පවතින දේශපාලන අර්බුදය අවසන් කිරීමට ව්‍යවස්ථාවට අනුව කටයුතු කරන ලෙස රනිල් වික්‍රමසිංහ විසින් ජනාධිපතිවරයාගෙන් ඉල්ලීමක් කර තිබේ.
“මෛත්‍රීපාල සිරිසේන ජනාධිපතිතුමාත් මේ ඇමති කියලා කාඩ් බෝඩ් උස්සගෙන ගිය අයත්, සියළු දෙනාම දැන් ව්‍යවස්ථාව අනුව වැඩකරන්න. මොකද අපි හැම එක්කෙනාම ව්‍යවස්ථාව ආරකෂා කරන්න දිවුරුම් දීලා තියෙන්නේ, ඒ ව්‍යවස්ථාව ආරක්ෂා කරන්න බැරිනම් මෙතන ඉන්න අයිතියක් නැහැ.”
අගමැතිවරයා තීරණය කිරිමේ අයිතිය ඇත්තේ පාර්ලිමේන්තු බහුතරයට බව රනිල් වික්‍රමසිංහ 04 අඟහරුවාදා අරලිය ගහ මන්දිරියේදී මාධ්‍ය අමතමින් කියා සිටියේය.
“මේක පාර්ලිමේන්තු ආණ්ඩුවක්. අගමැතිවරයා තීරණය කරන්නේ පාර්ලිමේන්තුවේ බහුතරය, ඇමතිවරු තීරණය කරන්නේ අගමැතිවරයා, පාර්ලිමේන්තුව ඒ සියලු දෙනා පාලනය කරනවා.” යි ඔහු පැවසීය.
මහ මැතිවරණයක් පැවැත්වීම සම්බන්ධ යෝජනාවක් නීත්‍යානුකූල රජයක් යටතේ පාර්ලිමේන්තුවට ඉදිරිපත් කර තුනෙන් දෙකක අනුමැතියක් ලබාගන්නේනම් පමණක් මැතිවරණයක් පැවැත්වීමේ හැකියාවක් පවතින බව ද රනිල් වික්‍රමසිංහ ප්‍රකාශ කළේය.
කෙසේ වෙතත් ඊට පෙර නීතයානුකූලව රජයක් පිහිටවිය යුතු බවත් මැතිවරණයකට මුහුණදීමට බිය පුද්ගලයන් නීත්‍යනුකූල නොවන ආණ්ඩුවක් යටතේ මැතිවරණ කැදවීමට සූදානම් බව එක්සත් ජාතික පක්ෂ නායකයා කියා සිටියේය.
වත්මන් දේශපාලන අර්බුදය එක්සත් ජාතික පෙරමුණ නිසැක වශයෙන්ම ජය ගන්නා බවත් එය වැළැක්වීමට කිසිවෙකුටත් නොහැකි බව රනිල් වික්‍රමසිංහ වැඩි දුරටත් සඳහන් කළේය.
Facebook Comments
