දෙමළට නොසලකන කරු ගේ “සාධාරණ සමාජය” මනෝට එපා වේ (VIDEO)

0

මහින්ද රාජපක්ෂ ජනාධිපති කමින් පැරදවීම සදහා මුල්වූ බහුජන සංවිධානයක් ගෝඨාභය රාජපක්ෂ ජනාධිපතිවරයාට හරස්ව යාමේදී දෙමළ භාෂාවට නිසි තැන නොදීම එහි ආරම්භක දෙමළ නායකයකුගේ කළකිරීමට හේතු වී තිබේ.

එවන් ජාතික ව්‍යාපාරයක් සමග ඉදිරි දේශපාලන ගමනක් යෑමට ඇති හැකියාව සම්බන්ධයෙන් හිටපු ජාතික සංවාද හා භාෂා අමාත්‍යවරයකු සැක මතු කළේ සැප්තැම්බර් 29 අගහරුවාදා කොළඹදී පැවැති මාධ්‍ය හමුවකදීය.

සාධාරණ සමාජයක් සදහා වන ජාතික ව්‍යාපාරය අවුරුදු පහකට පෙර ආරම්භ කරද්දී එහි නාමය තමන් විසින් නිවැරදිව දෙමළ භාෂාවට පරිවර්තනය කළ බව සිහිපත් කරන හිටපු අමාත්‍ය මනෝ ගනේෂන් චෝදනා කරන්නේ අද වන විට එහි නාමය “ගූගල් දෙමළ” බවට පත් කරගෙන ඇති බවටයි.

එය වහාම නිවැරදි දෙමළ භාෂාවට පරිවර්තනය කරන ලෙස සංවිධානයේ බහුතර සිංහල නායකත්වයෙන් ඉල්ලා සිටි හිටපු අමාත්‍යවරයා වැඩි දුරටත් සභාවට දැනුම් දී සිටියේ මාධ්‍ය හමුව සදහා ආරාධනා පත්‍රය ලැබුන මොහොතේ එම වැරැද්ද දුටු තමන් ඒ සම්බන්ධයෙන් වග කිව යුත්තන්ට දැනුම් දුන්නත් එය නිවැරදි කිරීමට පියවර ගෙන නොමැති බවයි.

හිටපු කතානායක කරු ජයසුරියගේ නායකත්වයෙන් යුත් එම සංවිධානය දෙමළ භාෂාව නොතකා හැරීම පිලිබඳ දැඩි විවේචනයට ලක්වූයේ සංවිධානය පිහිටුවා පස් අවුරුද්දක් තුල තබන ලද දෙවැනි මාධ්‍ය හමුවේදීය.

මාධ්‍ය හමුව සදහා ආරාධනා කරමින් සාධාරණ සමාජයක් සඳහා වන ජාතික ව්‍යාපාරයේ ලේකම් පාලිත ලිහිණියකුමාර විසින් මාධ්‍ය ආයතන වෙත යොමු කළ නිවේදනයේ සදහන්ව තිබුනේ ශ්‍රී ලංකාවේ පාර්ලිමේන්තුව නියෝජනය කරන සියලු විරුද්ධ පක්ෂ නායකයන් සමඟ සාධාරණ සමාජයක් සඳහා වන ව්‍යාපාරය මේ ආකාරයේ ප්‍රවෘත්ති සාකච්ජාවක් අවසන් වරට පවත්වා ඇත්තේ 2015 වසරේදී බවයි.

මාධ්‍ය හමුවට අදාළ ලිපි ලේඛනද දෙමළ භාෂාවෙන් ලබා නොදීම සම්බන්ධයෙන් කණස්සල්ල පළ කළ ජාතික සමගි බලවේගයේ මනෝ ගනේෂන් මන්ත්‍රීවරයා එහිදී අවධාරණය කළේ සාධාරණ සමාජයක් සදහා වන ජාතික ව්‍යාපාරයේ මාධ්‍ය හමුව සඳහා දෙමළ නියෝජනයක් අවශ්‍යනම් දෙමළ භාෂාවට දිය යුතු නිසි පිලිගැනීම ලබා දෙන ලෙසයි.

“නැත්නම් අපිව අයින් කරලා දාලා වෙනම යන්න. ප්‍රශ්නයක් නෑ. අපිව ඕනේ නම් අපේ භාෂාවට දෙන පිළිගැනීම කරුණාකර ලබා දෙන්න. ඕනෑ කමින් කරා කියලා කියන්නේ නැ. නමුත් ඒක කරන්න.” ඔහු එහිදී වැඩි දුරටත් අවධාරණය කළේය.

වර්තමාන ආණ්ඩුව විසින් පාර්ලිමේන්තුවට ඉදිරිපත් කර තිබෙන විසි වැනි ආණ්ඩුක්‍රම ව්‍යවස්ථා සංශෝධන පනත් කෙටුම්පත පිළිබඳව අදහස් දැක්වීම සදහා සාධාරණ සමාජයක් සදහා වන ජාතික ව්‍යාපාරය කොළඹ ජානකී හෝටලයේදී මාධ්‍ය හමුව කැදවා තිබුනේ එම ව්‍යාපාරයේ සභාපති හිටපු කතානායක කරු ජයසුරියගේ ප්‍රධානත්වයෙනි.

පාර්ලිමේන්තුවේ විපක්ෂය නියෝජනය කරන රංජිත් මද්දුම බණ්ඩාර, රාජිත සේනාරත්න හා දෙමළ ජාතික ජනතා පෙරමුණේ නායක ගජේන්ද්‍ර කුමාර් පොන්නම්බලම් ද එහිදී විසිවැනි සංශෝධනයට විරුද්ධව අදහස් දක්වා තිබුනි.

Facebook Comments