ඉන්ධන හිඟය ඇතුළු ධිවරයන් මුහුණ දී සිටින ගැටළු වලට කඩිනම් විසදුම් ඉල්ලා වන්නියේ දැවැන්ත විරෝධතාවයක් දියත් කර තිබේ.
මුලතිව් ධීවර සංගමයේ සංවිධානත්වයෙන් අගෝස්තු 16 වැනි අගහරුවාදා දියත් කළ විරෝධයට ප්‍රදේශයේ ධිවරයන් දහසකට අධික ප්‍රමාණයක් එක්ව සිටි බවයි පළාත් බද වාර්තාකරුවන් පවසන්නේ.
ට්‍රැක්ටර් මත ධිවර යාත්‍රා පටවා ගනිමින් මුලතිව් නගරයේ සිට දිස්ත්‍රික් ලේකම් කාර්යාලය දක්වා විරෝධතා පෙලපාලියකින් පැමිණි ධිවරයන් එහිදී බලධාරීන්ගෙන් ඉල්ලා සිටියේ සිය ජීවිකාව පවත්වාගෙන යාම සදහා අවශ්‍ය භුමිතෙල් හිඟයකින් තොරව ලබා දෙන ලෙසයි.
ඉන්දීය ධීවරයන් උතුරු මුහුදේ සිදු කරන අනවසර මසුන් මැරීමේ කටයුතු නතර කිරීමට පියවර ගන්නා ලෙස ඉල්ලා සිටින ඔවුන් බලධාරීන්ගෙන් තව දුරටත් ඉල්ලා සිටියේ නීති විරෝධි ක්‍රම ඔස්සේ සිදු කෙරෙන මසුන් මැරීමේ කටයුතුද නතර කිරීමටද වහාම මැදිහත් වන ලෙසයි.
මාස තුනකට වැඩි කාලයක් තිස්සේ භුමිතෙල් නොලැබීම නිසා තමන්ට සිය ජිවිකාව අහිමිව ගිය බැවින් එම කාලය තුළ වු ආර්ථික පාඩුව වෙනුවෙන් වන්දි මුදල් ලබා දෙන ලෙසත් මුලතිව් ධිවරයන් එහිදී රජයේ බලධාරීන්ගෙන් ඉල්ලා සිටියේ ය.
සිය ඉල්ලිම් ඇතුලත් සන්දේශයක් මුලතිව් දිස්ත්‍රික් අතිරේක ලේකම් (කළමනාකරණ) කේ . කනගේෂ්වරන් සහ මුලතිව් දිස්ත්‍රික් අතිරේක ලේකම් (ඉඩම් ) එස්. ගුණපාලන් වෙත බාර දීමටත් විරෝධයේ නිරත වු ධිවරයන් කටයුතු කර තිබුනි.
එම සන්දේශයේ පිටපත් ජනාධිපති, අගමැති, ධිවර ඇමැති සහ බලශක්ති අමාත්‍ය වෙත යොමු කිරීම සදහා කටයුතු කරන ලෙසත් ධිවරයෝ රජයේ පරිපාලන නිලධාරීන් දෙදෙනාගෙන් ඉල්ලා තිබුනි.
ඔවුන් ධීවරයන්ට පොරොන්දු වී ඇත්තේ තමන් කඩිනමින් ඒ සදහා කටයුතු කරන බවයි.
Facebook Comments
