නූපන් දරුවන්ගේත් හිමිකම් කෙලෙසන බවට ආණ්ඩුවට චෝදනා (VIDEO)

0

අලුතින් රාජ්‍ය සේවයට එක්වන දසදහස් සංඛ්‍යාත කාන්තා බලකායක ප්‍රසූත නිවාඩු හරි අඩකින්ම කප්පාදු කිරීම සඳහා සම්මත රෙගුලාසි වලට පටහැනිව රජය ගෙන ඇති පියවර සම්බන්ධයෙන් දිවයිනේ පුද්ගලික අංශයේ මුල් පෙලේ වෘත්තීය සමිති වල විරෝධය පළ වී තිබේ.

රජයේ සේවයේ යෙදී සිටින මව්වරුන් මේතාක් භුක්ති විඳි සති දොළහක ප්‍රසූත නිවාඩු වෙනුවට මේ අවුරුද්දේ බඳවාගන්නා ලද උපාධිධාරිනියන්ට ලබා දෙන්නේ සති හයක් පමණි.

රාජ්‍ය කාර්ය මණ්ඩලවල කාන්තාවන්ට හිමිව තිබු දින 84 ප්‍රසුත නිවාඩුව නව රජය විසින් දින 42 ක් දක්වා අඩු කිරීම, එක්සත් කම්කරු සම්මේලනය විසින් පෙන්වා දෙන්නේ ඉපදීමට සිටින දරුවන්ගේද මුලික මානව හිමිකම් කඩකිරීමක් ලෙසිනි.

“ඒ දරුවා ජීවත් වෙන්නනම් ඒ දරුවට පෝෂණය තියෙන්න ඕනේ. ඒ පෝෂණය ලබා දෙන්නනම් අම්මට තමන්ගේ දරුවට කිරි ටික දෙන්න නිවාඩු තියෙන්න ඕනේ.”

මැතිවරණ සමයේදී තමන්ගේ දරුවන් මෙන් අනුන්ගේ දරුවන් වඩාගෙන රඟ පෑ පාලකයන් අද වන විට නුපන් දරුවන්ගේ මානව අයිතිවාසිකම් පවා උල්ලංඝණය කර ඇති බවයි එක්සත් කම්කරු සම්මේලනයේ වැඩ බලන ලේකම්වරයා පවසන්නේ.

වෘත්තිය සමිති නායක සුරංජය අමරසිංහ ආණ්ඩුවට එම චෝදනාව එල්ල කළේ “කිරි දෙන්න ඉඩ දෙන්න” මැයෙන් දෙසැම්බර් 24 බ්‍රහස්පතින්දා ඒකාබද්ධ සංවර්ධන නිලධාරී මධ්‍යස්ථානය විසින් කොළඹදී පැවැත්වු ඒකාබද්ධ මාධ්‍ය හමුවක් අමතමිනි.

වෘත්තිය සමිති, බහු ජන සංවිධාන හා කාන්තා සංවිධානවලද සහභාගිත්වයෙන් පැවැති මාධ්‍ය හමුවෙන් පසුව, ප්‍රසුත නිවාඩු කප්පාදුවට එරෙහිව ඒකාබද්ධ ප්‍රකාශයකට අත්සන් තැබීමද ඔවුන් විසින් සිදු කර තිබුනි.

එම මාධ්‍ය හමුවේදී එක්සත් කම්කරු සම්මේලනයේ වැඩ බලන ලේකම් සුරංජය අමරසිංහ තව දුරටත් අවධාරණය කළේ පෞද්ගලික අංශයේ සේවිකාවන්ගේ ප්‍රසුත නිවාඩු සදහා තිබු විශමතාවයන් වෙනස් කර ගැනීමට හැකි වුයේද රාජ්‍ය අංශයේ එවකට තිබු දින 84 ක ප්‍රසුත නිවාඩුව ඇතුලු අයිතිවාසිකම් පදනම් කොටගෙන බවයි.

ලබ්බට තිබූ අත

පුද්ගලික අංශයේ පාලනාධිකාරිය ඉදිරියේදී ආණ්ඩුවේ ක්‍රියා කළාපය ආදර්ශයට ගැනීමට ඇති හැකියාව සම්බන්ධයෙන්ද සුරංජය අමරසිංහ එහිදී අනතුරු ඇගවීය.

“රාජ්‍ය අංශයේ මේ නිවාඩු කප්පාදුවෙන් කරන්න හදන්නේ, ඊට පස්සේ අර කතාවක් තියනවා ලබ්බට තිබ්බ අත පුහුලට තියන් නැද්ද කියලා. එතකොට මේ කරන්න යන්නේ ඒකද? ”

මාධ්‍ය හමුවේදී අදහස් දක්වමින් ඒකාබද්ධ සංවර්ධන නිලධාරී මධ්‍යස්ථානයේ ලේකම් ධම්මික මුණසිංහ පෙන්වා දුන්නේ ආණ්ඩුව විසින් පසුගිය සැප්තැම්බර් 2 දින අභ්‍යාස ලාභි උපාධිධාරීන් ලෙස රාජ්‍ය සේවයට බදවා ගත් පිරිසෙන් බහුතරයක් වන උපාධිධාරිනියන්ගේ ප්‍රසුත නිවාඩුව හරි අඩකින් කප්පාදු කර ඇති බවයි.

“එතකොට ඒ පත්වීමේ ලිපියේ හත්වෙනි වගන්තියේ පැහැදිලිව සදහන් වෙනවා දරු ප්‍රසුතියක් සදහා නම් එය සිදු වු දින සිට දරුවාගේ පෝෂණ කටයුතු වෙනුවෙන් සති හයක කාලයක් ලබා දෙනවා කියලා. සති හයක් කියන්නේ දින 42 යි. මේකත් අඛණ්ඩ දින 42 ක්. සෙනසුරාදා ඉරිදා ඇතුලුව.”

වෘත්තිය සමිති නායක ධම්මික මුණසිංහ එහිදී තව දුරටතේ පෙන්වා දුන්නේ අභ්‍යාස ලාභි උපාධිධාරීන් ලෙස 2018 සහ 2019 වසර වල රාජ්‍ය සේවයට එක්වු උපාධිධාරිනියන්ගේ පත්වීම් ලිපි වල පැහැදිලිව දින 84 ක ප්‍රසුත නිවාඩුව හිමිකමක් ලබා දී ඇති බවයි.

එවැනි තත්වයක් යටතේ 2020 වසරේ බදවා ගැනීම් තුලදී කාන්තාවන්ගේ ප්‍රසුත නිවාඩුව කප්පාදු කළේ කුමන පදනමකින්ද යන්න ඔහු නැවත නැවතත් ප්‍රශ්න කළේය.

ජනාධිපති ගෝඨාභය රාජපක්ෂ යටතේ වූ රජය කර ඇති මාතෘ නිවාඩු කප්පාදුව රජයේ රැකියා සම්බන්ධ මාර්ගෝපදේශය වන ආයතන සංග්‍රහය උල්ලංඝනය කුරීමක් බව වෘත්තීය සමිති නායකයා පෙන්වා දෙයි.

“කිරි දෙන්න ඉඩ දෙන්න” මාධ්‍ය හමුව සහ එම ඉල්ලීම රැගත් ඒකාබද්ධ ප්‍රකාශයට අත්සන් තැබීමට පහත දැක්වෙන සංවිධාන එක්ව සිටියහ:

රජයේ පවුල් සෞඛ්‍ය සේවා සංගමය
කිතුසර සංවිධානය
සෞඛ්‍ය සේවක මධ්‍යස්ථානය
ලංකා ගුරු සංගමය
කම්කරු අරගල මධ්‍යස්ථානය
ස්වාධීන ලංකා ගුරු සංගමය
ලංකා බැංකු සේවක සංගමය
නිදහස උදෙසා කාන්තා ව්‍යාපාරය
ප්‍රොටෙක්ට් වෘත්තීය සමිතිය
ඒකාබද්ධ ගුරු සේවා සංගමය
ඉඩම් හා කෘෂිකර්ම ප‍්‍රතිසංස්කරණ ව්‍යාපාරය
එක්සත් කම්කරු සම්මේලනය
ඒකාබද්ධ රැකියා විරහිත උපාධිධාරී සංගමය
නිමිභාණ්ඩ, ඇගලුම් හා රෙදිපිලි සේවක සංගමය

Facebook Comments

wedding people