විදේශීය රටවල සිදු කෙරෙන ආකාරයට ශ්‍රී ලංකාවේ බලය බෙදීම සිදු කළ නොහැකි බව තිස් වසරකට ඉහතදී පළාත් සභා වෙනුවෙන් සටන් වැඳ බෝම්බ ප්‍රහාරයට ලක්වූ රාජිත සේනාරත්න අමාත්‍යවරයා පවසයි.
මධ්‍යම රජය විසින් සිදු කරනු ලබන සංවර්ධන ව්‍යපෘති නඩත්තු කිරීමට පළාත් සභා වලට බලයක් නොමැති බවයි අමාත්‍යවරයා 13 බ්‍රහස්පතින්දා මීගමුව දිස්ත්‍රික් මහ රෝහලේ ඉදිකරන ලද “සුරක්ෂා ළමා සෙවන” ළමා වාට්ටු සංකීර්ණය විවෘත කිරීමේ අවස්ථාවට එක්වෙමින් කියා සිටියේය.
“සිංහල හා ද්‍රවිඩ අන්තවාදීන්ගෙන් බෝම්බ ප්‍රහාර එල්ල වුනා. නමුත් මගේ ගමන කටින් ගහලා හෝ නතර කරන්න බැරි වුනා. බලය බෙදුවට දේශපාලන යථාර්තයක් තිබෙනවා. ජර්මනියේ, ඇමරිකාවේ බලය බෙදන අයුරින් ශ්‍රී ලංකාවේ බලය බෙදන්න බැහැ. දේශපාලන තීන්දු අරගෙන නිලධාරීන්ට උපදෙස් ලබාදිය යුතුයි.”
පළාත් සභා වලින් එවැනි ව්‍යපෘති නඩත්තු නොකරන්නේ නම් අධ්‍යාපනය කඩා වැටුන ආකාරයෙන්ම එම සංවර්ධන වැඩසටහන් ද කඩාකප්පල් වන බවටයි සුව ඇමැතිවරයා අනතුරු අඟවන්නේ.
“සෞඛ්‍ය සේවාව පළාත් සභා වලට විමධ්‍යගත කිරීම තුලින් එය සංවර්ධනය නොකරන්නේ නම් අධ්‍යාපනය කඩාකප්පල් වූ ආකාරයට සෞඛ්‍ය සේවාවත් කඩාකප්පල් වෙනවා. අපි පළාත් සභා රෝහල් සංවර්ධනය කළ පසු ඒවා පාලනය කිරීමට පළාත් සභා වලට අමාරුයි.” යනුවෙන් රාජිත සේනාරත්න අමාත්‍යවරයා වැඩි දුරටත් සඳහන් කළේය.
Facebook Comments
