යෝජිත නව දේශීය ආදායම් පනත මඟින් ශ්‍රී ලංකාවේ බදුකරණය සරල කරන අතර එය ආයෝජක මිත්‍රශීලී පනතක් වනු ඇති බවට මුදල් හා ජනමාධ්‍ය අමාත්‍ය මංගල සමරවීර විශ්වාසය පල කරයි.
අමාත්‍යවරයා පෙන්වා දෙන්නේ වර්තමානයේ මෙරට පවත්නා බදු ක්‍රමය ඉතා සංකීර්ණ එකක් වන අතර එය අර්ථ කථනය කිරීම නව ආයෝජකයින්ට ඉතා දුෂ්කර වී ඇති බවයි.
නව පනත මඟින් බදු ක්‍රමය පුළුල් කර අන්තර් ජාතිකව පිළිගැනීමකට ලක්වූ දේශ සීමාන්තර වාණිජ කටයුතුවලට අදාළ ප්‍රතිපත්තීන්ද ඇතුළත් කර ඇති බවයි අමාත්‍යවරයා සඳහන් කරන්නේ.
දේශීය ආදායම් දෙපාර්තමේන්තුවේ වෘත්තීය සමිති නියෝජිතයන් සහ මංගල සමරවීර අමාත්‍යවරයා සමඟ පැවති හමුවේදී මෙම කරුණු සාකච්ඡා වී තිබේ.
යෝජිත නව පනත සම්බන්ධයෙන් හෝ බදු අය කිරීම සම්න්ධයෙන් වූ දෙපාර්තමේන්තුවේ ක්‍රියාකාරීත්වය පිළිබඳ යම් ගැටළුවක් පවතින්නේ නම් ඊට සාධනීය ප්‍රතිචාර දැක්වීමට තමා සූදානම් බවද මංගල සමරවීර අමාත්‍යවරයා එහිදී කියා සිටියේය.
එමෙන්ම වෘත්තීය සමිති නියෝජිතයින් හට මේ සම්බන්ධයෙන් යම් ගැටළුවක් ඇතොත් මුදල් අමාත්‍යාංශය වෙත ඉදිරිපත් කරන ලෙසට ද අමාත්‍යවරයා දැනුම් දුන් බව මුදල් හා ජනමාධ්‍ය අමාත්‍යාංශය පවසයි.
ශ්‍රී ලංකාවේ ජාතික ආදායමට අදාළව ප්‍රධාන දායකත්වයක් දෙන බදු අයකිරීම 2011 වසර සිට අඛණ්ඩව පහත වැටී ඇති අතර නව රජය මඟින් ගෙනයන ලද ප්‍රතිසංස්කරණ කටයුතු හේතුවෙන් බදු අයකිරීම මෑතකදී ඉතා ඉහළ මට්ටමට ළඟා වූ බව ඇමතිවරයා මෙහිදි හෙළි කළේය.
Facebook Comments
