මහින්ද අගමැති කළ “රාජද්‍රෝහී කුමන්ත්‍රණයට” ජවිපෙ දඬුවම් ඉල්ලයි (VIDEO)

0

ජනාධිපතිවරයා විසින් මහින්ද රාජපක්ෂ අගමැති ධුරයට පත් කළ රාජ්‍ය ද්‍රෝහි කුමන්ත්‍රණයට එරෙහිව පාර්ලිමේන්තුව හරහා දඬුවම් ලබා දිය යුතු බව ජනතා විමුක්ති පෙරමුණ අවධාරණය කර සිටී.

පාර්ලිමේන්තුව හරහා ගෙන එන පනතක් මඟින් නිසි බලතල සහිත කොමිෂන් සභාවක් හරහා කුමන්ත්‍රණය හෙළිදරව් කර එයට හවුල් වු සියලු දෙනාට දඬුවම් කළ යුතු බවයි ජවිපෙ නායකයා පවසන්නේ.

“රාජද්‍රෝහී කුමන්ත‍්‍රණවලට පිළිතුරක් ලබාදිය යුතුයි. එනිසා මෙම දේශපාලන කුමන්ත‍්‍රණයට හවුල්වූවන්ට දඬුවම් ලබාදීම වෙනුවෙන් පාර්ලිමේන්තුව මැදිහත්වී පනතක් සම්මත කරගැනීමෙන් කොමිසමක් පත්කළ යුතු බව අපි අවධාරණය කරනවා.”

කුමන්ත්‍රණයේ පසෙක සිටිමින් මාධ්‍යයද ඊට සහාය ලබා දුන් බවට චෝදනා කළ අනුර කුමාර දිසානායක දේශපාලන කුමන්ත‍්‍රණයක් සිදුවනව විට ඊට එරෙහිව ජනතාව දැනුවත් කිරිමේ කාර්ය මාධ්‍ය විසින් පැහැර හැරි බවද කියා සිටියේය.

“රටේ මාධ්‍ය ආයතන කුමන්ත‍්‍රණකරුවන්ගේ පැත්තේ සිට කි‍්‍රයාකිරීම සම්බන්ධයෙන්ද වග විභාග කළ යුතුව තිබෙනවා. මෙවැනි දේශපාලන කුමන්ත‍්‍රණයක් සිදුවන විට ඊට එරෙහිව ජනතාව දැනුවත් කිරීමට මාධ්‍යවලට විශාල කාර්යභාරයක් තිබෙනවා. නමුත් අපේ රටේ මාධ්‍ය ආයතන වැඩි ප‍්‍රමාණයක් සිටගත්තේ කුමන්ත‍්‍රණකරුවන්ගේ පැත්තේ.”

කුමන්ත්‍රණකරුවන්ට දඬුවම් කර විධායක ජනාධිපති ධුරය අහෝසි කිරිමෙන් අනතුරුව බහුතර කැමැත්තෙන් පාර්ලිමේන්තුව විසුරුවා නව ජන වරමක් ලබා ගත යුතු යැයි ද අනුර කුමාර දිසානායක 12 සඳුදා පැවති මාධ්‍ය හමුවක දී ප්‍රකාශ කළේය.

දේශපාලන අර්බුදයට ජනාධිපති මෛත්‍රීපාල සිරිසේන සහමුලින්ම වගකිව යුතු බව කී ජනතා විමුක්ති පෙරමුණේ නායක අනුර කුමාර දිසානයක ජනාධිපතිවරයා තමන් කළ වරදට ජාතියෙන් සමාව ගත බව ද වැඩි දුරටත් කියා සිටියේය.

Facebook Comments

wedding people