උතුරේ මාධ්‍යවේදීන්ගේ අතුරුදහන්වීම් සහ ඝාතන පිලිබඳ පරීක්ෂණ සිදු නොවීම, මාධ්‍යවේදීන් අතුරුදහන් වීම සහ වෙබ් අඩවි සඳහා වෙළෙඳ දැන්වීම් ලබා ගැනීම ඇතුළු ප්‍රශ්න “විවෘතව සාකච්ඡා කිරීමට ” ජනාධිපතිවරයා ලබන සතියේ තමන් හමුවන ලෙස වෙබ් මාධ්‍ය සංවිධානයකට ආරධානා කර තිබේ.
වෙබ් මාධ්‍යවේදීන් සඳහා “වෙබ් මාධ්‍ය ආචාර ධර්ම පද්ධතියක්” හඳුන්වාදීම වෙනුවෙන් වෘත්තීය වෙබ් මාධ්‍යවේදීන්ගේ සංගමය 29 සිකුරාදා සංවිධානය කල උත්සවය අමතමින් ජනාධිපති මෛත්‍රිපාල සිරිසේන මෙම ආරාධනාව කර සිටියේය.
නිවාඩු නැති ඕනෑම දිනයක “හිතවතුන්, මිත්‍රයන්, පන්දම්කාරයන්, බ්‍රෝකර්ලා” නොමැතිව තමන් මුණගැසීමට අවස්ථාව ඇතත්, වසර තුනක කාලයක් තිස්සේ බලයේ සිටි තමන් සමග ගැටළු සාකච්ඡා කිරීමට එම උත්සවය සංවිධානය කළ මාධ්‍ය සංගමය හට ඉඩ නොලැබීම පිළිබඳව ජනාධිපතිවරයා සිය බලවත් කණස්සල්ල පල කළේය.
යහපාලන රජය විසින් වෙබ් අඩවි වලට පහසුවෙන් ප්‍රවිශ්ඨ වීමට සිදු කර ඇති බාධා සම්බන්ධයෙන්ද ජනාධිපතිවරයාගේ අවධානයට යොමු කිරිමට වෘත්තීය වෙබ් මාධ්‍යවේදීන්ගේ සංගමය කටයුතු කලද අවහිර කර ඇති වෙබ් අඩවි වල නම් ප්‍රකාශ නොකිරීමට සංගමය ප්‍රවේශම් සහගතවිය.
සංගමය විසින් ජනාධිපතිවරයාගේ අවධානයට යොමු කල වෙබ් අඩවි වලට පිවිසීමේ අවහිරතා පිළිබඳව ජනාධිපතිවරයා සිය කතාවේදී කිසිවක් ප්‍රකාශ නොකළේය.
Facebook Comments
