දරුණු ආර්ථික හා දේශපාලනික අර්බුදයක ගිලී සිටින ශ්‍රී ලංකාවේ 26 වන අග්‍රාමාත්‍යවරයා ලෙස එක්සත් ජාතික පක්ෂ නායකයා අද ජනාධිපතිවරයා ඉදිරියේ දිවුරුම් දුන්නේය.
ඒ සමඟම හය වතාවක් රටක අග්‍රාමාත්‍යවරයා ලෙස පත්වූ ලොව එකම දේශපාලකයා ලෙස රනිල් වික්‍රමසිංහ ඉතිහාසගත වන අතර එය ලෝක වාර්තාවක් ලෙස ද සැලකේ.
විසිවන ආණ්ඩුක්‍රම ව්‍යවස්ථා සංශෝධනයෙන් බලවත් වූ ජනාධිපතිවරයකු යටතේ තුනෙන් දෙකක බලයක් සහිත ආණ්ඩුවක් පැවති අවස්ථාවක තනි මන්ත්‍රීවරයකු ලෙස පාර්ලිමේන්තුවට පැමිණි රනිල් වික්‍රමසිංහ රටේ අග්‍රාමාත්‍ය ධුරයට පත්වීම සුවිශේෂී කාරණයකි.
අවසන් වරට පැවති පාර්ලිමේන්තු මැතිවරණයෙන් එක්සත් ජාතික පක්ෂය ඉතිහාසයේ පෙර නොවු විරු ලෙස පරාජයට පත්වු අතර රනිල් වික්‍රමසිංහ ද ඉන් පරාජයට විය.
කෙසේ වෙතත් එම පක්ෂයට ලැබුණු එකම ජාතික ලයිස්තු මන්ත්‍රී ධුරයට පත්වෙමින් එක්සත් ජාතික පක්ෂ නායකයා රනිල් වික්‍රමසිංහ පාර්ලිමේන්තුවට පැමිණියේය.
තම පක්ෂයට හිමි එක් මන්ත්‍රී ධුරයෙන් පමණක් රනිල් වික්‍රමසිංහ අගමැති ධුරයට පත්වීම ද ශ්‍රී ලංකාවේ දේශපාලනයට ඉතිහායට එක් වු විශේෂ කරුණක් වනු ඇත.
Facebook Comments
