ශ්‍රී ලංකා යුද හමුදාව විසින් දැවැන්ත කඳවුරක් පවත්වාගෙන ගිය භූමියකින් මිනිස් ඇටකටු සමග පිලිස්සී ගිය ටයර් සහ සිල්පර කොට හමුවී ඇත.
මඩකලපුවට කිලෝමීටර් දහ අටක් උතුරින් පිහිටි මුරකොට්ටන්චේනෙයි හි කාලි කෝවිල ඉදිරිපිට නිවසක් සඳහා වැසිකිළි වලක් හාරද්දී අස්ථි කොටස් මතුවුනු බව කම්කරුවන් පිරිසක් සති අන්තයේදී එරාවුර් පොලිසියට දැනුම් දී තිබේ.
නිවස පිහිටා ඇත්තේ ශ්‍රී ලංකා යුද හමුදාව විසින් 2014 දක්වා අක්කර හතක පමණ වපසරියක පවත්වාගෙන යනු ලැබූ කඳවුරක් ඉවත් කරගෙන යාමෙන් අනතුරුව මුල් ඉඩම් අයිතිකරුවන්ට ආපසු පවරා දුන් භුමියකයි.
මේ හමුවී ඇත්තේ අනූව දශකයේ එම කඳවුරට රැගෙන යාමෙන් පසුව අතුරුදහන් වූ දෙමළ තරුණයන් ගේ සමුහ මිනීවලක් බව ප්‍රදේශවාසීන්ගේ සැකයයි.
“අපක්ෂපාතී හා පාරදෘශ්‍ය පරීක්ෂණයක් පැවැත්වුවොත්, පළාතේ බොහෝ තරුණ අයට අත්වූ ඉරණම හොයා ගන්න පුළුවන් වේවි,” යි නම ප්‍රසිද්ධ නොකරන ලෙස ඉල්ලා සිටි මඩකලපුවේ මානව හිමිකම් ක්‍රියාධරයෙක් ගගන හා පැවසීය.
පොලිසිය මේ වනවිට අස්ථි කොටස් හමුවූ ස්ථානය අවට ආරක්ෂාව යොදා ඇති බව මඩකලපුව ගගන වාර්තාකරු පවසයි.
(Radio gagana)
Facebook Comments
