය.
වත්මන් ආණ්ඩුව තුළ අද පවතින ගැටුම අග‍්‍රාමාත්‍යවරයා හා තමා අතර පවතින පුද්ගලික ගැටුමක් නොව දූෂණයට සහ වංචාවට විරුද්ධව තිබෙන ගැටුමක් මෙන්ම අන්ත දූෂිත නව ලිබරල්වාදී දේශපාලන ප‍්‍රතිපත්තියක් සහ ජනතාවාදී දේශපාලන ප‍්‍රතිපත්තිය අතර තිබෙන ගැටුමක් බව ජනාධිපතිවරයා 29 ඉරිදා පැවති කුරුණෑගල දිස්ත්‍රික් ශ්රී ලංකා නිදහස් පක්ෂ සම්මේලනය අමතමින් සඳහන් ක‍ළේය.
රනිල් වික්‍රම සිංහ අගමැති ධුරයෙන් ඉවත් කර එම තනතුරු මහින්ද රාජපක්ෂ හට ලබා දීමට තමා කටයුතු කළ ද, ඔවුන් භාරගත් කාර්යය නිසි ලෙස ඉටුකර ගැනීමට ඔවුන්ට නොහැකිවීම තමාගේ ගැටලුවක් නොවන බව කී ජනාධිපතිවරයා මහින්ද රාජපක්ෂ විපක්ෂ නායක ධූරයේ කටයුතු කරන්නේ ද, පොදුජන පෙරමුණේ මන්ත්‍රීවරු පාර්ලිමේන්තුවේ රැඳී සිටින්නේ ද එක්සත් ජනතා නිදහස් සන්ධානයේ මහලේකම්වරයා කථානායකවරයා වෙත ලබාදී ඇති ලිපියෙන් බව ද සිහිපත් කර දුන්නේය.
ශ්‍රිලනිප, පොහොට්ටු සන්ධානය
ඉදිරි ජනාධිපතිවරණයේදී ශ්රී ලංකා නිදහස් පක්ෂයේ ප‍්‍රතිපත්තියට දර්ශනයට හානිවන හෝ පාක්ෂිකයින්ට අනාගතයක් අහිමිවන කිසිදු වැඩ පිළිවෙළකට එළැඹීමට සූදානම් නොමැති බව ද ජනපති අවධාරණය කර ඇත.
පොදුජන පෙරමුණ සමග ශ්රී ලංකා නිදහස් පක්ෂය සන්ධානගත වන්නේ, පොදු ලකුණකින් ජනාධිපතිවරණයට ඉදිරිපත්විය යුතු බවට වූ තම පක්ෂය විසින් කරන ලද යෝජනාවට එකඟවන්නේ නම් පමණක් බව ද ජනාධිපති මෛත්‍රීපාල සිරිසේන තිබේ.
ශ්රී ලංකා නිදහස් පක්ෂය දුර්වල වී ඇති බවට කවුරුන් කෙසේ කීව ද මීළඟ ජනාධිපතිවරයා පත්වන්නේ ශ්රී ලංකා නිදහස් පක්ෂයේ තීරණය අනුව බව කිසිවෙකු අමතක නොකළ යුතු බව ද ජනාධිපතිවරයා වැඩි දුරටත් කියා සිටියේය.
Facebook Comments
