ශ්‍රී ලංකාවේ පොලීස් ස්ථාන තුලදී ළමුන්ට හා කාන්තාවන්ට සිදු කරන ලිංගික අතවර ඇතුළු සියලු ආකාරයේ වධ හිංසා නතර කිරීමට මැදිහත් වන ලෙස ඉල්ලමින් සිවිල් සංවිධානයක් ශ්‍රී ලංකා මානව හිමිකම් කොමිෂන් සභාවට පැමිණිල්ලක් ඉදිරිපත් කර තිබේ.
එම වධහිංසාවලට වගකිවයුත්තන්ට එරෙහිව නීතිමය පියවර ගන්නා ලෙසත් ඉල්ලමින් ජුලි 2 සිකුරාදා ජන බල පවුර සංවිධානය පැමිණිල්ල ඉදිරිපත් කර ඇත්තේ ජනතා නීතිඥයෝ සංවිධානයේ නීතිඥයන්ගේද සහභාගීත්වයෙනි.
ජන බල පවුර සංවිධානයේ විධායක සභික අශිලා දන්දෙණියගේ අතිසනින් යුතුව ශ්‍රී ලංකා මානව හිමිකම් කොමිෂන් සභාවේ සභාපති වෙත ඉදිරිපත් කර තිබෙන පැමිණිල්ල මගින් පෙන්වා දී ඇත්තේ පසුගියදා පාදුක්ක පොලිස්ථානය තුලදී හා නෙළුව පොලිස්ථානය තුලදී කාන්තාවකටත්, දැරියකටත් ලිංගික අතවර කිරීමේ සිද්ධිවලින් “ශ්‍රී ලංකා සමාජයට ලබාදෙන සංඥාව මැනවින් තේරුම් ගෙන” ඒවා සිදු නොවන ආකාරයට ක්‍රියාමාර්ග ගැනීම රජය වහා කළ යුතු බවයි.
ආණ්ඩුක්‍රම ව්‍යවස්ථාව මගින් තහවුරු කර තිබෙන මුලික අයිතිවාසිකමක් රජයේ ආයතන තුලින්ම උල්ලංඝනය කිරීම ඉතා භයානක තත්වයක් බවයි ජන බල පවුර සංවිධානය පවසන්නේ.
එම සංවිධානය පෙන්වා දෙන පරිදි අන්තර්ජාලය ඔස්සේ අසභ්‍ය ඡායාරූප පල කරමින් තර්ජනය කිරීමක් සම්බන්ධයෙන් 16 හැවිරිදි දැරියක් තමන්ගේ දෙමව්පියන් සමග පැමිණිලිලක් සිදු කිරීම සදහා පසුගියදා පාදුක්ක පොලිස්ථානයට ගොස් තිබේ.
“2021.06.21 වන දින පාදුක්ක පොලීසියට ගොස් පැමිණිල්ල සටහන් කොට එහි ලදුපත බාරගත් පසු එකී දැරියගේ පියා එහි සිටි පොලිස් නිලධාරීන් විසින් පොලිස් කූඩුවට දමා තිබේ. පසුව උපක්‍රමශිලීව කටයුතු කරමින් එහි සිටි පොලිස් නිලධාරියෙක් දැරියගේ මවට ලිංගික අතවර කර ඇති අතර ඇයට පහර දීමක්ද එහිදී සිදු කර තිබේ,” යයි ජන බල පවුර සංවිධානය සිය පැමිණිල්ලේ සටහන් කර තිබේ.
එම සංවිධානය වැඩි දුරටත් පෙන්වා දෙන්නේ ජුනි 29 දින පැමිණිල්ලක් සිදු කිරීම සදහා සිය මව සමග නෙළුව පොලිස්ථානයට ගිය 15 වියැති දැරියක් එහි පොලිස් නිලධාරියකු විසින් ලිංගික අතරවරයට ලක් කර තිබෙන බවයි.
“එහිදී ද දැරියගේ මව උපක්‍රමශිලීව වෙන ස්ථානයකට යොමු කර එසේ අතවර කර තිබේ.”
රාජ්‍ය ආරක්ෂකයාගෙන් අතවර
ශ්‍රී ලංකා පොලීසිය තුලදීම සිදු වු මෙම ලිංගික අතවර පිළිබඳ සිද්ධින් දෙකෙන්ම තවදුරටත් පුරවැසියන්ගේ ආරක්ෂාව සැලසීමට පොලීසියට හැකියාවක් ඇද්ද යන ප්‍රශ්නය පැනනගින බව ජන බල පවුර සංවිධානය පෙන්වා දෙයි.
“මේ නිසාම පොලීසිය කෙරෙහි ඇති වී තිබෙන අවිශ්වාසය නීතියේ ආධිපත්‍ය පවත්වාගෙන යාමට අහිතකර ආකාරයට බලපෑම කිසිවෙකුටත් නැවැත්විය නොහැක.”
පොලීසිය බාරයේ සිටි සැකකරුවන් පොලීසියේ සහාය ඇතිවම ඝාතනය කරමින් මාස දෙකකට ප්‍රථම ශ්‍රී ලංකා පොලිසිය පෙන්නුම් කළ අනීතික බියකරු හැසිරීමත් සිය පැමිණිල්ල තුලින් ජන බල පවුර සංවිධානය මතක් කර දී තිබේ.
පාදුක්ක හා නෙළුව පොලීසියේ සිදුවීම් නිසා අගතියටත්, වින්දිතභාවයටත් පත් කාන්තාවට සහ දැරියට සාධාරණය ඉටු කර, ඉන් නොනැවතී ශ්‍රී ලංකා පොලීසිය විසින් දිගින් දිගටම සිදු කරන හිංසා නැවැත්වීමට අවශ්‍ය සියළු ක්‍රියා මාර්ග ගන්නා ලෙස ශ්‍රී ලංකාවේ මානව හිමිකම් ආරක්ෂා කිරීමට තිබෙන ප්‍රමුඛතම රාජ්‍ය ආයතනය වන ශ්‍රී ලංකා මානව හිමිකම් කොමිෂන් සභාවෙන් අශිලා දන්දෙණිය ඉල්ලා තිබේ.
Facebook Comments
