රගර් ක්‍රීඩක වසීම් තාජුඩීන් ඝාතනයට ලක්වූ දින රාත්‍රීයේ එවකට නාරාහේන්පිට පොලීසියේ ස්ථානාධිපතිවරයාට ජනාධිපති ලේකම් කාර්යාලයෙන් ලැබුනේ යැයි කියන දුරකතන ඇමතුම්වල දත්ත මේ වනවිට පද්ධතියෙන් ඉවත් කර ඇතැයි අපරාධ පරීක්‍ෂණ දෙපාර්තමේන්තුව අධිකරණයට දැනුම් දුන්නා.
අද (24) වසීම් තාජුඩීන්ගෙ නඩුව කැඳව වු අවස්ථාවේදී රහස් පොලිසිය විසින් කොළඹ අතිරේක මහේස්ත්රාත් නිශාන්ත පීරිස් වෙත දැනුම් දී ඇත.
ජනාධිපති ලේකම් කාර්යාලයේ අතිරේක ලේකම්වරයෙකු අපරාධ පරීක්‍ෂණ දෙපාර්තමේන්තුව වෙත ලබා දුන් ප්‍රකාශයදී පවසා ඇත්තේ නඩත්තු සේවයේ යෙදි සිටි නිලධාරීන් විසින් අදාළ දත්ත ඉවත් කර ඇති බවට බව වැඩිදුරටත් රහස් පොලිසිය අධිකරණයට ප්රකාශ කර සිටියා.
නඩත්තු සේවයේ යෙදී සිටි සේවකයින් මේ වන විටත් සේවයෙන් ඉවත් වි ඇතැයිද විමර්ශනවලින් හෙළි වී තිබෙනවා.
ඒ අනුව අදාළ දත්ත ගබඩාවී තිබූ යන්ත‍්‍රය සිය භාරයට ගත් බවයි අපරාධ පරික්‍ෂණ දෙපාර්තමේන්තුව කොළඹ අතිරේක මහේස්ත්රාත් අධිකරණයට දැනුම් දුන්නේ.
අදාළ දත්ත ඉවත් කළ බව කියන නඩත්තු සේවකයන් සම්බන්ධයෙන්ද විමර්ශන ආරම්භ කර ඇති බවද වැඩිදුරටත් මෙහිදී ප්රකාශ කෙරුණා.
අධිකරණ වෛද්‍යවරයා වග කිව යුතුයි
මේ අතර තාජුඩීන්ගේ සිරුරු කොටස් අතුරුදහන් වීම සම්බන්ධයෙන් එවකට කොළඹ අධිකරණ වෛද්‍ය ප්‍රධානී වෛද්‍ය ආනන්ද සමරසේකර වගකිවයුතු බව සෞඛ්‍යය අමාත්‍යාංශය අද කොළඹ මහේස්ත්රාත් අධිකරණයට දැනුම් දුන්නේය.
සෞඛ්‍යය අමාත්‍යංශයේ ලේකම්වරයා අධිකරණයට ලිපියක් ඉදිරිපත් කරමින් කියා සිටින්නේ, තාජුඩීන්ගේ ශරීර කොටස් අතුරුදහන් වීම සම්බන්ධයෙන් සිය අමාත්‍යංශයේ හදිසි වැටලීම් අංශය මගින් පරීක්ෂණයක් සිදු කෙරුණ බවයි.
වෛද්‍ය සමරසේකර මේ වන විට විශ්‍රාම ගොස් ඇති නිසා ඔහු සම්බන්ධයෙන් රහස් පොලිසිය හරහා ක්‍රියාමාර්ග ගැනීම සුදුසු බවයි සෞඛ්‍යය අමාත්‍යාංශය අධිකරණයට දන්වා සිටියේ.
ඉදිරිපත් වූ කරුණු සලකා බැලූ අධිකරණය මෙම නඩුවේ සැකකරුවන් ලෙස නම් කර සිටින හිටපු නියෝජ්‍ය පොලිස්පති අනුර සේනානායක සහ පොලිස් පරීක්ෂක සුමිත් පෙරේරා ලබන මස හත් වෙනිදා තෙක් තවදුරටත් රිමාන්ඩ් භාරයේ තැබීමට නියෝග කළේය.
Facebook Comments
