මුස්ලිම් කවියා පැවරූ නඩුවට උත්තර දෙන්න නීතිපති නෑ

කාව්‍ය සංග්‍රහයක් ලියා පලකිරීම නිසා ත්‍රස්ත නීති යොදාගෙන හිරගත කරන ලද මුස්ලිම් කවියකුගේ නිදහස ඇතුළු මූලික අයිතිවාසිකම් තහවුරු කර දෙන ලෙස ඉල්ලා ගොනු කළ පෙත්සමක් විභාග කිරීම නීතිපති දෙපාර්තමේන්තුවේ සහභාගිත්වයක් නොමැති වීමෙන් කල් දමා තිබේ.

මන්නාරමුදු අහ්නාෆ් නමින් දෙමළ පාඨක ප්‍රජාව අතර ප්‍රකට තරුණ කවියකු වන අහ්නාෆ් ජසීම් වෙනුවෙන් පෙනී සිටින නීතිඥ සංජය විල්සන් ජයසේකර පවසන්නේ නීතිපති දෙපාර්තමේන්තුව හෝ වගඋත්තරකරුවන් වෙනුවෙන් පෙනී සිටින පාර්ශවයන් ජුලි 1 බ්‍රහස්පතින්දා අධිකරණයට පැමිනි නොසිටි නිසා විනිසුරුවරයා නඩුව ජුනි 06දා දක්වා කල් තැබු බවයි.

ඒ මොහොතේ අධිකරණයේ සිටි රජයේ නීතිඥයා දිනය සටහන් කර ගත් බව නීතිඥ සංජය විල්සන් සමාජ මාධ්‍ය ඔස්සේ නිවේදනය කර තිබේ.

ත්‍රස්ත මර්දන හා විමර්ශන කොට්ඨාශය (CTID) විසින් අහ්නාෆ් ජසීම් අත් අඩංගුවට ගන්නා ලද්දේ 2017 දී ලියා පලකළ නවරසම් (நவரசம்) දෙමළ පද්‍ය සංග්‍රහය ගැන සහ සිය ශිෂ්‍යයන් ‘අන්තවාදී මතවාදවල’ අනුගාමිකයන් බවට පත් කිරීමේ අභිලාෂයෙන් ඔවුන් ‘අන්තවාදී’ කරුණුවලට නිරාවරණය කළ බවට චෝදනා කරමිනි.

වසරකට වැඩි කාලයක් ත්‍රස්ත මර්දන හා විමර්ශන කොට්ඨාශය මගින් රඳවාගෙන සිටි ඔහු පසුගිය මාසයේ අධිකරණයට ඉදිරිපත් කිරීමෙන් පසු රිමාන්ඩ් කර තිබුනි.

අත්අඩංගුවේ සිටින අහ්නාෆ් ජසීම් කවියා වෙනුවෙන් ඔහුගේ නීතිඥයන් විසින්, ආරක්ෂක ලේකම්, පොලිස්පති, ත්‍රස්ත විමර්ශන කොට්ඨාසය සහ නීතිපතිට එරෙහිව, (අංක SC FRA 114/2021 දරණ) මූලික අයිතිවාසිකම් නඩුව ශ්‍රේෂ්ඨාධිකරණයේ ගොනු කර තිබුනේ අප්‍රේල් 16 දිනයි.

අත්තනෝමතික ලෙස අත්අඩංගුවට ගනු ලැබීම, රඳවා තබා ගැනීමට සහ වධහිංසා පැමිණවීමට භාජනය නොවීමේ නිදහස සහ අදහස් ප්‍රකාශ කිරීමේ නිදහස ඇතුළු ඔහුගේ මූලික අයිතිවාසිකම් උල්ලංඝනය වී ඇති බව පෙන්වා දෙන පෙත්සම මගින් ඉල්ලා තිබුනේ අහ්නාෆ් ජසීම් නිදහස් කොට රුපියල් කෝටි දහයක වන්දි ඇතුළු සහන කිහිපයක් ලබා දෙන ලෙසයි.

යුරෝපා ආණ්ඩුවලින් ඉල්ලීම්

ශ්‍රී ලංකාවට ලබාදෙන GSP+ සහනය පුද්ගල නිදහස ඇහිරීම සඳහා ත්‍රස්තවාදය වැළක්වීමේ පනත යොදාගැනීම නිසා අහෝසි කරන බවට යුරෝපා සංගමය මේ වනවිට අනතුරු අඟවා තිබේ.

අවුරුද්දකට වැඩි කාලයක් අත්තනෝමතික ලෙස සිරකොට තබාගෙන සිටින අහ්නාෆ් ජසීම් කවියා වහාම නිදහස් කරන ලෙස 2021 ජුනි මාසයේදී යුරෝපා රටවල් සමූහයක් ශ්‍රී ලංකාවේ ආණ්ඩුවට බල කර තිබුනි.

කවියා මෙන්ම නඩු නැතිව රඳවා ගෙන සිටින මානව හිමිකම් නීතිඥ හෙජාස් හිස්බුල්ලා සහ හිටපු CID අධ්‍යක්ෂ ශානි අබේසේකර ගැනද යුරෝපයේ අවධානය යොමු වීමෙන් අනතුරුව අධිකරණය විසින් උසස් පොලිස් නිලධාරියා ඇප මත මුදා හරින ලදී.

එක්සත් ජාතීන්ගේ සංවිධානයේ රටවල් නමයක් නියෝජනය කරන තානාපතිවරුන් තම ඉල්ලීම ඉදිරිපත් කර තිබුනේ ත්‍රස්තවාදය වැළක්වීමේ පනත යොදාගෙන අත්අඩංගුවට ගන්නා ලද කිවියර හා ගුරුවර අහ්නාෆ් ජසීම් නඩු නැතිව රඳවා තබාගෙන අවුරුද්දක් පිරුණු පසුගිය මාසයේ ජාත්‍යන්තර මානව හිමිකම් සංවිධාන රැසක් කළ ඉල්ලීමෙන් අනතුරුවය.

“ජසීම් මහතා වහාම නිදහස් කරන ලෙස, එසේත් නැතිනම් සාධාරණ නඩු විභාගයක අයිතිය සහතික කරමින්, ජාත්‍යන්තර මානව හිමිකම් ප්‍රමිතීන්ට අනුගතව කඩිනමින් චෝදනා ගොනුකරන ලෙස ඉල්ලීම සඳහා අපි මානව හිමිකම් සංවිධාන ගණනාවක් සමග එක්වන්නෙමු,” යි නිවේදනයේ සඳහන් වේ.

“තවත් කල්පමා නොකර ත්‍රස්තවාදය වැලැක්වීමේ පනත පුනරීක්ෂණය කරන ලෙස නැවතත් ශ්‍රී ලංකාවේ ආණ්ඩුවෙන් ඉල්ලා සිටින අපි ත්‍රස්තවාදයට එරෙහිව සටන් වැදීම සඳහා වන ඕනෑම නීතියක් ජාත්‍යන්තර මානව හිමිකම් සහ මානුෂික නීති සම්බන්ධයෙන් රාජ්‍යයට ඇති බැඳීමට සම්පූර්ණයෙන්ම අනුකූල විය යුතුය,” යි බ්‍රිතාන්‍යය, එස්තෝනියාව, ස්පාඤ්ඤය, පින්ලන්තය, ප්‍රංශය, ජර්මනිය, ලක්සම්බර්ග්, නෙදර්ලන්තය හා ස්වීඩනය යන රටවල මානව හිමිකම් පිළිබඳ තානාපතිවරුන් නිකුත් කළ නිවේදනයේ වැඩිදුරටත් කියා සිටී.

ශ්‍රී ලංකාවේ වාර්ගික හා ආගමික සුළුතරයට එරෙහිව ත්‍රස්තවාදය වැළක්වීමේ පනත යොදාගෙන තිබෙන අතර වාර්ගිකත්වයට සමානුපාතික නොවන දෙමළ හා මුස්ලිම් පිරිසක් එම පනත යටතේ රඳවා තබා තිබෙන බව ජාත්‍යන්තර මානව හිමිකම් සංවිධාන අහ්නාෆ් ජසීම්ගේ නිදහස වෙනුවෙන් පසුගිය මාසයේ නිකුත් කළ නිවේදනයෙන් අවධාරණය කර තිබුණි.

ඊට අත්සන් තබා තිබුනේ පෙන් ජාත්‍යන්තරය (PEN), ජාත්‍යන්තර ක්ෂමා සංවිධානය (AI), ශ්‍රී ලංකාවේ සාමය හා යුක්තිය සඳහා ව්‍යාපාරය (SLC), ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS), ශ්‍රී ලංකාව පිළිබඳ ක්‍රියාකාරී සංවිධානය (IWG), ශ්‍රී ලංකාවේ සත්‍යය හා යුක්තිය සඳහා ජාත්‍යන්තර ව්‍යාපෘතිය (ITJP), යුක්තිය හා වගවීම සඳහා මධ්‍යස්ථානය (CJA), ජාත්‍යන්තර යුක්තිය සඳහා ඕස්ට්‍රේලියානු මධ්‍යස්ථානය (ACIJ), Article 19, Human Rights Watch, IMADR, PEARL සහ Freemuse යන සංවිධානයි.