බලය බෙදීමට විරුද්ධ ජවිපෙ බළලා මල්ලෙන් එලියට පනී

0
264
Ivory Agency Sri Lanka
wedding people
Loading...

ජාතික ප්‍රශ්නයට විසඳුමක් ලෙස දෙමළ ජනතාවට ස්වයං පාලනයක් හිමිවන බලය බෙදා හැරීමට ජනතා විමුක්ති පෙරමුණ ප්‍රමුඛ ජාතික ජන බලවේගය විරෝධය ප්‍රකාශ කර තිබේ.

ඒකාබද්ධ උතුරු නැගෙනහිරට බලය බෙදා හැරීම බෙදුම්වාදී යෝජනාවක් ලෙසයි එම පළාත් වෙන් කිරීමට රාජපක්ෂ ආණ්ඩු සමයේ උසාවි ගිය ජනතා විමුක්ති පෙරමුණ විසින් හඳුන්වා දී ඇත්තේ.

බලය බෙදීමට විරුද්ධ තම දීර්ඝ කාලීන ප්‍රතිපත්තිය අනුර කුමාර දිසානායක රටේ නායකයා කිරීමට වෙහෙසෙන ජවිපෙ විසින් නැවත අවධාරණය කරනු ලැබුවේ උතුර හා නැගෙනහිර එක්සත් කර පෙඩරල් පාලන බලයක් දීම ඇතුළු යෝජනා මාලාවක් ප්‍රධාන ධාරාවේ දෙමළ දේශපාලන පක්ෂ විසින් ප්‍රකාශයට පත් කර සතියක් ගතවෙද්දීය.

“බෙදුම්වාදීන්ගේ වුවමනාව වී තිබුණේ උතුරු නැගෙනහිර එක්කළාම බහුතර දෙමළ ජනතාවක් සිටින බව ජාත්‍යන්තරයට පෙන්වා වෙනම පාලන බලයක් ලබාගන්නයි. නමුත් ඒ තත්වය ශ්‍රේෂ්ඨාධිකරණය ලබාදුන් ඓතිහාසික නඩු තීන්දුවෙන් අහෝසිවී ගියා,” යි ජවිපෙ ප්‍රචාරක ලේකම් විජිත හේරත් 21 අඟහරුවාදා පැවති මාධ්‍ය හමුවක දී පැවසීය.

ජේ.ආර් ජයවර්ධන ජනාධිපතිවරයා ගැසට් නිවේදනයක් මගින් එක්කළ උතුරු නැගෙනහිර එක් කිරීම සහ මහින්ද රාජපක්ෂ ජනාධිපති ලෙස පත්වු සමයේ එම යෝජනාව දිර්ඝ කිරීමට ගත් තීරණය ජාතිවාදී ක්‍රියාවක් ලෙසයි ඔහු කියා සිටියේ.

කිසිම ජනතාවක් භූමි ප්‍රදේශය අනුව වෙන්නොකළ යුතු බවට යෝනා කරන විජිත හේරත් මන්ත්‍රීවරයා එක් පළාතකට, එක් කලාපයකට වෙනම පාලන බලයක්, ලබාදීමෙන් ජාතික සමගිය ගොඩනැගිය නොහැකි බව පවසා ඇත.

යුද සමයේ අත්පත් කරගත් ඉඩම් නිදහස් කරගැනීම සහ තරුණයන්ගේ රැකියා ප්‍රශ්න ඇතුළු ප්‍රශ්න සම්බන්ධයෙන් කර තිබෙන ඉල්ලීම් වලට “ප්‍රතිපත්තිමය වශයෙන්” තම පක්ෂය විරුද්ධ නොවන බව ද හෙතෙම සඳහන් කළේය.

ඉදිරි ජනාධිපතිවරණය සඳහා ජාතික සමගිය පිළිබඳව ප්‍රතිපත්ති ප්‍රකාශනයක්ද එළි දක්වා ඇති බව ජවිපෙ ප්‍රචාරක ලේකම් විජිත හේරත් පැවසු නමුත් ජාතික සමගිය ගොඩනංවන ආකාරය පිළිබඳව මාධ්‍ය හමුවේදී පැහැදිලි කර නැත.

එක්සත් ජාතින්ගේ ගණන් බැලීම් වලට අනුව හැත්තෑ දහසක් මරා දමමින් විසි එක් දහසකට වැඩි පිරිසක් අතුරුදහන් කළ සමයේදී දෙමළ කොටි විමුක්ති කොටි සංවිධානයට එරෙහිව දියත් කළ යුද්ධය සඳහා මහින්ද රාජපක්ෂ පාලනයට සහාය ලබා දුන් ප්‍රධානතම බලවේගයක් වුයේ ජනතා විමුක්ති පෙරමුණයි.

ඉන්දු-ලංකා ගිවිසුම අනුව සිදුකරන ලද 13 වැනි ව්‍යවස්ථා සංශෝධනය යටතේ පළාත් සභා පිහිටුවීමට එරෙහිව අසුව දශකය අගභාගයේ සන්නද්ධව සටන් වැදී බලය බෙදීම වෙනුවෙන් පෙනී සිටි දේශපාලකයන්, මාධ්‍යවේදීන්, කලාකරුවන් සහ වෘත්තීය සමිති නායකයන් ඇතුළු විශාල ජනකායක් ඝාතනය කළ ජවිපෙ පසු කලෙක පළාත් සභා වල මන්ත්‍රී ධුර ලබා ගැනීම වෙනුවෙන් සෑම මැතිවරණයකදීම තරග වැදී තිබේ.

Facebook Comments

Loading...