ජාතිවාදී බලවේග විසින් සංහිඳියා ක්‍රියාදාමය “පීලි පැන්නවීමට” ගෙන යන නිශේධනීය පණිවුඩ වලට එරෙහිව සටන් වැදීමට සන්නිවේදන ක්‍රියා මාර්ග දියත් කිරිමේ වැඩසටහනක අවශ්‍යතාවය වටහා ගෙන ඇති බව ශ්‍රී ලංකා රජය එක්සත් ජාතීන් හමුවේ පවසා තිබේ.
ආණ්ඩුවේ සිය සමස්ත සංහිඳියා න්‍යාය පත්‍රය ක්‍රියාත්මක කිරීම සඳහා දේශිය ආයතන සවිබල ගැන්විමේ වැඩසටහනක් දියත් කර ඇති බව සංහිඳියා යාන්ත්‍රණ පිළිබඳ සම්බන්ධීකරණ ලේකම් කාර්යාලයේ ප්‍රධානී මනෝ තිත්තවැල්ල නිව්යෝර්ක් නුවර පැවැති සාමය ගොඩනැංවීම සඳහා වූ එක්සත් ජාතීන්ගේ කොමිසම හමුවේ පෙන්වා දී ඇත.
සංහිඳියා යුක්තිය සඳහා සැමට පලදෙන ක්‍රියාමාර්ග ගන්නා බවට එක්සත් ජාතීන් හමුවේ සහතික වු මනෝ තිත්තවැල්ල සංක්‍රාන්තික යුක්තිය සම්බන්ධයෙන් “වැදගත් පාර්ශවකරුවකු” ලෙසින් හඳුන්වනු ලැබූ යුද හමුදාව සමග “සංවාදය ශක්තිමත් කිරීම” ඇතුළු සංක්‍රාන්ති යුක්ති ක්‍රියාදාමය සම්බන්ධයෙන් අතපසුවූ පියවර ගණනාවක් ඉටු කිරීමට කටයුතු කරන බව ප්‍රකාශ කළේය.
සංහිඳිය ක්‍රියාදාමය ශක්තිමත් කිරිමට එක්සත් ජාතීන් ලබාදෙන ආධාර සහ තාක්ෂණික සහාය තීරණාමත්ක සාධකයක් බව සංහිඳියා යාන්ත්‍රණ පිළිබඳ සම්බන්ධීකරණ ලේකම් කාර්යාලයේ ප්‍රධානියා පවසා ඇති අතර පසුගිය ඔක්තෝම්බරයේ සිය ශ්‍රී ලංකා සංචාරය අවසන් කරමින් පැවති මාධ්‍ය හමුවකදී එක්සත් ජාතීන්ගේ සංවිධානයෙන් ලබා ගත හැකි ආධාර අනුග්‍රහ වලින් ශ්‍රී ලංකාවේ රජය මේතාක් නිසි ප්‍රයෝජන ගෙන නැතැයි සත්‍යය, යුක්තිය, හානිපූරණය හා පුනරාවර්තනය වැලැක්වීම සඳහා වන එක්සත් ජාතීන්ගේ විශේෂ නියෝජිත පැබ්ලෝ ද ග්‍රීෆ් සිය කනගාටුව පල කළේය.
“අහන්න”
ත්‍රස්වාදය වැළැක්විමේ පනත වෙනුවට ගෙන එන නව පනත සහ බලහත්කාරයෙන් අතුරුදහන් කරවීමට එරෙහි පනත ලබන වසරේ පලමු කාර්තුවේ ගෙන එන බවද ඔහු පෙන්වා දී ඇත.
සංහිඳියාව ප්‍රවර්ධනය කිරිම සඳහා නිර්මාණ කරන ලද “අහන්න” ගීතයට සමගාමීව ගමින් ගමට යන සංහිඳියා ප්‍රවර්ධන වැඩසටහනක් 2018 ජනවාරි සිට ආරම්භ කරන බව මනෝ තිත්තවැල්ල සාමය ගොඩනැංවීම සඳහා වූ එක්සත් ජාතීන්ගේ කොමිසම හමුවේ ප්‍රකාශ කර ඇත.
ඇතැම් මාධ්‍ය සංවිධාන සහ දේශපාලකයින් දිනපතා විශාල වෙහෙසක් ගනිමින් මහජනයා වෙත වැරදි මත ගෙන ගොස් ආණ්ඩුව සහ එක්සත් ජතීන්ගේ සංවිධානය අතර බේද ඇති කිරීමට උත්සාහ කරන බව ශ්‍රී ලංකාවේ විදේශ කටයුතු අමාත්‍යාංශ ලේකම් ප්‍රසාද් කාරියවසම් එක්සත් ජාතීන් හමුවේ පවසා තිබේ.
කෙසේ වෙතත් එවැනි බාධා නොතකමින් එක්සත් ජාතීන්ගේ සංවිධානයේද සහාය ඇතිව සංහිඳියාව ප්‍රවර්ධනය කිරිමට කටයුතු කරන බවයි ප්‍රසාද් කාරියවසම් සාමය ගොඩනැංවීම සඳහා වූ එක්සත් ජාතීන්ගේ කොමිසම හමුවේ වැඩි දුරටත් සහතික වී ඇත්තේ.
Facebook Comments
