කොළඹින් හමුවූ පළමු සමූහ මිනීවළේ කැනීම් නැවත ආරම්භ වේ

රනිල් වික්‍රමසිංහ ජනාධිපතිවරයාගේ පාලන සමයේ අගනුවර අධි ආරක්ෂිත කලාපයක් තුල හමුවූ පළමු සමූහ මිනීවළේ අත්හිටුවා තිබු තෙවැනි අදියරේ කැනීම් කටයුතු සිව් මසකට පසු යළි අරඹා තිබේ.

මේ දක්වා අවම වශයෙන් මිනිස් ඇටසැකිලි තුනක් ගොඩගන්නා ලද කොළඹ වරාය සමුහ මිනී වළට යාබද ප්‍රදේශයේ මතුපිට පස් තට්ටුව ඉවත් කරන ආකාරයයි 2025 ජනවාරි 27 වැනිදා එහි ගිය වාර්තාකරුවන්ට දැක ගන්නට ලැබී ඇත්තේ.

එම කලාපය තුල තවත් සිරුරු වල දමා ඇතිදැයි තහවුරු කරගැනීම පරීක්ෂකයන්ගේ අපේක්ෂාවයි. ඉන් අනතුරුව එම භූමි ප්‍රදේශයේ සිරුරු වල දමා ඇතිනම් ගොඩගැනීම හෝ එසේත් නොමැති නම් වරාය අධිකාරියට භාරදීම හෝ වෝහාරික පුරාවිද්‍යාඥ රාජ් සෝමදේව ප්‍රමුඛ පර්යේෂක කණ්ඩායම විසින් සිදුකිරීමට නියමිතයි.

සමුහ සුසානයේ දෙවැනි අදියරේ කැනීම් කටයුතු 2024 වසරේ සැප්තැම්බර් 28 වැනි සෙනසුරාදා අත්හිටුවන විට සැලසුම් කර තිබු පරිදි කැනීම් කටයුතු ඔක්තෝබරයේ නැවත ආරම්භ කිරීමට නොහැකි වූයේ අවශ්‍ය මුල්‍ය සම්පාදන නොමැති වීමෙනි.

කැනීම් කටයුතු එසේ නතර කරන මොහොතේ වෝහාරික පුරාවිද්‍යා මහාචාර්ය රාජ් සෝමදේව මාධ්‍යවේදීන් හමුවේ කියා තිබුනේ මිනිස් අස්ථි හමුව ඇති සුසානයක විමර්ශන දීර්ඝ කාලයක් අත්හිටුවා තැබිය නොහැකි බැවින් ඉදිරි කැනීම් සඳහා අවශ්‍ය කරන මුදල් ලැබිමෙන් අනතුරුව අවම වශයෙන් 2024 ඔක්තෝබර් 17 වැනි දිනට හෝ පෙර කැනීම් කටයුතු යළි ආරම්භ කිරීමට බලාපොරොත්තු වන බවයි.

කෙසේ වෙතත්, මුදල් ලැබීමට හාරමාසයක් ගතවී ඇත. දැනට ලැබී ඇති මුදලින් දින 20ක් ඇතුලත කැනීම් කටයුතු නිම කිරීමේ අපේක්ෂාව මහාචාර්ය සෝමදේව විසින් අධිකරණයට දන්වා තිබේ.

සමූහ සුසාන පරීක්ෂණ සඳහා අවශ්‍ය මුදල් ජනාධිපති කාර්යාංශයෙන් ලබාදීමේ වගකීම බාරගෙන සිටින්නේ අතුරුදහන් තැනැත්තන් පිළිබඳ කාර්යාලය (OMP) යි.

කොළඹ වරාය සමුහ මිනීවළේ පළමු අදියරේ කැනීම් කටයුතු දින අටක් සිදු කිරීමෙන් පසුව සැප්තැම්බර් 13 වැනිදා සිකුරාදා දහවල් තාවකාලිකව නතර කරන විට අවම වශයෙන් පුද්ගලයන් දෙදෙනකුට අයත් ඇටසැකිලි මතුකරගෙන තිබු අතර තවත් හිස් කබල් හතරක් පමණ වලෙහි තිබෙනු දැකගන්නට ලැබුණි.

දෙවැනි අදියරේ කැනීම් කටයුතු සැප්තැම්බර් 26 වැනි බ්‍රහස්පතින්දා යළි ආරම්භ කොට දෙදිනකින් අත් හිටුවන විට හවස් යාමයේ එහි ගිය මාධ්‍යවේදීන්ට දැන ගන්නට ලැබී ඇත්තේ තවත් මිනිස් අස්ථි කොටස් වළ තුළ තිබෙන බවයි.

කොළඹ වරාය දක්වා දිවෙන අලුතින් ඉදිවෙන අධිවේගි මාර්ගයේ ඉදිකිරිම් කටයුතු සඳහා පොළොව හාරමින් සිටියදී 2024 ජුලි මස 13 වැනිදා පළමු වරට මිනිස් අස්ථි කොටස් හමු වී තිබුනේ එම ඉඩමේ පිහිටි පැරණි ලේකම් කාර්යාල පරිශ්‍රයෙනි.

ඒ සම්බන්ධයෙන් අධිකරණයට කරුණු වාර්තා කිරීමෙන් පසුව මහේස්ත්‍රාත් බණ්ඩාර ඉලංගසිංහ විනිසුරුගේ නියමයෙන් 2024 සැප්තැම්බර් 05 වැනි බ්‍රහස්පතින්දා එම ස්ථානයේ කැණීම් කටයුතු ආරම්භ කරන ලදී.