රතන සාදු නැවතත් මුස්ලිම් විරෝධය අවුස්සයි

0
344
Ivory Agency Sri Lanka
HailHost
wedding people

ශතවර්ෂාධික කාලයක් තිස්සේ පැවත එන අරාබි දහම් පාසල් වසා දමා බුර්කාව තහනම් කරන ලෙස ආණ්ඩුවට බල කරන බෞද්ධ භික්ෂුවක් එසේ නොකළහොත් මුස්ලිම් ව්‍යාපාර වර්ජනය කරන බවට තර්ජනයක් කරමින් රට තුළ ජාතීන් බේද කරන ආකාරයේ ප්‍රකාශයක් කර තිබේ.

මෙවර මහ මැතිවරණයේ තරග වදින අතුරලියේ රතන හිටපු පාර්ලිමේන්තු මන්ත්‍රී හිමියන් තම තර්ජනය ක්‍රියාත්මක කිරීම “පුලුවන්නම් නවත්තන්න කියනවා,” යි අභියෝගයක්ද කළේ ජුලි 06 සඳුදා රාජගිරියේදී පැවැති මාධ්‍ය හමුවක් අමතමිනි.

“අපි සිංහලයන්ට කියනවා, එක සිංහලයෙක්, එක කිතුනුවෙක්, ඒ වගේම අපි දෙමළ ජනතාවට කියනවා, හින්දු ජනතාවට කියනවා, මේ ගොල්ලන් බුර්කාව නවත්තනකං මද්‍රසා පාසල් වහනකං මුස්ලිම් කඩ වලට යාම අපි නවත්වන්න ඕනේ. ඒ පිළිබදව අපි ජමියතුල් උලමා එකට සතියක කාලයක් දෙනවා”

සමස්ත ලංකා ජමියතුල් උලමා යනු ශ්‍රී ලංකාවේ මුස්ලිම් ජනතාවට ආගමික හා සමාජීය මගපෙන්වීම දෙන ඉස්ලාමීය වියතුන්ගේ උත්තරීතර සභාවයි.

මද්‍රසා පාසල් යනු “බෝම්බකරුවන් හදන, ඔලු හෝදන” කම්හල් ලෙස අවමානයට ලක් කළ අතුරලියේ රතන හිමි වැඩි දුරටත් සදහන් කළේ ඒවා “නීති විරෝධි” බවයි.

එමෙන්ම, “විවාහ නීතිය පිළිබඳ ප්‍රතිපත්තිය” ද ක්‍රියාත්මක කළ යුතු බව එහිමියන්ගේ දැඩි ඉල්ලීමක් විය.

මෙම මාධ්‍ය හමුවේදී තමන් විසින් සිදු කරන්නේ අනතුරු ඇගවීමක් බව රජයට අවධාරණය කළ හිටපු පාර්ලිමේන්තු මන්ත්‍රී අතුරලියේ රතන හිමියන් ආණ්ඩුවෙන් ඉල්ලා සිටියේ ඒ සම්බන්ධයෙන් ක්‍රියා කරන ලෙසයි.

ඉස්ලාමීය දහම් පාසල් තුල උගන්වන දේ පිළිබඳව සොයා බැලිය යුතු යැයි අගමැති මහින්ද රාජපක්ෂ අධ්‍යාපන බලධාරීන්ගෙන් බුද්ධසාසන, ආගමික කටයුතු සහ සංස්කෘතික අමාත්‍යාංශයේ ප්‍රගති සමාලෝචන රැස්වීමේදී ඉල්ලා සිටි අවස්ථාවේ නිලධාරීන් ඔහුට දැනුම් දී සිටියේ ලියාපදිංචි ආයතන වල ඉගැන්වීම් කෙරෙන්නේ අධ්‍යාපන අමාත්‍යාශයේ විෂය නිර්දේශ අනුව බවයි.

ලියාපදිංචි නැති ආයතන වේ නම් ඒවා රජයේ ලියාපදිංචි කරන ලෙස අගමැති වරයා එහිදී උපදෙස් දී තිබුණි.

ශ්‍රී ලංකාවේ පළමු මද්‍රසා අධ්‍යාපනායතනය 1870 දී ගාල්ලේ ලියාපදිංචි කරන ලද මුස්ලිම් කටයුතු අමාත්‍යාංශය විසින් ප්‍රකාශයට පත් කර තිබේ.

මේ වනවිට රට තුල මද්‍රසා 1600 කට අධික ප්‍රමාණයක්ද 300 කර වැඩි අරාබි පාසල් ද ඇති බව මාධ්‍ය වාර්තා වල දැක්වේ.

Facebook Comments

HailHost