යුද්ධය නිමා වීමෙන් පසු පුරා විද්‍යා දෙපාර්තමේන්තුව උතුරු නැගෙනහිර දෙමළ ජනයාගේ පෞද්ගලික ඉඩම් කොල්ල කෑම මෑත සිට උත්සන්න වී ඇති බවට දෙමළ දේශපාලකයන් හා බහුජන සංවිධාන දිගින් දිගටම කළ චෝදනාව සත්‍යයක් බව ජනාධිපතිවරයාට ඒත්තු ගොස් තිබේ.
එම ඉඩම් නිදහස් කරන ලෙස ජනාධිපතිවරයා පුරාවිද්‍යා ප්‍රධානියාට නියෝග කර සිව් දිනක් ගතවීමට මත්තෙන් මහාචාර්ය අනුර මනතුංග සිය ධුරයෙන් ඉල්ලා අස්වීමට කටයුතු කර ඇත.
පුරාවිද්‍යා දෙපාර්තමේන්තුව අත්පත් කරගන්නා ඉඩම් සැමෙකකම පාහේ සිදුවී ඇත්තේ යුද හමුදාවේ, සිංහල බෞද්ධ භික්ෂුන්ගේ, ප්‍රභූන්ගේ හා සංවිධාන හවුල්වී සංරක්ෂණ කටයුතු නමින් වෙහෙර විහාර ඉදිකිරීමය.
දෙමළ ජාතික සන්ධානයේ නියෝජිතයන් සමග ඉඩම් නිදහස් කිරීම සම්බන්ධයෙන් ජුනි 8 වැනිදා පැවැත්වු සාකච්ඡාවකදී ජනාධිපති රනිල් වික්‍රමසිංහ ඉඩම් සම්බන්ධ රාජ්‍ය ප්‍රතිපත්ති ක්‍රියාවට නංවන ලෙස මහාචාර්යවරයාට දැඩි ස්වරයෙන් නියෝග කර තිබුනි.
මුලතිව් කුරුන්තුර්මලේ තන්නිමුරිප්පු වැව් දියෙන් ගොවිතැන් කරන ගොවීන්ගේ වගා බිම් ද ඇතුළුව ඉඩම් අක්කර 229 ක් මැනිමේ කටයුතු සිදු කරන ලෙස පුරාවිද්‍යා දෙපාර්තමේන්තුවේ අධ්‍යක්ෂ ජෙනරාල් මහාචාර්ය අනුර මනතුංග නියෝග කර තිබෙන බව ඉලංකෙයි තමිල් අරසු කච්චි පාර්ලිමේන්තු මන්ත්‍රී චාල්ස් නිර්මලනාදන් ජනාධිපති හමුවේ අනාවරණය කළේය.
එම කුඹුරු ඉඩම් තුළ දෙමළ ජනයා අඩුම තරමින් වසර 100 ක කාලයක් තිස්සේ ගොවිතැන් කටයුතු වල නිරතව සිටින බව එම්. ඒ සුමන්දිරන් මන්ත්‍රීවරයා ද තහවුරු කළේය.
තමන් දුන් නියෝගය ඉල්ලා අස් කරගැනීම ‘ප්‍රශ්නයක්’ බව පුරාවිද්‍යා ප්‍රධානියා ජනාධිපති හා පැවසීය.
“සර්, පොඩි ප්‍රශ්නයක් තියනවා සර්, මට ලියුමක් විත්ඩ්‍රෝ කරන්න හරි අමාරුයි” යැයි පුරාවිද්‍යා දෙපාර්තමේන්තුවේ අධ්‍යක්ෂ ජෙනරාල් පවසද්දි කැබිනට් ප්‍රතිපත්ති ක්‍රියාවට නංවන ලෙස මහාචාර්යවරයාට අවවාද කළ ජනාධිපති ඔහුගෙන් විමසා සිටියේ තවත් කොතරම් ඉඩම් ප්‍රමාණයක් අවශ්‍යද යන්නයි.
” සර් දැනට 72 ක් තියනවා. අපි තව 270 ගානක් ඉල්ලලා තියනවා සර්. එතනින් මිනිස්සු වගා කරන ඉඩම් තියෙන්නේ අක්කර පහයි. ඒ් පහත් තියෙන්නේ වන රක්ෂිතය යටතේ.”
එහිදී ජනාධිපතිවරයා විමසා සිටියේ මහා විහාරයටත් වඩා ඉඩම් ප්‍රමාණයක් අවශ්‍ය වන්නේ ඇයිද යන්නයි.
“ඉතින් ඔයගොල්ලෝ අක්කර 275 ක් ගත්තොත් මේ විහාරය මහා විහාරයටත් වඩා ලොකුයි. ඉතින් මම අහන්නේ මහා විහාරයයි, ජේතවනාරාමයයි, අභයගිරිය ඔක්කොම දාලා අක්කර 100 ක් නෑ”
නියෝගය අවලංගු කිරීමට අධ්‍යක්ෂ ජනාරාල් කලින් වු පොරොන්දුව ඉටු කිරීමට නොහැකි බව දැන් පැවසීම තමන්ට ප්‍රශ්නයක් බව චාල්ස් නිර්මලනාදන් මන්ත්‍රීවරයා පෙන්වා දුන්නේය.
ජනාධිපති රනිල් වික්‍රමසිංහ පවසන පරිදි මුලතිව් කුරුන්තුර්මලේ තන්නිමුරිප්පුහි අතීතයේ තිබී ඇත්තේ දෙමළ බෞද්ධ විහාරයකි.
එය පුරාවිද්‍යා ස්ථානයක් ලෙස සංරක්ෂණය කිරීම අත්‍යාවශ්‍ය බව අවධාරණය කළ ජනාධිපතිවරයා ‘පන්තියක් දමා’ ඉතිහාසය ඉගැන්වීමටද ඉදිරිපත් විය.
සිව දේවාලයක් ද පිහිටි කුරුන්තුර් මලේ අලුතින් ඉදිකිරීම් සිදු නොකරන ලෙස අධිකරණ නියෝගයක් ද නොතකා එය සිංහල බෞද්ධ පුජා භූමියක් බවට පත් කිරීමට හමුදා අනුග්‍රහයෙන් ගෙනයන වැඩපිළිවෙල නවතාලන ලෙස දෙමළ මහජන නියෝජිතයන් ප්‍රමුඛ ප්‍රදේශවාසීන් විරෝධතා පවත්වමින් දිගින් දිගටම කළ බලපෑම රජය ඇතුළු දකුණේ බලවේග විසින් නොතකා හරින ලදී.
වික්‍රමසිංහ ආණ්ඩුවේත් බුද්ධශාසන, ආගමික සහ සංස්කෘතික කටයුතු අමාත්‍ය ධුරය දරන විදුර වික්‍රමනායක හමුදාව පිරිවරා ගොස් එතැන අලුතින් බෞද්ධ විහාරයක් ඉදි කිරීමට මුල පිරුවෙකි.
උතුර සහ නැගෙනහිර දෙපළාතේ සහ තමන්කඩුව දිශාවේ ප්‍රධාන සංඝනායක හා නැගෙනහිර පළාතේ පුරාවිද්‍යා උරුමයන් කළමනාකරණය සඳහා හිටපු ජනාධිපති ගෝඨාභය රාජපක්ෂ විසින් දේශීය හා ජාත්‍යන්තර විරෝධය මධ්‍යයේ වර්තමාන ආරක්ෂක ලේකම් කමල් ගුණරත්නගේ ප්‍රධානත්වයෙන් පත්කළ ජනාධිපති කාර්ය සාධක බලකායේ ඉදිරිපෙළ සාමාජික අරිසිමලේ ආරණ්‍ය සේනාසනාධිපති පනාමුරේ තිලකවංශ නාහිමියන් නැගෙනහිර පලාතේ ඉඩම් අක්කර 3000 ක භුමියක් පුරා විද්‍යා දෙපාර්තමේන්තුවේ අනුග්‍රහෙයන් බලහත්කාරයෙන් අල්ලාගෙන සිටීම සම්බන්ධයෙන්ද පාර්ලිමේන්තු මන්ත්‍රී රාසමානික්‍යම් ශානක්‍යන් එම සාකච්ඡාවේදී ජනාධිපතිවරයාට දැනුම් දී තිබුනි.
පුරාවිද්‍යා බලධාරීන් විසින් ඉඩම් අල්ලාගෙන නිල වශයෙන් පනවා තිබෙන සීමා ඉවත් කරන ලෙස ජනාධිපතිවරයා කියා සිටියේ, “දැන් කිව්ව නිසා ගල් ටික ගලවනවද, මං කරන්නදැ,” යි විමසමිනි.
“සර්, මං ඒක කරන්නම්,” යයි මහාචාර්ය මනතුංග පැවසුවේ සිහින් ස්වරයෙනි.
නැගෙනහිර පළාතේ පුරාවිද්‍යා බිම් වල නව ඉදිකිරීම් වලට ඉඩ නොදෙන බවට පුරාවිද්‍යා දෙපාර්තමේන්තුව දෙවසරකට ඉහතදී සහතික වී තිබුණි.
පුරාවිද්‍යා දෙපාර්තමේන්තුවට අමතරව ආරක්ෂක අමාත්‍යංශය, මහවැලි අධිකාරිය, සංචාරක මණ්ඩලය, වන සංරක්ෂණ හා වනජීවි දෙපාර්තමේන්තු උතුරු නැගෙනහිර දෙමළ ජනයාගේ ඉඩම් බලහත්කාරයෙන් අත්පත්කරගන්නා බවට දිගින් දිගටම චෝදනාවට ලක්ව සිටී.
පුරාවිද්‍යා දෙපාර්තමේන්තුවේ ඉඩම් කොල්ලය සම්බන්ධයෙන් තොරතුරු හෙලිවන වීඩියෝව පහතින්,
Facebook Comments
