හිටපු රහස් පොලිස් ලොක්කා පොලිස්පතිගෙන් ජීවිතාරක්ෂාව ඉල්ලයි

තමන් මෙහෙය වූ අපරාධ පරීක්ෂණ හේතුවෙන්, බලවත් දේශපාලනඥයන්, උසස් හමුදා සහ පොලිස් නිලධාරීන් ඇතුළු බොහෝ දෙනෙකුගේ කෝපයට පාත්‍ර වූ ජ්‍යෙෂ්ඨ රහස් පොලිස් පරීක්ෂකයෙක්, සිය ජීවිතයට අනතුරක් තිබෙන බවට බිය පල කර තිබේ.

වසර 35ක සේවා කාලයක් නිම කරමින් පොලිස් සේවයෙන් විශ්‍රාම යෑමට දින කිහිපයකට පෙර සිය ජීවිතයට ඇති තර්ජන සම්බන්ධයෙන් පොලිස් ප්‍රධානියාට ලිපියක් යවන ශ්‍රී ලංකාවේ අපරාධ පරීක්ෂණ දෙපාර්තමේන්තුවේ (CID) හිටපු ප්‍රධානී ඥානේන්ද්‍ර ශානි අබේසේකර, තමාට සහ තම පවුලේ අයගේ ආරක්ෂාව සලසන ලෙස ඉල්ලා තිබේ.

1986 පෙබරවාරි මස 10 වැනිදා ආධුනික උප පොලිස් පරීක්ෂකවරයෙකු ලෙස පොලිස් සේවයට එක්වු ශානි අබේසේකර 2021 ජුනි 30 වැනිදා විශ්‍රාම දිවියට පා තබා තිබුනි.

ජනාධිපති ගෝඨාභය රාජපක්ෂ බලයට පත්වූ සැණින් අපරාධ පරීක්ෂණ දෙපාර්තමේන්තුවේ අධ්‍යක්ෂ ධුරයෙන් ශානි අබේසේකර ඉවත් කරන ලදී. අනතුරුව කුලියට මිනීමැරීමේ කොන්ත්‍රාත්තුවක් සම්බන්ධයෙන් වැරදිකරු වූ පොලිස් නිලධාරියකු ඇතුළු කණ්ඩායමක් සිරගත කිරීම සඳහා සාක්ෂි ගොතන ලද්දේය යන චෝදනාව මත ඔහු රඳවා තබනු ලැබීනි.

මාස දහයකට වැඩි කාලයක් රිමාන්ඩ් බන්ධනාගාරයේ රඳවා සිටි ඔහු පසුගිය මාසයේ ඇප මත නිදහස් කෙරුනි.

වින්දිතයන් සහ සාක්ෂිකරුවන් ආරක්ෂා කිරීමේ පනත මගින් නියම කර ඇති පරිදි තමන්ගේ ආරක්ෂාව තහවුරු කිරීමට වහාම පියවර ගන්නා ලෙස ශානි අබේසේකර සිය ලිපිය මගින් පොලිස්පතිවරයාගෙන් ඉල්ලා තිබේ.

“… මාගේ රාජකාරීමය ක්‍රියාකාරිත්වය හේතුවෙන් විවිධ අපරාධ වලට වගකිවයුතු ප්‍රභල දේශපාලඥයින්ගෙන්, උසස් පොලිස් නිලධාරීන්ගෙන්, යුධ හමුදා සහ නාවූක හමුදා නිලධාරීන්ගෙන්ද, සංවිධානාත්මක අපරාධ කල්ලි වල සාමාජිකයින්ගෙන් සහ ත්‍රස්තවාදී සංවිධාන වල ප්‍රභලයින්ගෙන් මා හට සහ මගේ මාගේ පවුලේ සාමාජිකයින්ගේ ජීවිත වලට නිරන්තරයෙන් තර්ජන ඇති බව…” පොලිස්පති චන්දන ඩී වික්‍රමරත්නට ලියා ඇති ලිපියේ සඳහන් වෙයි.

“… මා අත් අඩංගුවට ගෙන රක්‍ෂිත බන්ධනාගාරගත කිරීමට කටයුතු කරන ලද පොලිස් නිලධාරීන් හා ඔවුන්ව අධීක්ෂණය කරනු ලබන පොලිස් නිලධාරීන්ගේ පුර්ව ක්‍රියාකාරකම් සහ ඔවුන් මාධ්‍යට සිදු කරන ලද ප්‍රකාශයන් කෙරෙහි අවධානය යොමු කිරීමේදී, මා හට සහ මගේ පවුලේ සාමාජිකයන් හට ඉතා අත්‍යාසන්න හා ප්‍රබල ජීවිත අවධානමක් ඇති බව ප්‍රකටව පෙනී යන හෙයින් මා හට සහ මාගේ පවුලේ සාමාජිකයින්ගේ ජීවිත අනාරක්ෂිත බව වැටහෙන බැවින් අපගේ ආරක්ෂාව සැලසීම සඳහා පූර්වගාමීව ලබාදී තිබූ ආරක්ෂක විදිවිධාන කඩිනමින් නැවත ලබාදෙන ලෙස කාරුණිකව ඉල්ලා සිටිමි.”

හිටපු රහස් පොලිස් නිලධාරියා ඔහු යටතේ විමර්ශනය කර ඇති නඩු 82 ක ලැයිස්තුවක් ද ඉදිරිපත් කර තිබේ.

මේ නඩුවලින් බොහොමයක් අවසාන වි තිබෙන්නේ සැක කරුවන්ට දඬුවම් නියම කිරීමෙනි. ඔවුන් අතරින් අයකු වන හිටපු නියෝජ්‍ය පොලිස්පති වාස් ගුණවර්ධන සැලකෙන්නේ ජනාධිපති ගෝඨාභය රාජපක්ෂගේ සමීපතමයෙක් ලෙසයි.

පැහැරගෙන යාම්, වධහිංසා පැමිණවීම්, අතුරුදහන් කිරීම් සහ අධිකරණමය නොවන ඝාතන ආදිය සම්බන්ධයෙන් දැනට පවතින ඉහළ පෙළේ නඩු කිහිපයකට, ජ්‍යෙෂ්ඨ හමුදා සහ නාවික හමුදා නිලධාරීන් ඇතුලත්ව සිටින අතර, එහි දී හිටපු නාවික හමුදාපතිවරුන් දෙදෙනකු ද සැකකරුවන් ලෙස නම් කෙරී තිබේ.

මාධ්‍යවේදී කීත් නොයාර් පැහැරගෙන ගොස් වධහිංසා පැමිණවීම, ‘සන්ඩේ ලීඩර්’ පුවත්පතේ කර්තෘ ලසන්ත වික්‍රමතුංග ඝාතනය, කාටූන් ශිල්පී ප්‍රගීත් එක්නැලිගොඩ පැහැරගෙන යෑම හා බලහත්කාරයෙන් අතුරුදහන් කිරීම සහ මාධ්‍යවේදී උපාලි තෙන්නකෝන්ට පහරදීම යනාදිය මාධ්‍යවේදීන් මැදිකරගත් සිද්ධීන් ය.

මේ සිදුවීම් සම්බන්ධයෙන් ද ඉහළ හමුදා නිලධාරීන් කිහිප දෙනකු සැකකරුවන් ලෙස නම් කෙරී තිබේ.

පිරිමි ළමුන් පස් දෙනකුද ඇතුළුව තරුණයන් එකොලොස් දෙනකු පැහැරගෙන ගොස් බලහත්කාරයෙන් අතුරුදහන් කිරීම සම්බන්ධයෙන් නාවික හමුදාව චෝදනා ලබා සිටින අතර; වැලිකඩ බන්ධනාගාරයේ රැඳවියන් 27 දෙනෙකුගේ සමූල ඝාතනයට සැකපිට අධිකරණය ඉදිරියේ සිටින්නේ පොලිස් කාර්ය සාධක බලකා නිලධාරින් ය.

මෙම අපරාධ සියල්ලම සිදු වූයේ වත්මන් ජනාධිපති ගෝඨාභය රාජපක්ෂ තම සහෝදර මහින්ද රාජපක්ෂ ජනාධිපති හා ආරක්ෂක අමාත්‍ය පදවි දරන කල්හි ඔහු යටතේ මහබලැති ආරක්ෂක ලේකම් ලෙස ක්‍රියාකරමින් සිටි අවස්ථාවේ දී ය.

එක්සත් ජාතීන් විසින් මෙම සිද්ධීන් ‘නිදර්ශනාත්මක නඩු’ ලෙස හඳුන්වා ඇත.

භාරත ලක්ෂ්මන් ප්‍රේමචන්ද්‍ර ඝාතනයට එල්ලුම් ගසට නියමවී සිටියදී ජනාධිපතිවරයා විසින් විශේෂ සමාවක් දී නිදහස් කර යවනු ලැබූ මහින්ද රාජපක්ෂ පාලන සමයේ හිටපු ආරක්ෂක අමාත්‍යාංශ අධීක්ෂණ මන්ත්‍රී දුමින්ද සිල්වා වරදකරු කිරීම සඳහා පරීක්ෂණ මෙහෙයැවූයේද ශානි අබේසේකරය.

හමුදා නිලධාරීන්ට එරෙහිව පියවර ගැනීම නිසා ප්‍රකෝපයට පත් වූ බව හැඟී යන අයකු තමන් වෙත එල්ල කරන ලද බව පැවසෙන තර්ජනයක් සම්බන්ධයෙන් 2020 ජනවාරියේදී සිය රාජකාරි අත්හිටුවනු ලැබීමෙන් පසු ශානි අබේසේකර විසින් පොලිස් ප්‍රධානියාට ලිපියක් යවා තිබුණි.

“තොගෙන් පලිය ගන්න කලින් තොගේ ඇස් දෙකට පේන්න තොගේ ගෑනිගෙයි දරු දෙන්නගෙයි මිනීවලට කරගහන්න ලෑස්ති වෙලා හිටපන්. බලපං තොටයි තොගේ පවුලටයි අපි කරන දේ බලල අපිට කොච්චර සතුටු වෙන්න පුලුවන්ද, තෝ වේසිගේ පුතා රණවිරුවොන්ට කරපු දේට තෝව කීයටවත් පණ පිටින් තියන්නේ නෑ. තෝ යන යන තැන අපිට පේනවා. රණවිරුවන්ට කරපු දේට තොට හෙන හතම ගහපන්. මේක අපේ වාරේ කියලා දැන ගනින්,” යනුවෙන් පිරිමියකු කාන්තා කටහඬින් තර්ජනය කළ බව එම ලිපියේ දැක්වේ.

මිලිටරි හා පොලිස් නිලධාරීන්ද පටලැවුනු සිදුවීම් සම්බන්ධයෙන් ශානි අබේසේකර යටතේ බොහොමයක් පරීක්ෂණ කටයුතු වල නියැලී සිටි රහස් පොලිසියේ ප්‍රධාන පොලිස් පරීක්ෂක නිශාන්ත ද සිල්වා 2019 නොවැම්බරයේ පැවැති ජනාධිපතිවරණයෙන් ගෝඨාභය රාජපක්ෂ ජයග්‍රහණය කළ විගසින් රටහැර පලා ගියේය.