ඇවන්ට්ගාඩ් ලොක්කා ලෝක ළමා දිනය හිරගෙට ගෙන යයි

0

ගෝඨාභය රාජපක්ෂ පාලනය යටතේ එළඹෙන පළමු ලෝක ළමා දිනය නීති විරෝධී අවි ප්‍රවාහනය සම්බන්ධයෙන් නඩු වලට මුහුණපා සිටින කෝටිපති ව්‍යාපාරයක අනුග්‍රහයෙන් බන්ධනාගාරයක් තුළ දී පැවැත්වීමට රජය සැලසුම් කර තිබේ.

ලෝක ඉතිහාසයේ පළමුවරට බන්ධනාගාරයක් තුළ ඇවන්ට්ගාඩ් සමූහ ව්‍යාපාරයේ සභාපතිගේ අනුග්‍රහයෙන් පවත්වනු ලබන ජාත්‍යන්තර ළමා දින සැමරුම වටරැක එළිමහන් බන්ධනාගාරයේ පැවැත්වීමට කටයුතු සංවිධානය කර ඇති බවයි රජය පවසන්නේ.

බන්ධනාගාර ප්‍රතිසංස්කරණ හා සිරකරුවන් පුනරුත්ථාපන රාජ්‍ය අමාත්‍ය විශේෂඥ වෛද්‍ය සුදර්ශිනී ප්‍රනාන්දුපුල්ලේගේ ප්‍රධානත්වයෙන් එළඹෙන ඔක්තෝම්බර් පළමු වෙනිදා උදෑසන 09.00 සිට බන්ධනාගාර දෙපාර්තමේන්තුවේ සෘජු අධීක්ෂණය හා මෙහෙයවීම යටතේ එය බවත් වන බව රජයේ ප්‍රවෘත්ති දෙපාර්තමේන්තුව නිවේදනය කර තිබේ.

ලෝක ළමා දිනය සහ ලෝක වැඩිහිටි දිනය සෑම වසරකම ඔක්තෝබර් මාසයේ පළමු වැනි දිනට යෙදී ඇත.

“ජීවිතයේ කිසිදු දිනෙක නොදුටු සිය පියා හමුවීමටත්, වසර ගණනාවක් නොදුටු පියා සමගින් කතා බස් කිරීමටත් ලෝක ළමා දිනය දා නේවාසික රැඳවියන්ගේ දරුවන්ට අවස්ථාව සලසා දීම මෙම ළමා දින සැමරුමේ මූලිකම අරමුණයි.”

රැඳවියන්ගේ දරුවන්ට ඔවුන් ඉදිරිපිට විනෝද වීම සදහා අවස්ථාව සලසාදීමත් දරුවන් සමගින් සංගීතය රස විදීමටත් අවස්ථාව සැලසෙන අතර රැඳවියන් අතින් සිය දරුවන්ට ත්‍යාග ලබාදීමටද අවස්ථාව සලසා දීමට කටයුතු සංවිධානය කර ඇති බව රජය වැඩි දුරටත් පවසයි.

එදින වැඩසටහන සදහා සංගීතය සපයනු ලබන්නේ රැඳවියන්ගෙන්ම සැදුම්ලත් සංගීත කණ්ඩායමක් විසිනි.

සිය දඩුවම් කාලය තුළදී මහන්සියෙන් උපයාගත් මුදල් ඔවුන්ගේ කැමැත්ත මත සිය පවුල් වෙත ලබා දීමටද රැඳවියන්ගේ සමීපතමයන් විසින් සිය නිවසින් සකසා ගත් ආහාර රැඳවියන්ට ලබා දීමටද අවස්ථාව එදින අවස්ථාව සලසා ඇති බව රජය පවසයි.

රජයේ ප්‍රවෘත්ති දෙපාර්තමේන්තුව වැඩි දුරටත් පවසන්නේ ඇවන්ට්ගාඩ් සමූහ ව්‍යාපාරය හා බන්ධනාගාර දෙපාර්තමේන්තුව එක්ව සිදුකරගෙන යනු ලබන රැඳවියන් රැකියා නියුක්තිකයන් කර සමාජගත කිරීමේ ව්‍යාපෘතියට එක්ව සිටින රැඳවියන්ට බැංකු ගිණුම් විවෘත කර බැංකු පොත් සංකේතාත්මකව ඔවුන් වෙත ලබාදීම රාජ්‍ය අමාත්‍ය විශේෂඥ වෛද්‍ය සුදර්ශිනී ප්‍රනාන්දුපුල්ලේගේ අතින් එදින සිදුකිරීමටද නියමිත බවයි.

“මේ සදහා අනුග්‍රහය දායකත්වය දක්වන්නේ ඇවන්ට්ගාඩ් සමූහ ව්‍යාපාරයේ සභාපති මේජර් නිශ්ශංක සේනාධිපති මහතා විසිනි,” යනුවෙන් රජයේ නිල පුවත් වෙබි අඩවිය වැඩි දුරටත් සදහන් කර තිබේ.

Facebook Comments

wedding people