රාජ්‍ය දේපල විකිණීම ගැන අගමැතිට එරෙහිව උසාවි පෙත්සමක්

රජයට අයත් දේපල ආයෝජන ව්‍යාපෘතියක් හරහා ව්‍යාපාරිකයන්ට පවරාදීම අත්හිටුවන ලෙස ඉල්ලමින් ශ්‍රේෂ්ඨාධිකරණ හමුවේ නඩුවක් ගොනු කර තිබේ.

අගමැතිවරයා, නීතිපතිවරයා ඇතුළු පුද්ගලයන් හා සමාගම් දහ නමයක් වගඋත්තරකරුවන් ලෙස නම් කරමින් එම පෙත්සම ගොනු කර ඇත්තේ වෘත්තිකයන්ගේ ජාතික පෙරමුණේ ලේකම් ඉංජිනේරු රේණුක පෙරේරා විසිනි.

ශ්‍රේෂ්ඨාධිකරණය හමුවේ ජුනි 30 වැනිදා ගොනුකළ එම මූලික අයිතිවාසිකම් පෙත්සමක් මගින් ඉල්ලා ඇත්තේ සෙලෙන්දිවා ආයෝජන ව්‍යාපෘතිය යොදාගෙන රජයට අයත් දේපල පෞද්ගලික ව්‍යවසායකයන්ට පවරා දීම හෝ බදූ දීම වළක්වන නියෝගයක් මුදල් අමාත්‍යංශයේ ලේකම්වරයා වෙත නිකුත් කරන ලෙසයි.

එම ක්‍රියාදාමය සමස්ත ශ්‍රී ලාංකික පුරවැසියන්ගේම මූලික අයිතිවාසිකම් උල්ලංඝනය කරන්නක් බවට තීන්දු කොට එම සමාගම අහෝසි කරමින් නියෝගයක් පනවන ලෙස පෙත්සම්කරු ඉල්ලා සිටී.

කොළඹ සහ තදාසන්නයේ පිහිටි පුරාවිද්‍යාත්මක හා වානිජ වටිනා කමින් ඉහල ඉඩම් සහ දේපළ සෙලෙන්දිව සමාගම යටතට පවරාගනු ලැබූ සමාගම් 3 ක් යටතේ ආයෝජන සදහා යෙදවීමට කැබිනට් අනුමැතියද හිමිව තිබුණි.

පසුගිය මැයි මාසයේ 17 දින අමාත්‍ය මණ්ඩලය විසින් තීරණය කර ඇත්තේ 2020 මාර්තු මස 4 වැනිදා කැබිනට් මණ්ඩලය විසින් දෙන ලද අනුමැතිය පරිදි භාණ්ඩාගාරයට 100% හිමිකාරත්වය සහිතව සෙලෙන්දිව ආයෝජන සමාගම ස්ථාපිත කරන බවයි.

“සෙලෙන්දිව ආයෝජන සමාගම විසින් රජය සතුව පවතින හඳුනාගත් ආයතන සහ ආයෝජනයන් සඳහා පහසුකම් සැලසීම පිණිස පුද්ගලික-රාජ්‍ය හවුල්කාරිත්ව පදනම යටතේ ආයෝජන පහසුකම් සැපයීමේ ආකෘතියක් සැලසුම් කර ඇති අතර, ඒ යටතේ ‘කොළඹ කොටුව Heritage Square’, ‘නිශ්චල දේපළ සංවර්ධන’ සහ ‘රජයට අයත් සත්කාරක අංශය’ වශයෙන් ආයෝජන කළඹ තුනක් (03) ක්‍රියාත්මක කිරීමට හඳුනාගෙන ඇත,” යි රජය විසින් ප්‍රකාශයට පත් කර ඇති 2021 මැයි 17 අමාත්‍ය මණ්ඩල තීරණවල දැක්වේ.

අක්කර 42 ක පිහිටා ඇති වැලිකඩ බන්ධනාගාර සංකීර්ණය ද නාගරික සංවර්ධන අධිකාරිය හරහා දේශීය හා විදේශීය ආයෝජකයන්ට බදු දීමට රජය තීරණය කර ඇත්තේ එදින කැබිනට් මණ්ඩල රැස්වීමේදීය.

රජය සතු කැන්විල් හෝල්ඩින්ග්ස් පෞද්ගලික සමාගම, හොටෙල් ඩිවෙලොපර්ස් (ලංකා) සහ හොටෙල්ස් කලම්බු සමාගම යන සමාගම් මේ වනවිටත් සෙලෙන්දිව ආයෝජන සමාගම යටතට පවරාගෙන ඇති බව රජය පවසයි.

හොටෙල් ඩිවෙලොපර්ස් (ලංකා) සමාගම පවතින්නේ නාගරික සංවර්ධන හා නිවාස කටයුතු භාර අමාත්‍ය වශයෙන් වගකීම් උසුලන අගමැති මහින්ද රාජපක්ෂ යටතේය.

“ආණ්ඩුවේ ප්‍රසම්පාදන පටිපාටියට එරෙහිව යමින් විදේශීය හෝ දේශීය උපදේශකයන් සහ/හෝ වෙළෙඳ ප්‍රවර්ධන සමාගම්වල සේවය සිය කටයුතු වලට සහාය සහ/ හෝ ප්‍රවර්ධනය සඳහා යොදාගැනීමට” කැබිනට් මණ්ඩලය විසින් සෙලෙන්දිව ආයෝජන සමාගමට අනුමැතිය ලබා දී ඇති බව වෘත්තිකයන්ගේ ජාතික පෙරමුණේ ලේකම්වරයා සිය පෙත්සමින් කියා සිටී.

එම සමාගම් හරහා කොළඹ ග්‍රෑන්ඩ් ඔරියන්ටල් (GOH) හෝටලය, ලංකා බැංකුවේ යෝක් විදී ගොඩනැගිල්ල, ගෆූර් (Gafoor) ගොඩනැගිල්ල, විදේශ කටයුතු අමාත්‍යාංශ ගොඩනැගිල්ල, මහ තැපල් කාර්‍යාලය, ඩී. ආර්. විජේවර්ධන මාවතේ පිහිටි සීනෝර් අවන්හල, වෝටර්ස් එජ් මිශ්‍ර සංවර්ධන ව්‍යාපෘතිය, කොළඹ හිල්ටන් හෝටලය සහ ක්‍රීඩා සංකීර්ණය, ග්‍රෑන්ඩ් හයට් (Hyatt) හෝටල ව්‍යාපෘතිය මෙලෙස ආයෝජකයන්ට ලබා දීමට නියමිතව බව ලංකා බැංකු සේවක සංගමය මීට ඉහතදී අනතුරු අඟවා තිබුණි.

මින් බහුතරයක් යටත් විජිත සමයේ ඉදිකරන ලද පුරාවස්තු ලෙස සැලකෙන ගොඩනැගිලිය.

1955 අගෝස්තු මස 01 වන දින ලංකා බැංකුව විසින් මිලදී ගනු ලැබූ යෝර්ක් වීදිය ගොඩනැගිල්ල වසර 30 කට අධික කාලයක් ලංකා බැංකුවේ ප‍්‍රධාන කාර්යාලය ලෙස භාවිතා කරන ලද ගොඩනැගිල්ලක් බව පෙන්වා දෙන ලංකා බැංකු සේවක සංගමයේ ප්‍රධාන ලේකම් රන්ජන් සේනානායක මීට ඉහතදී අවධාරණය කර තිබුනේ පෞරාණික හා සංස්කෘතිමය වටිනාකමින් අනූන මෙම ගොඩනැගිල්ල ලංකා බැංකුව අයත් වුවද එය පුරාවිද්‍යාත්මක වටිනාකමක්ද සහිත “සමස්ත ජාතියේම අභිමානය විදහා දක්වන සංකේතයක්” බවයි.

වෘත්තීකයන්ගේ ජාතික පෙරමුණේ ලේකම් ඉංජිනේරු රේණුක පෙරේරා ශ්‍රේෂ්ඨාධිකරණය හමුවේ ගොනු කළ පෙත්සමේ මගින් පෙන්වා දී ඇත්තේ රජය සතු දේපල කොටස් වෙනත් පාර්ශ්වයන්ට ලබා දීමේ දී ‌51%ක රජයේ හිමිකාරිත්වය අහිමි වූවහොත් විගණකාධිපතිවරයාට ඒ සම්බන්ධයෙන් වගකීමක් නොමැති වන බවයි.

එම දේපල සම්බන්ධයෙන් පාර්ලිමේන්තුවේ වගකීම ද ගිලිහි යන බව අවධාරණය කරන පෙත්සම්කාර පාර්ශ්වය වැඩි දුරටත් අවධාරණය කර ඇත්තේ රටේ ස්වෛරී භාවයට එමගින් හානියක් වන බවයි.

නීතිපතිවරයා, අගමැති හා මුදල් අමාත්‍ය මහින්ද රාජපක්ෂ, මුදල් අමාත්‍යංශයේ ලේකම් එස්. ආර්. ආටිගල, විගණකාධිපතිවරයා, සෙලන්දිව ඉන්වෙස්මන්ට් සමාගම, සෙලන්දිව ලෙෂර් ඉන්වෙන්ස්මන්ට් සමාගම, සමාගම් රෙජිස්ට්‍රාර් ජනරාල්වරයා, කැන්විල් හෝල්ඩින්ග්ස් සමාගම, ශ්‍රී ලංකා මහ බැංකුවේ මූල්‍ය මණ්ඩලය, නාගරික සංවර්ධන අධිකාරිය, කැබිනට් මණ්ඩලයේ ලේකම්වරයා, ශ්‍රී ලංකා රක්ෂණ සංස්ථාව ඇතුළු පුද්ගලයන් හා සමාගම් 19 ක් මෙම පෙත්සමේ වග උත්තරකරුවන් ලෙස නම් කර තිබේ.

සෙලෙන්දිව සමාගම යොදාගෙන අගනුවර ඓතිහාසික ගොඩනැගිලි විදේශිකයන්ට විකිණීමට රජය සැලසුම් කරන බවට එල්ල වන චෝදනා ‘කටකතා’ ලෙස හෙලා දකිමින් රජය විසින් ප්‍රතික්ෂේප කර ඇත.

නාගරික සංවර්ධන හා නිවාස කටයුතු අමාත්‍යංශය පවසන්නේ සෙලෙන්දිව ආයතනයේ අරමුණ ජනාධිපතිවරයාගේ ‘සෞභාග්‍යයේ දැක්ම’ අනුව යමින් රාජ්‍ය ආයතන ලාභ ලබන ව්‍යාපාර ලෙසට පෙරැළීම බවයි.

ඒ අනුව ආණ්ඩුවේ අධිකාරිය යටතේ පවතින ගරාවැටුණු ඓතිහාසික ගොඩනැගිලිවලට පුනර්ජීවනයක් ලබා දීමට අගමැති මහින්ද රාජපක්ෂ උපදෙස් දී ඇති බව අමාත්‍යංශයේ අතිරේක ලේකම් ආචාර්ය එම් එම් එස් බී යාලේගම කොළඹදී මාධ්‍යවේදීන් අමතා කියා තිබුණි.

ඒ සඳහා වන ආයෝජන සැලසුම අදාළ කැබිනට් පත්‍රිකාවේ සඳහන් වන බව සෙලෙන්දිව සමාගමේ ප්‍රධාන විධායක නිලධාරී ශමාහිල් මොහිදීන් එහිදී ප්‍රකාශ කර තිබුණි.