යුද අපරාධ චෝදනා එල්ල වී ඇති සෙන්පතියකු ශ්‍රී ලංකා යුද හමුදා ප්‍රධානී තනතුරුට පත් කිරිම හේතුවෙන් සාම සාධක හමුදාව සඳහා මින් ඉදිරියට මෙරට හමුදා සෙබළුන් බඳවා නොගැනීමට එක්සත් ජාතින්ගේ සංවිධානය තීරණය කර තිබේ.
උතුරේ අවසන් යුද සමයේදී සිදුවු යුද අපරාධ වලට වගකිව යුතු බවට සැක කෙරෙන ලුතිනන් ජෙනරල් ශවේන්ද්‍ර සිල්වා යුද හමුදාපති ධුරයට පත් කිරිම තම තීරණය හේතු වු බවයි එක්සත් ජාතින්ගේ සංවිධානයේ ප්‍රකාශකයෙකු වන ෆර්හාන් හක් සඳහන් කරන්නේ.
ලුතිනන් ජනරාල් ශවේන්ද්‍ර සිල්වා යුද හමුදාපති ධුරයට පත් කිරීම සම්බන්ධයෙන් ජාත්‍යන්තර මානව හිමිකම් සංවිධාන මෙන්ම ඇමෙරිකා එක්සත් ජනපදය, යුරෝපා සංගමය හා එක්සත් ජාතීන්ගේ මානව හිමිකම් කවුන්සිලය ද විරෝධය පළකර තිබුනි.
ඒ අනුව අත්‍යවශ්‍ය නොවන ශ්‍රී ලංකා යුද හමුදාවේ බළකා එක්සත් ජාතීන්ගේ සාම සාධක මෙහෙයුම්වල යෙදවීම නැවැත්වීමට එක්සත් ජාතීන්ගේ සාම සාධක දෙපාර්තමේන්තුව තීරණය කර ඇති බවයි වාර්තා වන්නේ.
එක්සත් ජාතීන්ගේ සාම සාධක හමුදාවලට ශ්‍රී ලංකාව ලබා දී තිබෙන දායකත්වය සම්බන්ධයෙන් කෘතඥ වන නමුත් ශවේන්ද්‍ර සිල්වා මහතා යුද හමුදාපති ධුරයට පත් කිරීම කනගාටුදායක හා ප්‍රශ්නකාරී බව එක්සත් ජාතින්ගේ සංවිධානයේ ප්‍රකාශකයා විදෙස් මාධ්‍ය වෙත පවසා ඇත.
“ශවේන්ද්‍ර සිල්වා මහතා හමුදාපති ධුරයට පත් කිරීම සම්බන්ධයෙන් අපි ශ්‍රී ලංකා රජයට අපගේ විමසිලිමත් බව දන්වා සිටියා. ජාත්‍යන්තර මානුෂීය නීතිය සහ මානව හිමිකම් නීතිය දරුණු ලෙස කඩකළ බවට ශවේන්ද්‍ර සිල්වා මහතාට චෝදනා එල්ලවී තිබෙනවා. ඒ සම්බන්ධයෙන් ලිපිලේඛන තිබෙනවා. ඒනිසා ශ්‍රී ලංකා හමුදාව මින් ඉදිරියට සාම සාධක මෙහෙයුම් සඳහා සම්බන්ධ කරගන්නේ නැහැ. එය එක්සත් ජාතීන්ගේ මෙහෙයුම් අනතුරේ දැමීමක්.” යැයි ෆර්හාන් හක් ප්‍රකාශ කර තිබේ.
යුද හමුදාපති ධුරයට පත්වීමෙන් පසු මුල්ම වතාවට ශවේන්ද්‍ර සිල්වා පසුගියදා යාපනයට ගිය අවස්ථාවේ ඔහු අත්අඩංගුවට ගන්නා ලෙස බලකරමින් අතුරුදහන් වුවන්ගේ ඥාතීහු විරෝධතා පැවැත්වූහ.
Facebook Comments
