පළාත් පාලන ජන්දය නියමිත දිනට නොපවත්වා එය කල් දැමීමට කටයුතු කරන බවට චෝදනා කරමින් ඒකාබද්ධ විපක්ෂය විසින් පළාත් සභා සහ පළාත් පාලන ඇමැති ෆයිසර් මුස්තාපාට එරෙහිව විශ්වාස භංගයක් බාර දී තිබේ.
මන්ත්‍රීවරුන් 13 දෙනෙකු විසින් අත්සන් තබා ඇති විශ්වාස භංග යෝජනාව 23 බ්‍රහස්පතින්දා මන්ත්රී දිනේෂ් ගුණවර්ධන කතානායක අතට පත් කර ඇත.
“පළාත් පාලන ජන්දය පැවැත්වීමට මැතිවරණ කොමිසමට බලය පවරා එම කොමිසම මැතිවරණය පැවැත්වීමට සුදානම් වන විට විෂය භාර ඇමැතිවරයා ජන්දය පැවැත්වීමට අපොහොසත්වීමෙන් ශ්‍රී ලංකාවේ ප්‍රජාතන්ත්‍රවාදයට මරු පහරක් එල්ල කර ඇති බැවින් තවදුරටත් අමාත්‍යවරයා වෙත විශ්වාසය තැබිය නොහැක” යන්න ඒකාබද්ධ විපක්ෂය බාර දුන් විශ්වාස භංග යෝජනාවේ සඳහන් වේ.
මේ අතර පළාත් පාලන මැතිවරණය සම්බන්ධයෙන් වැරදි ගැසට් පත‍්‍රයක් නිකුත් කළ, ජනතාවගේ ඡන්ද අයිතිය උදුරා ගැනීමට කටයුතු කළ ෆයසිර් මුස්තාපා අමාත්‍යවරයාට එරෙහිව විශ්වාසභංගයක් ගෙන ඒමට කටයුතු කරන බව ජනතා විමුක්ති පෙරමුණ පවසනවා.
ඉදිරි දිනයකදී එම විශ්වාස භංග යෝජනවා කතානායකවරයා වෙත බාර දෙන 23 බ්‍රහස්පතින්දා පැවති මාධ්‍ය හමුවේදී පාර්ලිමේන්තු මන්ත්රී විජිත හේරත් කියා සිටියේය.
යහපාලන රජය බිහි කිරිමෙන් පසු එම රජයේ ඇමැතිවරයෙකුට එරෙහිව ඉදිරිපත් කරන තුන්වන විශ්වාස භංග යෝජනාව මෙය වන අතර මීට පෙර රවී කරුණානායක සහ රාජිත සේනාරත්න හට විශ්වාස භංග යෝජනා ඉදිරිපත් විය.
Facebook Comments
